Ang SINAG Online

12/03/2026

MISTAH SA AMBALLO: MAY PUSO AT GABAY NA HATID SA MGA G**O

Bumista sa Amballo Resettlement Elementary School si Cesario C. Mariano, Public Schools District Supervisor upang magsagawa ng Monitoring and Instructional Supervision through Technical Assistance with a Heart (MISTAH) at kumustahan kasama si Angelito Alipio, punongg**o.

Sa naturang pagbisita, sinamahan nila si Berlina V. Pascua sa pagbibigay ng teknikal na tulong sa mga g**ong nagsagawa ng pagpapakitang-turo. Kabilang dito si Rose Ann V. Dalafu, tagapayo ng Unang Baitang; Janeth Z. Mariano, tagapayo ng Ikalawang Baitang; at Genevieve D. Minas, g**o ng Ikaanim na Baitang.

Bahagi rin ng kanilang pagbisita ang pakikinig sa mga suliranin at pangangailangan ng mga g**o, mag-aaral, at ng buong paaralan. Nagbigay naman ng mga payo at mungkahi ang mga opisyal kung paano mas mabisang matutugunan at masosolusyonan ang mga ito.

Sa huli, nag-iwan ng positibong puna at papuri sina Mariano at Alipio hinggil sa mahusay na pagtuturo ng mga g**o at sa kapansin-pansing kalinisan at kaayusan ng paaralan.

Lubos namang nagpahayag ng pasasalamat si Berlina V. Pascua at ang mga g**o ng paaralan sa ibinigay na teknikal na tulong at gabay na makatutulong upang higit pang mapabuti ang kalidad ng pagtuturo at pagkatuto sa kanilang paaralan. #

23/10/2025

ISPORTS l APAT MAG-AARAL, HUMARUROT SA DISTRICT ATHLETIC MEET

Bilis at determinasyon, sandata ng mga batang atleta ng Amballo.

Umarangkada nang todo ang mga manlalaro mula sa Amballo Resettlement Elementary School (ARES) sa natapos na District Athletic Meet na ginanap sa Tuao South Elementary School noong ika-10 ng Oktubre.

Tampok sa karerang ito ang batang sprinter na si Shiela Mae L. Apdal, mag-aaral mula sa ikalimang baitang, na nasungkit ang unang pwesto sa 100-meter dash matapos tumakbo sa loob lamang ng 14.91 segundo, na siyang nagbigay sa kanya ng tiket patungo sa susunod na antas ng kumpetisyon.

“Hindi ko inaasahan na ako ang mangunguna sa 100m kaya masayang masaya ako dahil pasok na ako sa susunod na level,” pahayag ni Apdal matapos malaman ang resulta ng paligsahan.

Hindi rin nagpahuli ang kanyang mga kasamahan sa 300-meter run, kung saan umabot sa ikatlo at ika-apat na pwesto sina Akira Saphire D. Tangangeo at Loraine O. Yogyog, kapwa mag-aaral mula ika-apat na baitang at naiuwi naman ni Michelle M. Lunag, mag-aaral mula ika-amin na baitang ang ikalimang pwesto — patunay na hindi basta-basta ang ARES Team pagdating sa bilis at tibay ng loob.

Samantala, bagaman hindi nagkamit ng pwesto, buong tapang pa ring lumaban sina Ricky Boy M. Lunag, Jhanielle Dhane S. Pablo, Michael Klinton G. Panitio, Keziah Faith B. Pongtachon, at Edrian C. Obra. Ipinakita nila ang tunay na diwa ng sportsmanship at pagkakaisa ng kanilang paaralan.

Sa likod ng kanilang tagumpay ay ang walang sawang pagsasanay sa ilalim ng gabay ni Regina D. Tamayo, tagapayo ng ikalimang baitang, kasama ang iba pang mga g**o ng paaralan. Ayon sa kanila, mahalagang itanim sa mga mag-aaral ang disiplina, tiyaga, at teamwork sa bawat laban.

Dahil sa kanyang panalo, pasok na si Shiela Mae L. Apdal sa Bagabag Dual Meet na gaganapin sa Nobyembre 7.

Inaasahan na muli siyang magpapasiklab, dala ang bandera ng paaralan at ang inspirasyon sa kapwa batang atleta. #

📸 Caesar Ryan B. Padua, Pantaleon M. Cadeliña Jr., Imelda Q. Cornel at Genevieve D. Minas

✒️ Ang Sinag Team

23/10/2025

NGAYON l Panahon ng Pagsusulit

Masigasig na sumagot ang mga mag-aaral sa kanilang ikalawang markahang pagsusulit bilang bahagi ng pagtataya sa kanilang mga natutunan sa klase. Ipinapakita nila ang sipag at talinong kanilang pinaghirapan sa loob ng mga nagdaang buwan.

📸 Janeth Z. Mariano, Abegail C. Puno, Regina D. Tamayo at Genevieve D. Minas

15/10/2025

AGHAM AT TEKNOLOHIYA l StarStruck sa Siyensiya

“Twinkle, twinkle, little star…” — isang simpleng awitin ng pagkabata, ngunit sa araw na iyon, naging pambungad ito ng isang kakaibang karanasan sa agham. Hindi sa entablado, kundi sa loob ng isang dambuhalang dome ng karunungan — ang Science Planetarium ng Kagawaran ng Agham at Teknolohiya sa Nueva Vizcaya State University–Bayombong. Dito, sabay-sabay na kumislap ang mga mata nina Gng. Regina D. Tamayo at limang mag-aaral mula sa Amballo Resettlement ES (ARES), habang binubuksan sa kanila ang isang sansinukob ng kababalaghan.

Pagpasok pa lamang nila sa loob, tila napawi ang linya sa pagitan ng realidad at imahinasyon. Ang dilim ay napalitan ng milyun-milyong bituin na nagliliwanag sa kisame, animo’y nasa gitna sila ng kalawakan. Habang pinapanood nila ang mga planeta, konstelasyon, at mga zodiac signs, nagmistula silang mga munting astronomong tumitingala sa sarili nilang mga pangarap.

“Parang buhay ang mga bituin,” bulalas ni Shannon Kate M. Ojhomna, isa sa mga mag-aaral na dumalo, habang ang kanyang tinig ay may halong pagkamangha at tuwa. Ang bawat liwanag na kumikislap ay tila may kuwento—mga alamat ng mga diyos at diyosa, mga hugis ng hayop sa langit, at mga tala ng agham na matagal nang pinag-aaralan ng sangkatauhan. Sa bawat galaw ng kalawakan, mas lumalalim ang kanilang pagkaunawa sa hiwaga ng uniberso.

Para kay Gng. Tamayo, ang pagdalo sa planetarium ay higit pa sa pagtuklas ng mga bituin—ito ay pagtuklas ng kislap ng pagkatuto sa mga batang kasama niya. “Iba talaga kapag nakikita nilang buhay ang aral,” aniya, “ang science ay hindi lang nasa libro—nararamdaman, napagmamasdan, at higit sa lahat, nakakapukaw ng pagkamangha.”

Sa loob ng mahigit tatlumpong minuto, tila lumipad ang kanilang isipan lampas sa daigdig. Ang karanasang ito ay nagbigay sa kanila ng inspirasyon—na ang agham ay hindi kailangang puro pormula at eksperimento. Maaari itong maging isang himig na tulad ng Twinkle, Twinkle Little Star—simple sa simula, ngunit may lalim na kayang baguhin ang pananaw ng isang bata.

Paglabas nila ng dome, dala pa rin nila ang liwanag ng natutunan. Ang mga batang dati’y kumakanta lamang ng “how I wonder what you are” ay ngayon, tila may sagot na sa sariling tanong. Alam na nila kung paano kumikislap ang mga bituin, paano umiikot ang mga planeta, at paano nagbubuklod ang siyensiya at pagkamangha sa iisang langit ng karunungan.

Habang sila’y pauwi, sabay-sabay pa rin nilang binibigkas ang awitin—ngunit ngayon, hindi na ito basta kanta. Ito’y awit ng inspirasyon, awit ng pagtuklas. Sa puso ng bawat batang ARES na tumingala sa planetarium sa NVSU, may iisang paniniwala na umusbong: Ang agham ay liwanag, at sa bawat kislap ng bituin, may batang handang sumunod sa ningning nito. #






📸 Rhean H. Bilog, Regina D. Tamayo

✒️ Ang Sinag Team

14/10/2025

TINGNAN l Pagpupugay sa mga Tagapagturo

Ipinagdiwang ng Amballo Resettlement ES ang Araw ng mga G**o bilang pagkilala sa kanilang walang sawang gabay at inspirasyon sa mga mag-aaral.

Hindi lamang araw nila, kundi araw ng inspirasyon—para sa kanila na patuloy na nagbibigay liwanag sa bawat mag-aaral.

📸Rose Ann V. Dalafu, Quin Rosella M. Ojhomna

📝Ang Sinag Team

10/10/2025

EDITORYAL l HUWAG MANGAMBA, MAGHANDA

Sa bawat pag-uga ng lupa, nagigising ang ating kamalayan—na sa isang iglap, maaaring magbago ang takbo ng ating buhay. Nitong mga nakaraang linggo, sunod-sunod ang naitalang malalakas na lindol sa bansa katulad na lang ng 6.9 magnitude sa Bogo City, Cebu, 4.4 magnitude sa La Union, at kamakailan lamang, sa Davao Oriental na may 7.4. Muling pinaalalahanan ng mga pangyayaring ito ang bawat Pilipino na ang ating bansa ay nakatayo sa isang aktibong “Ring of Fire,” kung saan ang peligro ay palaging nariyan—ngunit maaari nating paghandaan.

Dito pumapasok ang kahalagahan ng earthquake drill. Ang mga ganitong pagsasanay ay hindi lamang simpleng aktibidad na isinasagawa para makumpleto ang isang rekwayrment; ito ay pagsasanay sa disiplina, kahandaan, at kultura ng kaligtasan. Sa bawat tunog ng sirena, natututo tayong maging alerto, kumilos nang maayos, at tumulong sa kapwa. Ang bawat drill ay pagkakataon upang ayusin ang mga kahinaan ng ating mga plano at palakasin ang ating tiwala sa sariling kakayahan sa oras ng panganib.

Ang lindol ay hindi natin kayang pigilan—ngunit ang pinsala at pagkawala ng buhay ay maaari nating maiwasan sa pamamagitan ng sapat na paghahanda. Ang paaralan, opisina, at komunidad ay dapat maging modelo ng kahandaan. Kapag ang mga bata ay naturuan ng wastong “duck, cover, and hold,” dala nila ito hanggang sa kanilang paglaki. Kapag ang mga g**o at lider ng barangay ay sanay sa mabilis at maayos na paglilikas, mas ligtas ang buong pamayanan.

Ang bawat drill ay paalala na ang kaligtasan ay hindi nakasalalay sa tadhana, kundi sa disiplina at pagkakaisa ng bawat isa. Sa gitna ng patuloy na pagyanig ng ating bansa, nawa’y maging matatag din ang ating diwa—handa, maalam, at mahinahon sa bawat pag-uga ng mundo.

Sa bawat tunog ng sirena, tandaan: hindi tayo dapat mangamba, kundi maghanda. #

📸 Rose Ann V. Dalafu, Regina D. Tamayo
📝Ang Sinag Team

10/10/2025

LATHALAIN l ALAB NG TAGUMPAY

“Ang bawat g**o ay apoy ng pag-asa — tahimik mang masunog, nag-iiwan ng liwanag sa bawat pusong kanyang tinuruan.”

Sa pagdiriwang ng Buwan ng mga G**o noong Oktubre 7 sa Tuao North Multi-purpose Hall, muling nasilayan ang ningning ng mga g**o ng Amballo Resettlement ES . Sila ang mga kandilang patuloy na nagbibigay liwanag, init, at inspirasyon—mga tagapag-alab ng pag-asa sa bawat batang Pilipino.

Sindi ng Kolektibong Tagumpay

Ang Amballo Resettlement Elementary School ay tila isang kandilang may maraming sindi—bawat g**o ay nag-aalay ng sarili upang sabay-sabay magningning. Sa kanilang sama-samang pagsisikap, ginawaran ang paaralan bilang Most Outstanding ELLN School Implementer, Most Outstanding Reading Program School Implementer, 3rd Runner-Up, Most Outstanding Project RDELC School Implementer, at 3rd Runner-Up, Most Outstanding Feeding Program School Implementer. Ang mga parangal na ito ay patunay ng pagkakaisa at alab ng kanilang puso sa serbisyo—mga g**o na handang magliyab para sa kinabukasan ng kabataan.

Gabayan ng Alab at Talino

Berlina V. Pascua
Kung ang kandila ay may mitsa, si Berlina V. Pascua ang nagsisindi ng inspirasyon at talino sa buong paaralan. Bilang Champion ng Project RDELC School Head Implementer, 1st Runner-Up, Most Sustained ELLN Program School Head Implementer, 2nd Runner-Up, School Head of Best Performing School, at 2nd Runner-Up, Most Innovative TIC, siya ay tunay na haligi ng pamumuno. Sa kanyang 10 taong tapat na serbisyo, pinatunayan niyang ang isang lider ay hindi kailangang malakas sumigaw upang marinig—sapat na ang tahimik na sindi ng dedikasyon upang sindihan ang puso ng iba.

Sindi ng Unang Hakbang

Rose Ann V. Dalafu
Si Rose Ann V. Dalafu ang unang sindi sa mahabang paglalakbay ng mga batang natututo. Sa pagiging Champion, Most Outstanding ELLN Implementer, 1st Runner-Up, Most Outstanding Grade 1 Teacher, at 3rd Runner-Up, Most Innovative Teacher, tinutulungan niyang mabuksan ang mga pinto ng kaalaman sa murang edad. Sa kanyang limang taon ng paglilingkod, pinatunayan niyang ang unang liwanag sa buhay ng bata ay maaaring magmula sa isang g**ong marunong magpainit ng loob at magtanim ng pangarap.

Siklab ng Karunungan

Genevieve D. Minas
Siklab ng karunungan sa larangan ng pagbasa, 'yan si Genevieve D. Minas . Bilang Champion, Most Outstanding Reading Program Implementer at 2nd Runner-Up, Most Innovative Teacher, ginising niya ang diwa ng pagbabasa sa mga mag-aaral sa pamamagitan ng malikhaing pamamaraan. Ang kanyang dedikasyon ay parang apoy na dahan-dahang lumalaganap—sa bawat aklat na binubuksan, may batang natututo at nagiging ilaw sa iba.

Apoy ng Pagtitiyaga

Charlie B. Tode
Tahimik ngunit matatag, si Charlie B. Tode ay apoy ng pagtitiyaga. Bilang 2nd Runner-Up, Most Outstanding Grade 3 Teacher, siya ay patunay na ang pagtuturo ay hindi kailangang maingay upang maging makabuluhan. Ang kanyang araw-araw na pagsusumikap sa loob ng silid-aralan ay tulad ng apoy na patuloy na nagliliyab—hindi upang mapansin, kundi upang magbigay init sa mga batang ginagabayan niya.

Sinag ng Inspirasyon

Regina D. Tamayo
Si Regina D. Tamayo ay sinag ng inspirasyon para sa mga mag-aaral sa ika-limang baitang. Bilang 3rd Runner-Up, Most Outstanding Grade 5 Teacher, ipinakita niya ang tunay na diwa ng dedikasyon. Sa bawat araling kanyang itinuturo, may kaalamang ipinapasa at pusong pinapainit—tulad ng sinag ng kandilang patuloy na kumikislap kahit sa gitna ng hamon.

Mga Kandilang Hindi Natitinag

Ang mga g**o ng Amballo Resettlement Elementary School ay mga kandilang patuloy na nag-aalab—mga tagapagdala ng pag-asa at tagapagsindi ng pangarap. Sa bawat karangalang natanggap nila, mas tumitibay ang kanilang paninindigan: ang magturo ay hindi trabaho, kundi misyon.

Sa bawat patak ng pagod at sa bawat sigla ng pagtuturo, patuloy silang nag-iiwan ng marka—mga g**o na hindi lang nagbibigay liwanag, kundi sila mismo ang dahilan kung bakit may liwanag ang kinabukasan. #




📸 Cesario C. Mariano, Rose Ann V. Dalafu

✒️ Ang Sinag Team

02/10/2025

Maghanda at manatili po tayong alerto sa maaaring epekto ng bagyo.

01/10/2025

Kindergarten - walang pasok
Grade 1 hanggang Grade 6 - may pasok

01/10/2025

LATHALAIN l ARES INKspirado ✒️

Parang mga binhing itinanim sa tigang na lupa, ang mga batang manunulat ng Amballo Resettlement ES ay umusbong sa kabila ng matinding init ng ensayo at bigat ng pagod. Sa bawat patak ng pawis at puyat na gabi, tumubo ang tapang, at ngayong araw, sa entablado ng District Schools Press Conference sa Tuao South, Bagabag, Nueva Vizcaya, sumibol ang kanilang tagumpay na tila bulaklak na sabay-sabay namukadkad.

Hindi biro ang kanilang dinaanang landas. May mga gabing tila walang pahinga, paulit-ulit ang pagsusulat hanggang manlamig ang tinta ng bolpen, at may mga oras na halos mawalan ng boses sa walang humpay na pagbasa. Ngunit gaya ng mga mandirigmang handang lumaban, hinarap nila ang laban na may tapang, sabayan man ng kaba at pangamba.

At heto ang mga bituing nagningning sa gitna ng paligsahan:

🥈 Zyriene Kaith B. Gad-o-an – Pagwawasto at Pagsulat ng Pamagat (Filipino)
Tagapayo: Rhean H. Bilog at Genevieve D. Minas

🥈 Ysha Mae M. Maddawat – Pagsulat ng Balita (Filipino)
Tagapayo: Genevieve D. Minas

🏅 (4th) Clouie Monic B. Bala – Pagsulat ng Pang-Agham at Teknolohiya (Filipino)
Tagapayo: Abegail C. Puno

🏅 (4th) Quin Rosella M. Ojhomna – Photojournalism (Filipino)
Tagapayo: Rose Ann V. Dalafu

🏅 (4th) Veronica B. Valdez – Pagwawasto at Pagsulat ng Pamagat (Filipino)
Tagapayo: Regina D. Tamayo

🏅 (5th) Mitch Lorein R. Estoque – Pagwawasto at Pagsulat ng Pamagat (Filipino)
Tagapayo: Charlie B. Tode

🏅 (5th) Michelle M. Lunag – Kartung Editoryal (English)
Tagapayo: Regina D. Tamayo

Ngunit ang tagumpay ay hindi lamang nakikita sa medalya at sertipiko. Ang tunay na panalo ay ang tibay ng loob na ipinakita ng lahat ng kalahok. Kasama sa kanilang kwento ang mga kapwa mandirigmang lumaban nang buong puso:

Ria Lhen L. Valdez at Shiela Mae L. Apdal (Lathalain – Filipino)

Keziah Faith B. Pongtachon, Almira Jhane M. Lunag, at Joyce Kate B. Ocampo (Kartung Editoryal– Filipino)

Ky-Ann Khate P. Sansano (Pagsulat ng Balita – English)

Bagama’t wala silang iniuwi na ranggo, ang kanilang presensya at pakikibaka ay bahagi ng binhi ng pag-asa na tiyak na uusbong pa sa mga susunod na taon.

Sa dulo, ang ARES ay nag-iiwan ng isang mahalagang aral: ang pagsusulat ay hindi lamang tunggalian ng salita, ito’y laban ng puso at diwa. At ngayong araw, pinatunayan ng mga batang manunulat na kahit maliit na paaralan, kayang maglabas ng malalaking tinig na magpapatuloy sa pag-ukit ng kasaysayan. #

📸 Rhean H. Bilog, Regina D. Tamayo, Genevieve D. Minas

✒️ Ang Sinag Team

28/09/2025

TINGNANl ARES Sa Entablado, Sigla'y Todo-Todo

Umindak sa tugtuging makabayan ang mahigit 50 piling mag-aaral ng Amballo Resettlement ES sa pagtatanghal ng ground demonstration sa ginanap na DepEd Day bilang pagdiriwang ng Pabbalat Festival, Capt. Jose P. Castillo Gymnasium, Bagabag, Nueva Vizcaya, ika-27 ng Setyembre.

Sa saliw ng remix na “Kanta Pilipinas” ni Lea Salonga at “Piliin Mo ang Pilipinas” ni Angeline Quinto, ipinakita ng mga mag-aaral ang kanilang husay, gilas, at sabayang galaw na talaga namang pumukaw ng palakpakan mula sa mga manonood.

"Napakaganda ng sayaw nila. Sabay-sabay at talagang makikita na ibinigay nila ang kanilang best," komento ni Michelle Bala, magulang mula ikalimang baitang tungkol sa presentasyon ng mga mag-aaral.

Katuwang sa masayang pagdiriwang ang iba pang paaralan mula sa Bagabag I at Bagabag II District. Dumalo rin si Acting Mayor Nestor M. Sevillena na nagbigay ng mensahe tungkol sa kasayahan at pagkakaisa bilang diwa ng kapistahan.

Sama-sama ang mga g**o, mag-aaral, at magulang sa pagtitipon na tunay na nagpakita ng kulay, talento, at pagkakaisa ng Bagabag. #

📸 Rose Ann V. Dalafu, Rhean H. Bilog, Rochelle P. Belmis

✒️ Ang Sinag News Team

25/09/2025