08/08/2025
Alam N'yo Bang Ang Pinabayaang JO at Contractual ang Unang Nagpawendang sa Utak ni Governor Amy Alvarez?
Hindi si Governor Amy Alvarez ang may sala. Subalit parang multong walang kapatawaran, patuloy na sinusundan ng anino ng kapabayaan ang kasalukuyang administrasyon. Sa likod ng mga hindi pa rin nasuswelduhang Job Order (JO) at Contractual employees, ay ang garapal at garapalang legacy ng isang pamunuan na ginamit ang kaban ng bayan para sa pansariling kapakanan—at pagkatapos ay iniwan ang responsibilidad sa iba.
Ang totoo: hindi si Alvarez ang nag-hire sa mga empleyadong ito. Sa gitna ng mainit na kampanya noong halalan 2025, nagkandaugaga sa pangangampanya ang mga kalaban ni Amy Alvarez gamit ang pera ng bayan, nag-hire ng sandamakmak na JO at contractual workers sa pag-asang masusuklian ito ng boto mula sa kanila at sa kanilang mga pamilya. Isang garapalang porma ng vote-buying disguised as employment.
Ngunit pagkatapos ng halalan—na kanilang matinding pagkatalo ay resulta ng sariling kapabayaan at kahinaan sa pamumuno—lumutang ang mas malaking eskandalo: wala palang sapat na pondo para sa mga taong ipinangakong may trabaho. Walang plantilla, walang budget, walang malinaw na mandato—isang malaking panloloko sa mga taong umaasa.
Ang masaklap? Ang bagong liderato ni Governor Amy Alvarez ang ngayon ay nagdurusa. Ulo niya ang sumasakit, pangalan niya ang nadadamay, at pondo ng kanyang administrasyon ang posibleng gamitin upang takpan ang butas na iniwan ng isang walang pusong lider.
Kung tutuusin, pwedeng hindi bayaran ang mga tauhan nila. Bakit? Dahil wala namang legal na basihan, walang malinaw na pondo, at walang kontrata at supporting papers na maayos na sinusunod. At kung susundan ang tamang proseso, maaaring kasuhan pa mismo ang mga nagpabaya ng breach of contract, grave misconduct, o malversation—sapagkat malinaw na ginamit nila ang pamahalaan para sa pansariling layunin, at nag-iwan ng bangungot sa bagong pamunuan.
Ang resulta? Nakahold ang hiring ng mga bagong empleyado na sana'y tutulong sa direksyon ng bagong administrasyon. Imbes na maka-move on agad si Governor Alvarez at masimulan ang totoong serbisyo-publiko, kailangan muna niyang ayusin ang basurang iniwan ng mga taong walang malasakit sa kinabukasan ng lalawigan. Baka October pa maka-hire. Naku.
Ito ang tunay na mukha ng kapabayaan at makasariling pamumuno. At ang mas malala, iniwan nila ito na parang walang nangyari, habang ang mamamayan at ang bagong administrasyon ang pinagbabayad ng kanilang kapabayaan.
