29/05/2025
“Liham para sa lihim na sugatan...”
Kaibigan,
Kumusta na? Alam kong ang isasagot mo lang ay “okay naman na”. Hindi na kita kukulitin na sabihin pa kung ano talaga ang iyong totoong nadarama, pero kung maisip mong magbukas na, nandito lang ako, pakikingan kita.
Matagal na rin kasi na panahon noong huli kitang nakitang “tunay” na masaya, ‘yong tumatawa ng pagkalakas na parang hindi ka na makahinga.
Sana pagising natin isang umaga, bumalik ka na, 'yong ikaw na puno ng tunay na ligaya at sigla.
Napapansin kong apektado na halos lahat pati ang iyong espiritu at kululuwa. Nasasaktan ang ‘yong puso at ang isip mo’y pagod na.
Huwag mo sanang hayaan na malunod ka sa sobrang pagiisip at panghihina, kasi ang itinatago mong sugat ay baka lalo lang lumala. Kaya sana sa mga oras na ito ay itigil mo na - itigil mo na ang paglangoy sa dagat ng kalungkutan, pagtatago ng nararamdaman, at pagiisa.
Kaibigan, tama na, panahon na para bumangon, magpakatatag, at umusad ka.
Isang paalala nga pala, baka kasi nalimot mo na, alam ng Diyos ang iyong puso at lahat ng iyong nadarama. Sa lahat ng iyong pinagdadanan kasama mo Siya. Yung mga oras na nasasaktan at umiiyak ka, hindi ka noon nagiisa, buhat-buhat ka Niya, akala mo lang wala Siya.
Sa mga oras na ito yakap ka Niya. Alam Niya lahat at may pakialam Siya. Buksan mo na sana ang iyong puso upang gumaling na. Tangalin mo na sana ang takip ng sugat upang lubos na maghilom na.
Muli kaibigan, narito lang ako, at ang nais ko ay lubos na paghilom mo. Nais kong malaman mo na hindi ka nag-iisa. Maghihintay ako hangang sa sabihin mo na, at papakingan ko lahat, hangang sa maibuhos mo na.
Sa ngayon magiging tapat ako sa aking tungkulin na ipanalangin ka. Alam kong hindi na magtatagal at ang iyong sugat ay maghihilom na.
Salamat sa pagbasa nito kaibigan, at katulad ng Diyos, mahal din kita:)
