08/10/2025
Bismillah..,
So okit o ahlussunnah waljama'h ko kasugo sa mapiya ago kasapar sa marata.
منهاج أهل السنة والجماعة في الأمر بالمعروف والنهي عن المنكر:
Phakarayagn tano anan nggolalan siiko usayanon i shiekh al-uthaimen r.a
قال الشيخ العثيمين رحمه الله في كتابه "منهاج أهل السنة والجماعة"
Pitharo i shiekh uthaimen r.a siiko kitab iyan a "منهاج أهل السنة والجماعة":
" أن المجتمع الإسلامي لا يصلح إلا بالأمر بالمعروف والنهي عن المنكر "
" Mataan a so kaphaging'd a kaiislamy na di skaniyan dn pthagompiya taman sa di niyan isugo so mapiya ago taman sa diniyan isapar so marata,
قال تعالى: "وَلْتَكُن مِّنكُمْ أُمَّةٌ يَدْعُونَ إِلَى الْخَيْرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنكَرِ ۚ وَأُولَٰئِكَ هُمُ الْمُفْلِحُونَ."
Pitharo o allah: "Na mbaloy so isa rkano ka sagorompong a ipphanolon iran so mapiya, go ipzogo iran so okit a mapiya, go ipzapar iran so marata: Na siran man na siran so phamakaslang sa maliwanag."
(Maana a isa mala sipat o pagtao a pthagumpiya ago phaka daag naso pagtao a psugo sa mapiya ago pzapar sa marata)
ولكن طريقة أهل السنة والجماعة في هذا الباب العظيم الذي فضلت فيه هذه الأمة على غيرها أنهم يرون الأمر بالمعروف والنهي عن المنكر من مقومات المجتمع الإسلامي.
Ugaid na aya manhaj (okit) o ahlussunnah waljmaa'h sangkai a mala a pamintuan a skaniyan i kasasabapan sa kapakallbi angkai a ummat ko salakaw ron, na mataan a giyangkai a kasugo sa mapiya ago kasapar sa marata na pd dn aya ko mga ala a unayan a galbk o kaphagingd a kaiislamy
ولكنه يحتاج إلى أمور: أولا: أن يكون الإنسان عالما بالحكم بحيث يعرف أن هذا معروف وأن هذا منكر،
Ugaid na giyangkai a mala galbk na aya kaphaka untol iyan na kailangan na makaokit sangkai a tlo a mga nganin:
● Paganay ron : Mabaloy so manosiya a sugo sa mapiya ago sapar sa marata a katawan iyan so kokoman o isugo iyan, katawan iyan a giyangkai a isugo iyan na titho a isusugo o agamah, katawan iyan a giyangkai a izapar iyan na titho a isasapar o agamah,
وَلَا تَقْفُ مَا لَيْسَ لَكَ بِهِ عِلْمٌ ۚ إِنَّ السَّمْعَ وَالْبَصَرَ وَالْفُؤَادَ كُلُّ أُولَٰئِكَ كَانَ عَنْهُ مَسْئُولًا
Pitharo o allah: "Go ding ka pthindgi so da a kataong ka on; mataan! a so kan´g, ago so kaylay, go so poso na oman i isa kiran na khayzaan."
Kailangan anan ka khapakay a minisugo uka so galbk a knaba bs isusugo o agamah, khapakay a inisapar ka so galbk a knaba bs isasapar o agamah.
ثانيا: لابد أن تعلم أن هذا المعروف لم يفعل، وأن هذا المنكر قد فعل،
● Ikadowa: Kailangan na bagungka p'nggalbka so kasugo sa mapiya na katukawan ka daan a giyangkai a isusugo o allah na titho a inibhagak i aki aya ago da niyan nggalbka, datarotu mambo a bagu ka zapar sa marata na kailangan na katukawan ka daan a giyangkai a haram a inisapar o allah na titho a pinggalbk i akiya,
وإذا رأينا هدي النبي صلى الله عليه وسلم، وجدنا أن هذه طريقته دخل رجل يوم الجمعة والنبي صلى الله عليه وسلم، يخطب وجلس فقال النبي صلى الله عليه وسلم، "أصليت؟ " قال لا.
قال: "فقم فصل ركعتين"
Upama ka pagilaya tano so manhaj (okit) o rasulollah s.a.w na mataan a khailay tano a giyaya i okit iyan ko kasapar sa marata ago kasugo sa mapiya,
دخل رجل يوم الجمعة والنبي صلى الله عليه وسلم، يخطب وجلس فقال النبي صلى الله عليه وسلم، "أصليت؟ " قال لا.
قال: "فقم فصل ركعتين"
Miyakaisa na adn a sakatao a mama a somiyold sa masjid oriyan iyan na diritsodn miyontod ko kiyapakasold iyan, kapapantagan a di mangutbah so nabi s.a.w,
Inizaan o nabi s.a.w: ino miyaka sambayangka sa dowa ka rakaat a tahiyyatal masjid? Pitharo o mama a dapn, pitharo o nabi a tindg ka na guka sambayang sa dowa ka rakaat."
Da sangkaan a so kasambayang sa dowa ka rakaat ko kapakasold sa masjid na isusugo o allah, ugaid na (Ilayangka so okit o rasulollah, inizaan iyan daan so mama, sako matangkd a minibagak so isusugo o allah na gubo skaniyan sumogo sa mapiya)
Khapakay a inisugo oka sa diritso so mapiya siiko pagaringka sa dangka daan amadi, takinuba bs aya ka miyanggalbk iyan dn,
Khapakay mambo a inisapar ka sa diritso so marata ko pagaringka na knaba bs titho a marata angkuto a galbk iyan.
وكذلك أيضا بالنسبة للمعاصي فبعض الناس قد ينهى شخصا عما يراه منكرا وليس بمنكر.
Dataruto mambo so kasapar sa marata, khapakay a psapar ka sa marata ko pagaringka a knaba bs marata angkuto a galbk iyan,
Ibarat iyan na miyakailay ka sa di zambayang sa lohor a moontod, na diritsongkawn dn inisapar so kawntod, pitharo kawn a di khapakay so kawntod sa dangkadn amadi, khapakay a mapapakay ron so kawntod sabap sa adn a g'dam'n iyan, knaba langun a pkhailayingka a marata na ba marata ko salakaw rka.
ثالثا: أن لا يترتب على فعل المعروف ما هو منكر أعظم مفسدة من منفعة المعروف،
● Ika tlo : Kailangan na siiko kasugo oka sa mapiya ago kasapar ka sa marata na di munga so isugo ka a mapiya sa mas mala a kabinasaan...
فإن ترتب على فعل المعروف منكر هو أشد ضررا من المنفعة الحاصلة بهذا المعروف إن درأ المفاسد أولى من جلب المصالح، وهذه الكلمة المعروفة هي القاعدة التي دل عليها القرآن،
Upama ka magunga so galbk a mapiya sa mas mala a kabinasaan, na aya kaidah o agamah na so kaphakadaa ko kabinasaan na mas khawna adiso kakhowaa ko kamapiyaan, giyaya na qaidah aya a lomalangkap ago giyaya i kaida a mitotoro o kitab o allah,
Giyaya mga pagariya i manhaj o ahlussunnah ko kasugo sa mapiya ago kasapar sa marata, panabnaran tano i makawkit saya so kasugo sa mapiya ago kasapar sa marata ka an makaapas so galbk tano.
_______________
Isa mala karibatan tano na tanto tano a mapasang i kasugo sa mapiya ago kasapar sa marata, ugaid na madaon angkai a okit manhaj o nabi, manhaj o ahlussunnah wal jama'h.
Ba pira pira i psapar sa marata a aleem, daniyan dn amada angkuto a pkhailay niyan a marata o titho a marata na inisapar iyan dn,
● Ino miyaamad ka a katawan iyan a marata angkuto a galabk? Khapakay a diniyan katawan,
● Ino miyaamad ka o pimbhaba iyan angkuto a galbk a marata, khapakay a kalilipatan iyan,
● Inu ba so pipikirn ka marata na giutodn angkuto a pkhailayingka a tithodn a marata? khapakay a adn a marata ko ilayan ka na knaba marata ko ilayanon o minggalbk, datar o tao a biyono iyan so muslim a psabot, na dangkadn amada na tigka a baradusa a tao ka miyamuno sa muslim, takinuba ka knaba ko katantowan iyan sabap sa ino niyan biyono ka miyamuno na inikitas skaniyan o shariah siiko miyapatay niyan,
Giyanan mga pagariya... khapakay a kapkhailayangkawn na marata na knababs marata ko katantowan iyan.
Tawfikan tano o allah ko kalanguwan o mapiya, na irila iyan rkitano so mga karibatan tano.
__________________
✍️ Jamil Amerol Papandayan "MAMA"
