21/05/2025
Ang Kagamhanang Panlalawigan sa Sugbo mipakita og P310 bilyon nga kantidad sa mga kabtangan ug P6.015 bilyon nga cash-on-hand sa wala pa ang transisyon padulong sa umaabot nga administrasyon.
Sa usa ka post gikan sa opisyal nga social media page sa Kagamhanang Panlalawigan sa Sugbo niadtong Martes, ang mogikan nga Gobernadora sa Sugbo nga si Gwendolyn Garcia nagpahigayon og miting uban ang mga incoming ug outgoing nga miyembro sa Provincial Board niadtong Mayo 20, 2025.
Gipahibalo ni Garcia nga ang Kagamhanang Panlalawigan nagpabiling walay utang, nga walay bisan unsang pautang gikan sa mga institusyon pinansyal. Gi-emphasize usab niya nga ang Sugbo nagpabiling labing adunahan nga probinsya sa tibuok nasud.
Gitakda nga itunol ni Garcia ang pagpangulo sa probinsya ngadto kang Governor-elect Pamela Baricuatro, usa ka bag-ong nawong sa politika, sa Hunyo 30.
