27/11/2025
Hindi ako Marcos loyalist, hindi rin ako Duterte diehard. Pero bilang ordinaryong Pilipino, ramdam ko kung gaano kabigat ang pasan ngayon ni Pangulong B**gbong Marcos sa gitna ng flood control at corruption investigation na sumasapol sa mga malalaking pangalan sa pulitika.
Sa kasalukuyang imbestigasyon, tinitingnan ang mga proyekto mula pa noong nakaraang administrasyon hanggang ngayon, kasama ang flood control funds na pinaglaanan ng bilyon-bilyong piso. Kasama sa iniimbestigahan ang ilang dating opisyal ng DPWH, mga contractor, at mga mambabatas — hindi lang taga-kabilang kampo, kundi pati mga itinuturing na kaalyado ng kasalukuyang administrasyon.
Umabot na sa puntong inaanunsyo mismo ng DPWH at ICI ang rekomendasyon na kasuhan ang ilang personalidad, gaya ni dating Ako Bicol Rep. Zaldy Co at dating Speaker Martin Romualdez, kaugnay ng mga alegasyon ng katiwalian sa flood control projects. May mga warrant of arrest nang inilalabas, at malinaw ang mensahe: kahit sino pa ang posisyon mo, puwede kang masita at managot.
Doon pumapasok ang pasasalamat ko kay PBBM.
Hindi dahil perpekto siya, hindi rin dahil kampi ako sa kanya — kundi dahil sa unang pagkakataon matapos ang napakaraming “scandal of the week,” may nakikita tayong konkretong galaw: imbestigasyon, rekomendasyon, kaso, warrant. Hindi lang presscon, hindi lang soundbite.
Corruption is a cancer sa Pilipinas. Matagal na natin ’tong alam, pero bihira natin makita na mismong gobyerno ang nagpuputol ng sariling “infected” na bahagi. Kaya kahit hindi ako pro-BBM, handa akong magsabi ng isang simpleng:
“Salamat, Mr. President, sa pagharap sa issue na ito. Sana tuloy-tuloy, walang sasantuhin, at lahat—mula 2016 hanggang ngayon—ay managot kung talagang may kasalanan.”
At bilang mamamayan, trabaho naman natin na bantayan, magtanong, at maningil para siguraduhin na ang laban kontra korapsyon ay hindi mauwi sa palabas lang, kundi maging totoong pagbabago para sa bansa.
