17/06/2025
Bismillâhir Rahmânnir Rahîm - AlhamduLillâhi Rabbil ‘âlamîn - A’ssalâtu Wassalâmu ‘alâ Rasûlillâh wa’alâ âlihi waa’shâbihi ajmaîn.
Mahuli nagsabda in Nabi Muhammad Sallallâhu Alayhi Wasallam:
سَبْعَةٌ يُظِلُّهُمُ اللَّهُ في ظِلِّهِ، يَومَ لا ظِلَّ إلَّا ظِلُّهُ: الإمَامُ العَادِلُ، وشَابٌّ نَشَأَ في عِبَادَةِ رَبِّهِ، ورَجُلٌ قَلْبُهُ مُعَلَّقٌ في المَسَاجِدِ، ورَجُلَانِ تَحَابَّا في اللَّهِ اجْتَمعا عليه وتَفَرَّقَا عليه، ورَجُلٌ طَلَبَتْهُ امْرَأَةٌ ذَاتُ مَنْصِبٍ وجَمَالٍ، فَقَالَ: إنِّي أخَافُ اللَّهَ، ورَجُلٌ تَصَدَّقَ، أخْفَى حتَّى لا تَعْلَمَ شِمَالُهُ ما تُنْفِقُ يَمِينُهُ، ورَجُلٌ ذَكَرَ اللَّهَ خَالِيًا فَفَاضَتْ عَيْنَاهُ.
الراوي : أبو هريرة | المحدث : البخاري | المصدر : صحيح البخاري
الصفحة أو الرقم: 660 | خلاصة حكم المحدث : [صحيح]
التخريج : أخرجه البخاري (660)، ومسلم (1031)
Kulang labi in mahna: ( Pitu tumpukan pasilungun sila sin Allâh ha lambung Niya, ha adlaw yruun na lambung dugaing ha lambung sin Allâh:
1- al-Imâmul ‘âdil,
2- Iban batah bahgu simulig ha pag-ibâdatan pa Tuhan niya,
3- Iban usug gimagantung (simusugpat) in atay niya pa kamasjid-masjiran,
4- Iban duwa usug (tao) nag lasa sila ha karnah sin Allâh, naghambuuk iban naglayui ha karnah sin Tuhan,
5- Iban hambuuk usug tiyawag sin hambuuk babae kawasahan iban lingkatan , sah in hipamûng niya mabugah ako pa Allâh,
6- Iban usug nagsadakkah ha kasipukan sambil dih kaingatan sin lawa niya in kiyapag napaka sin tuu niya,
7- Iban usug tutug in pag dhikir pa Allah ha kasipukan sambil mag tûh in luhah ha mata niya.
Rîwayat sin Imam Muslim iban Imam Bukhâri Rahimahumallâh.
-In adlaw Qiyâmat adlaw landuh in kasigpitan, adlaw hipuh sin kararamagan, adlaw pasuukun pa mga ô sin îpun in suga, sartah landuh in pasuh dumagpak maun kanila.
Sagawah misan biyah na hayan in jumatu ha adlaw yan, biyaytaan sin Rasûlullâh Sallallâhu Alayhi Wassalam in mga ummat Niya sin habal marayaw, sin awn da isab pasilungun sin Mahâsutsi Allâh ha lambung Niya, amuin yruun na kasilungan ha masa yaun puas sin Lambung Niya.
-Ha Hadith Mulya ini nag sabda in Nabi Muhammad Sallallâhu Alayhi Wassalam: Siyabbut Niya in pitu tumpukan mânusyah madawhat nila in Nihmat sin Allâh Subhânahû Watâ’ala, makasilung sila ha lambung ha adlaw yadtu, amuin yruun na kalawagan nila lambung malaingkan lambung da kuman sin Allâh, in lambung pagbahasahun dii amuna in lambung sin Arash Sin Allâh, biyah sin ha Hadith dimatung:
Rîwayat sin Imam Ahmad iban Imam Tirmidhiy Rahimahumallâh
مِن حديثِ أبي هُرَيرةَ رَضيَ اللهُ عنه، عن النبيِّ صلَّى اللهُ عليه وسلَّمَ، قال: ((مَن نفَّسَ عن غَريمِه أو محَا عنه، كان في ظِلِّ العرشِ يومَ القِيامةِ))
Daing kan Abû Hurayra Radhiyallâhu ‘anh daing ha Nabi Muhammad Sallallâhu Alayhi Wassalam: laung niya (( Hisiyu-siyu in tao nakapahayang ha tao nangutang kaniya, atawa amuin liyawah niya na in utang sin tao kaniya, Hati niya yruun niya na piyapagbayad, na in kiya awnan niya makasilung ha lambung sin Arash ha adlaw qiyâmat.
1- In panagnaan daing ha pitu tumpukan nasabbut, amuna in al-Imâmul ‘âdil.
Siya na in nakurah âdil ha raayat niya, amuin piyapalihalah niya in hâq kapatut sin raayat niya iban iyaayuput niya in kahalan nila, iban piyamamarintahan niya sila ha Sarah sin Allâh, iban piyalindug niya in kahâlan pag âkhirat iban pag dunya.
2- In hikaruwa nasabbut amuna in Batah bahgu simulig ha tuyuh nag ibadat pa Tuhan niya, tutug in pagtaat niya ha diyaakan sin Allah iban tutug in panglayui niya ha liyangan kaniya.
* Tartantuh ha batah bihaini in nasabbut ha Hadith. Karnah landuh in hunit iban sigpit ha batah bahgu himinang sin diyaakan ha parsababan taud sin mahsiyat atawa amuin kaiinginan sin napsu pa mangih, sagawah bang siya tutug ha pag ibadatan pa Allah na manunjuki sin sampurnah in kabugah niya pa Allah.
3- In hikatû nasabbut, amuna in usug gimagantung simusugpat in atay niya pa kamasjid-masjiran, siya na in landuh in sûb atawa bayah pa kamasjid-masjiran, madaran atawa tutug siya ha lawm sin masjid, karnah tumunay sin Sambahayang Farduh jamaah iban timatagad siya daing ha wakto pa wakto.
Biyah saparti in atay niya ilaw daing ha mga ilaw sin masjid.
4- In hika upat nasabbut ha Hadith, amuna in duwa tao naglasa ha karnah sin Allah, nag lasa karnah pangagad atawa pagtaat Kaniya bukon naglasa awn puhungun ha pagdunya. Amuin in kiyaawnan sin pag lasa nila iban pag layui nila yruun maksud dugaing bang mayan mapakuyag in Mahâsutsi Allâh.
5- In hika lima nasabbut, amuna in hambuuk usug tawagun mag mahsiyat sin hambuuk babae lingkatan, balkanan, altaan iban kawasahan sagawah in hipamûng niya mabugah ako pa Allâh, In pag bissara niya mabuhgah ako pa Allah bukun hinang hinang niya atawa bugah niya ha unu-unu na, sagawah in bissara niya yaun guwah daing ha lawm pangatayan niya, karnah bugah niya tuud pa Allah, misan pa biyah na hâdto babae in timawag kaniya amun babae yaun na kaniya katan in kasusuwakan sin napsu, sah masi ra in kabugah niya pa Allah, hati niya awn sipat niya biyah sin sipat sin mga Siddîqûn.
6- In hika unum amuna in usug nag sadakka siya, Sadakka sunnat.
Manjari in sadakka niya yaun tiyapuk niya ha mayran ha yruun siya nagpaingat, in tandah sin pagmasipuk niya ha sadakka niya, bang awn sa rapat sambil baran niya dih niya na paingatun sin nagsadakka siya. Hati niya in dyuhal sin lima niya dampal pa tuu yruun na pangingat sin lima niya dampal pa lawa, bimahna tulus ikhlas tuud in kakahinang niya yaun.
7- In hika pitu nasabbut ha Hadith, amuna in usug nag dhikir (nanumtum siya pa Allâh ) labay daing ha dilah niya atawa daing ha atay niya, sambil ha lugay niya magjikir dih niya na pagkananaman mag tûh na in luhah daing ha mata niya.
-Siya na in nag dhikir isa-isa ha yruun nakaingat iban nakakitah kaniya tuput in Allah.
Allâhu Ta’âla ‘a’lâ wa’a’lam
✍🏻Mânuntut ‘Elmu’
