23/09/2025
USWAG ILONGGO REP. JOJO ANG, INIULAT NA MISMONG NAG-UTOS KAY ENGR. CALALO NA MANGHINGI NG DONASYON PARA KAY CONG. LEVISTE
Lumitaw ang mas mabigat na alegasyon laban kay Uswag Ilonggo Partylist Rep. James “Jojo” Ang Jr. matapos ihayag ni Batangas 1st District Engineer Abelardo Calalo na mismong si Ang ang nag-utos sa kanya na mangolekta ng tinaguriang “donasyon” mula sa mga kontratista sa Batangas.
Sa kanyang counter-affidavit na inihain sa Senate Blue Ribbon Committee at sa mismong pagharap sa harap ni Senator Loren Legarda, sinabi ni Calalo na malinaw na iniutos ni Rep. Ang ang paghingi ng kontribusyon mula sa mga kontratista upang umano’y maipasa kay Batangas 1st District Congressman Leandro Leviste.
“Mismong si Congressman Jojo Ang po ang nagsabi sa akin na kumuha ng donasyon sa mga kontratista at ibigay ito kay Cong. Leviste,” pahayag ni Calalo sa kanyang salaysay.
Ayon kay Calalo, ang perang nakuha sa kanyang pagkakaaresto ay hindi suhol para kay Leviste, kundi bahagi ng tinatawag na donation scheme na ipinag-utos ni Ang. Ang rebelasyong ito ay nagdulot ng malaking katanungan at pagdududa, lalo na nang aminin niyang matapos ang kanilang pag-uusap ay agad binura ni Rep. Ang ang kanyang mga mensahe sa Viber chat — isang hakbang na nagpalakas sa hinalang may tinatago sa naturang transaksyon.
Samantala, kinumpirma rin ng mga kontratistang sina Sara at Curlee Discaya na si Rep. Ang ang isa sa mga mambabatas na umano’y nakinabang mula sa bahagi ng pondo ng mga flood control project, bagay na sumusuporta sa pahayag ni Calalo.
Ang pagkakatugma ng testimonya nina Calalo at ng mag-asawang Discaya ay nakikita ngayon bilang mahalagang ebidensya laban kay Rep. Ang, na mas lalong nag-uugnay sa kanya sa isyu ng anomalya sa mga flood control projects.
Kasabay nito, iginiit ng mga Discaya ang kanilang kahandaang magsilbing state witnesses at humiling ng proteksyon para sa kanilang pamilya, dahil na rin sa bigat ng kanilang isiniwalat laban sa kongresista.
Sa puntong ito, higit pang lumalakas ang panawagan para sa masinsinang imbestigasyon, lalo’t mismong si Rep. Ang umano ang nag-utos kay Engineer Calalo sa harap ng isang senador na mangalap ng pondo mula sa mga kontratista para sa kapwa kongresista.
