29/01/2026
"3-ANYOS NA ANAK, NADAMAY SA PAMAMARIL SA MATALAM; SUSPEK SA PAGPATAY SA OFW, NATUKOY NA NG MGA OTORIDAD"
NAGPAPATULOY ang imbestigasyon ng Matalam PNP sa naganap na pamamaril sa Purok Lily, Barangay Poblacion kamakalawa, kung saan kinumpirmang nadamay at nasugatan ang tatlong taong gulang na anak ng biktimang si Hannah Buat, alyas "Bai Dulao."
Sa naging panayam kay Police Lieutenant Bonel Cabuyao, Deputy Chief of Police ng Matalam MPS, inihayga nitong tinamaan sa buto ng kaniyang kanang kamay ang bata matapos silang pagbabarilin habang nasa isang apparel store.
Sa kabutihang palad, nasa ligtas na kalagayan ang menor de edad habang sumasailalim sa gamutan.
Lumalabas sa masusing pagsusuri ng mga otoridad na hindi "mistaken identity" ang nangyari dahil sadyang pinuntirya ng gunman ang biktima matapos itong barilin ng ilang beses sa katawan na sanhi ng kaniyang kamatayan.
Nabatid na dalawang linggo pa lamang nakakauwi sa bansa si Buat mula sa pagtatrabaho sa abroad bilang isang OFW.
Bagaman hindi direktang nagsasabi ng kaniyang mga problema sa kaniyang mga magulang, lumalabas sa imbestigasyon na may mga personal problema at alitan ang biktima na tanging sa kaniyang mga kaibigan lamang nito naisisiwalat.
Kinumpirma rin ni PLT Cabuyao na ang suspek ay kabilang sa "Rogue gallery" ng PNP, na nagpapahiwatig na may mga mabibigat na ebidensya na silang hawak laban dito.
Sa ngayon, personal grudge o personal na alitan ang tinitingnang motibo sa likod ng malagim na pamamaslang.
Ayon sa pulisya, nasa 80 porsyento na ang takbo ng kanilang imbestigasyon matapos matukoy ang suspek at sa mga nakuhang CCTV footage sa lugar at sa mahalagang impormasyong nakuha mula sa naiwang cellphone ng biktima.
Mariing kinokondena ng Matalam PNP ang nasabing krimen lalo na’t nadamay ang isang inosenteng bata sa karahasan.
Kasalukuyan nang inihahanda ang mga dokumento para sa pagsasampa ng kaukulang ka*o laban sa mga salarin na tumakas patungo sa direksyon ng Barangay Kidama matapos ang pamamaril.
