Sir Alvin DV

Sir Alvin DV Jeremiah 17:7 | Psalm 105:15

25/05/2026

Ang masipag na magsasaka ay sagana sa pagkain

📖 ‭‭Mga Kawikaan‬ ‭28‬:‭19‬ ‭MBB
“Sagana sa pagkain ang magsasakang masipag, ngunit naghihirap ang taong tamad.”

Ang kasipagan ay may magandang bunga, habang ang katamaran naman ay nagdudulot ng kakulangan at paghihirap. Ang magsasakang masipag ay may sapat na pagkain dahil nagsisikap siyang magtanim at magtrabaho para sa kinabukasan. Ang tagumpay ay hindi basta dumarating kundi pinaghihirapan at pinagtitiyagaan. Samantala, ang taong tamad ay madalas mawalan ng oportunidad dahil kulang siya sa sipag at disiplina. Sa tunay na buhay, makikita na mas umaangat at mas nagiging maayos ang buhay ng taong responsable at masikap sa kanyang gawain.

Tanging sa Diyos ang lahat ng kapurihan 👆

24/05/2026

Huwag buhatin ang sariling bangko

📖 ‭‭Mga Kawikaan‬ ‭27‬:‭2‬ ‭MBB
“Hayaan mong iba ang sa iyo'y pumuri at ang sariling bangko'y huwag mong buhatin.”

Huwag nating ipagmalaki ang ating sarili o piliting itaas ang sariling pangalan. Mas maganda at mas kapani-paniwala kapag ang ibang tao ang nakakakita at pumupuri sa ating mabubuting gawa. Ang taong mapagpakumbaba ay mas iginagalang kaysa sa taong palaging nagyayabang. Sa madaling salita, hayaang ang mabuting ugali at gawa ang magsalita para sa atin.

Tanging sa Diyos ang lahat ng kapurihan 👆

23/05/2026

Huwag papatulan ang taong mangmang

📖 ‭‭Mga Kawikaan‬ ‭26‬:‭4‬ ‭MBB
“Huwag mong papatulan ang isang mangmang at baka lumabas na higit ka pang mangmang.”

Upang hindi isipin ng taong mangmang na siya ay may katuwiran, sagutin mo siya ayon sa kanyang kahangalan. Huwag ding magpadala ng balita sa taong mangmang sapagkat ito ay napakadelikado, para mo na ring tinaga ang mga paa mo. Kaya huwag papatulan ang isang taong mangmang at baka lumabas na higit ka pang mangmang.

Tanging sa Diyos ang lahat ng kapurihan 👆

21/05/2026

Karunungan ang dahilan upang mapuno ng magagandang bagay ang iyong tahanan

📖 ‭‭Mga Kawikaan‬ ‭24‬:‭4‬ ‭MBB
“Ang loob ng tahanan ay napupuno ng lahat ng magagandang bagay dahil sa karunungan.”

Ang paggalang at pagsunod sa Diyos ay pasimula ng karunungan. Higit din na mabuti kaysa kalakasan ang karunungan sapagkat napupuno ng lahat ng magagandang bagay ang loob ng tahanan dahil sa karunungan. Ating igalang at sundin ang Diyos at pagsumikapang mabigyan Siya ng kaluguran sa pamamagitan ng paniniwala at paglilingkod sa Kanya dahil sa Kanya nagmumula ang karunungan.

Tanging sa Diyos ang lahat ng kapurihan 👆

20/05/2026

Laging igalang at sundin ang Diyos

📖 ‭‭Mga Kawikaan‬ ‭23‬:‭17‬ ‭MBB
“Huwag kang maiinggit sa mga makasalanan, sa halip, si Yahweh ay laging igalang at sundin.”

Huwag pabayaang mawala at iyong pahalagahan ang katotohanan, karunungan, at unawa sapagkat gaganda ang iyong kinabukasan kung ikaw ay hindi maiinggit sa mga makasalanan at kung ikaw ay laging gumagalang at sumusunod sa Diyos.

Tanging sa Diyos ang lahat ng kapurihan 👆

19/05/2026

Ikaw ay tiyak na pagpapalain

📖 ‭‭Mga Kawikaan‬ ‭22‬:‭9‬ ‭MBB
“Ang mahirap ay bahaginan mo ng pagkain, at tiyak na ikaw ay pagpapalain.”

Taong walang kakayahan na magbalik ng mga bagay na iyong ibinibigay, tiyak na ang Diyos ang magkakaloob at magbabalik ng mga pagpapala sa iyo. Ang taong mapagbigay ay lalong yumayaman, ngunit ang tikom na mga kamay ay lalong naghihirap. Ang taong matulungin ay sasagana sa buhay at tiyak na tutulungan.

Tanging sa Diyos ang lahat ng kapurihan 👆

18/05/2026

Hindi nagsasawang magbigay ang taong matuwid

📖 ‭‭Mga Kawikaan‬ ‭21‬:‭26‬ ‭MBB
“Ang taong tamad ay nanghihingi araw-araw, ngunit ang matuwid ay di nagsasawa ng kabibigay.”

Ang naghihintay na pagpapala sa taong matuwid ay kasaganahan. Anuman ang kanyang hangarin, ito ay nagaganap sapagkat siya ay masikap. Ngunit ang taong tamad, kahit na anong ganda ng kanyang pangarap ay hindi matutupad. Taong tamad at batugan ay maghihirap kaya siya ay nanghihingi sa araw-araw. Gutom ang papatay sa kanya sapagkat ayaw niyang ikilos ang kanyang mga kamay. Ngunit ang taong matuwid na nagsisikap ay hindi nagsasawang nagbibigay kaya lalong pinagpapala ng Diyos upang maging pagpapala sa ibang tao.

Tanging sa Diyos ang lahat ng kapurihan 👆

17/05/2026

Maganda ang kinabukasan ng taong masikap

📖 ‭‭Mga Kawikaan‬ ‭20‬:‭13‬ ‭MBB
“Matulog ka nang matulog at ika'y maghihirap, ngunit maganda ang iyong bukas kung ika'y magsisikap.”

Ang taong tamad ay laging nakatihaya; kaya siya ay magugutom at walang panlagay sa sikmura. Ang bunga ng katamaran ay paghihirap at anumang pangarap niya ay hindi matutupad. Ngunit, ang kinabukasan ng taong masikap ay maganda at mayroong kasaganahan. Kanya ring hangarin ay laging nagaganap.

Tanging sa Diyos ang lahat ng kapurihan 👆

16/05/2026

Tayo ay tumulong sa mga mahihirap

📖 ‭‭Mga Kawikaan‬ ‭19‬:‭17‬ ‭MBB
“Parang pagpapautang kay Yahweh ang pagtulong sa mahirap, at pagdating ng panahon, si Yahweh ang magbabayad.”

Huwag tayong mapagod sa paggawa ng mabuti sapagkat pagdating ng takdang panahon tayo ay aani kung hindi tayo susuko. Kaya nga, basta may pagkakataon ay gumawa tayo ng mabuti sa lahat ng tao, lalo na sa mga kapatid natin sa pananampalataya. Lagi rin nating tatandaan na higit na pinagpala ang taong nagbibigay kaysa taong tumatanggap. Pagdating ng panahon, ang Diyos mismo ang magbabayad sa mga taong matulungin sa mga mahihirap.

Tanging sa Diyos ang lahat ng kapurihan 👆

15/05/2026

Nakakahiya at mangmang ang taong sumasagot sa tanong na hindi niya nalalaman

📖 ‭‭Mga Kawikaan‬ ‭18‬:‭13‬ ‭MBB
“Nakakahiya at isang mangmang ang isang taong sumasagot sa tanong na hindi naman niya nalalaman.”

Pananagutan ng isang tao ang anumang kanyang sasabihin sapagkat ayon sa kanyang salita, siya ay gagantimpalaan. Nakasalalay din sa dila ang buhay at kamatayan. Kaya, marapat lamang na siguraduhing may sapat na kaalaman at karunungan muna bago magsalita at sumagot sa mga katanungan, sapagkat nakakahiya at isang mangmang ang taong sumasagot sa tanong na hindi naman nalalaman.

Tanging sa Diyos ang lahat ng kapurihan 👆

14/05/2026

Kapahamakan sa buhay ay hindi mawawala kung masama ang iginanti sa mabuting ginawa

📖 ‭‭Mga Kawikaan‬ ‭17‬:‭13‬ ‭MBB
“Kapag masama ang iginanti sa mabuting ginawa, ang kapahamakan sa buhay ay di mawawala.”

Ang masamang isipan ay hindi uunlad at ang pagpaparusa sa matuwid ay hindi makatuwiran maging ang pagpapahirap sa taong marangal ang pamumuhay. Mayroong pananagutan ang taong nagagalak sa kapahamakan ng iba. Kaya nga, kapag ang iginanti sa mabuting ginawa ay pawang kasamaan, hindi mawawala ang kapahamakan sa kanyang buhay.

Tanging sa Diyos ang lahat ng kapurihan 👆

Address

San Manuel
2438

Website

Alerts

Be the first to know and let us send you an email when Sir Alvin DV posts news and promotions. Your email address will not be used for any other purpose, and you can unsubscribe at any time.

Shortcuts

Share

Category