https://www.facebook.com/682721441589100/

Ang Iskolar, Estrella Road, Barangay XIV, Victorias City (2025)

17/08/2025

Sapat na ba ang inyong ni-review ngayong katapusan ng linggo?

Ihanda ang inyong kaalaman at tiwala sa pagsagot sa nalalapit na 𝗨𝗻𝗮𝗻𝗴 𝗠𝗮𝗿𝗸𝗮𝗵𝗮𝗻𝗴 𝗣𝗮𝗴𝘀𝘂𝘀𝘂𝗹𝗶𝘁 para sa taong panuruan 2025-2026, ngayong 𝗔𝗴𝗼𝘀𝘁𝗼 𝟭𝟵, 𝟮𝟬, 𝗮𝘁 𝟮𝟮.

Suriin lamang mula sa tagapayo ang inyong exam schedules.

Good luck, mga ka-Isko!

-

Pag-aanyo ni Sean Montevirgen

15/08/2025

𝗘𝗗𝗨𝗞𝗔𝗦𝗬𝗢𝗡 | DepEd Pinababa ang Bilang ng mga Low-Emerging Readers

Ibinaba ng Department of Education (DepEd) mula 51,537 patungo sa 1,871 ang bilang ng mga Grade 3 na tinaguriang “low-emerging readers” matapos paigtingin ang mga programang nakatuon sa pagbasa gaya ng Learning Recovery Program (LRP) at Bawat Bata Makababasa Program (BBMP) ngayong Lunes, Agosto 11.

Iniulat ng DepEd ang malalaking pag-unlad sa rehiyon ng Northern Mindanao, kung saan tumaas mula 673 hanggang 6,588 ang marunong bumasa sa Grade 1 (Mother Tongue), mula 719 hanggang 6,398 sa Grade 2 (Filipino), mula 539 hanggang 6,703 sa Grade 3 (Filipino), at mula 355 hanggang 5,100 sa Grade 3 (English).

Natulungan ng LRP ang kabuuang 50,000 mag-aaral, habang umabot sa 42,000 ang natulungan ng BBMP, at nilalayon ng DepEd sa ilalim ng Republic Act No. 12028 o Academic Recovery and Accessible Learning (ARAL) Program na palawakin pa ang mga inisyatibang ito upang tuluyang masugpo ang mababang kasanayan sa pagbasa at matiyak ang pantay na akses sa edukasyon para sa lahat ng bata.

Pinalakas ng ahensya ang pagpapatupad ng mga programa matapos ilabas ng 2021 World Bank Report na siyam sa bawat sampung batang Pilipino edad sampu pababa ay hindi marunong bumasa.

Nagpakita ng datos ang Philippine Statistics Authority noong 2024 na halos 19 milyong nagtapos ng high school ang kabilang sa mga marunong bumasa ngunit nahihirapang umunawa ng binabasa.

Iginiit ng DepEd na patunay ang mga resulta na epektibo ang kanilang mga hakbang sa pagbibigay ng kalidad at inklusibong edukasyon, at hinimok ang patuloy na suporta ng mga lokal na pamahalaan, g**o, at magulang sa pagpapaunlad ng kasanayan sa pagbasa ng kabataang Pilipino.

-

Balita ni Trixie Zamoras
Larawan mula sa Philstar

14/08/2025

𝗡𝗔𝗦𝗬𝗨𝗡𝗔𝗟 l Paghihigpit sa Seguridad ng mga Paaralan sa Bansa Isinulong ng DepEd

Nag-isyu ang Department of Education (DepEd) nitong Biyernes, ika-8 ng Agosto, ng bagong memorandum na naglalayong higpitan ang seguridad ng mga paaralan sa buong bansa para sa kaligtasan ng mga mag-aaral at kaguruan.

Bilang agarang tugon sa nakababahala na insidente ng pamamaril na naganap nitong ika-7 ng Agosto sa isang paaralan sa Nueva Ecija na nagdulot ng kritikal na kalagayan sa biktima.

Nag-uutos ang memorandum sa lahat ng paaralan na magpatupad ng mas mahigpit na mga hakbang upang maiwasan ang mga insidente ng karahasan at pang-aabuso. Nakapaloob sa kautusan ang ilang mahigpit at ligtas na hakbang, kabilang na ang pagbabawal sa mga ilegal na kagamitan, pag-iinspeksyon ng mga gamit, at mahigpit na pagkontrol sa paglabas at pasok ng mga mag-aaral.

Alinsunod sa DepEd Order (DO) No. 40, serye 2012 na "DepEd Child Protection Policy", binigyang-diin ni Education Secretary Sonny Angara na mahigpit na ipinagbabawal ang karahasan, pang-aabuso, at pagdadala ng mga mapanganib na bagay tulad ng sandata, droga, at materyal na pornograpiko sa paaralan.

-

Balita ni Lorraine Bedra
Larawan mula sa DepEd Website

11/08/2025

𝗣𝗔𝗚𝗗𝗜𝗥𝗜𝗪𝗔𝗡𝗚 | Selebrasyon ng Buwan ng Wika, Nagpatuloy

Nagpatuloy sa kasiyahan ang mga mag-aaral at kaguruan paggunita sa selebrasyon ng Buwan ng Wika ngayong ika-11 ng Agosto, Lunes, sa Covered Court ng Negros Occidental National Science High School.

Nagpakitang-gilas sa interpretatibong sayaw ang mga kalahok mula sa nakaraang clusters na Eskayan, Karaw, Alta, at Karolano, na binubuo ng mga mag-aaral mula sa baitang pito hanggang 12.

Pinangunahan bilang punong-abala nina G. Kenrick Chavez at Bb. Eloija Mhyr Mata mula sa Gintong Hiyas ang panandaliang programa.

Ipagpapatuloy ang kapiyestahan sa pagdaos ng Buwan ng Wika sa susunod na Lunes tampok ang mga katutubong kasuotan.

-

Balita ni Ma. Alysa Rosales
Larawang kuha ni Craig Gayatin

05/08/2025

𝗣𝗔𝗚𝗗𝗜𝗥𝗜𝗪𝗔𝗡𝗚 | ‎Buwan ng Wikang Pambansa 2025, Binuksan
‎
‎Idinaos ang pagbubukas ng Buwan ng Wikang Pambansa 2025 taglay ang temang “Paglinang sa Filipino at Katutubong Wika: Makasaysayan sa Pagkakaisa ng Bansa” nitong Agosto 4, Lunes, sa Negros Occidental National Science High School – Covered Court.
‎
‎Pumukaw ng sigla ang pagpapakilala ng mga cluster leaders mula sa Alta, Eskayan, Karolano, at Karaw, kalakip ang kani-kanilang masisiglang cheer na nagpasigla sa mga mag-aaral matapos ang flag raising ceremony.
‎
‎Itinampok din ang pagsasatao ng mga kandidato mula sa iba’t ibang cluster, na sinundan ng isang trivia segment kung saan aktibong nakilahok ang bawat pangkat sa pagsagot ng mga tanong ukol sa makasaysayang naganap sa bansa.

Umarte sa entablado ang mga kinatawan ng iba’t ibang cluster nang magpakitang gilas sa aktibidad na pagsasatao.
‎
‎Naghatid naman ng mensahe si Kate Sobremesana, pangulo ng Gintong Hiyas, kasama ang kanilang tagapayo na si Bb. Janish Bangcayao, bilang pagbibigay-inspirasyon sa mga kalahok at pagtatampok sa kahalagahan ng wikang pambansa.

-

Balita ni Xyra Lape
Larawang kuha ni Alhea Saribano

05/08/2025

𝗟𝗢𝗞𝗔𝗟 | Lungsod ng Victorias, Pinarangalan ang Ilang Barangay

Pinarangalan ang Barangay II at Barangay VI-A ng Pamahalaang Lungsod ng Victorias sa ginanap na regular na flag-raising ceremony noong ika-apat ng Agosto sa City Public Plaza, matapos nilang mapabilang sa mga tumanggap ng Seal of Good Local Governance for Barangay (SGLGB).

Ginawaran ang dalawang barangay dahil sa kanilang kahusayan sa pamamahala, partikular sa larangan ng transparency, financial administration, disaster preparedness, at social protection.

Idinaos ang seremonya sa pangunguna ni Alkalde Abelardo Bantug III, katuwang si Bise Alkalde Derek Palanca, kasama ang ilang opisyal ng pamahalaang lungsod. Layunin ng pagtitipong ito na kilalanin at ipagdiwang ang mga natatanging kontribusyon ng mga indibidwal at sektor sa pag-unlad ng Lungsod ng Victorias.

Tumanggap ng pagkilala ang ilang indibidwal para sa kanilang tagumpay sa larangang akademiko at propesyonal. Kabilang sa mga pinarangalan sina Dr. Joseph Lyndon Lapating, Dr. Richard Garlitos, G. Romel Balboa, G. Jan Loyd Abellano, G. Radi Raze Garaygay, at Bb. Almera Valladolid, bilang pagkilala sa kanilang mga natamong karangalang gaya ng Magna Cum Laude, Best in Research Paper, at pagtatapos ng doktorado.

Iginawad ang mga Loyalty Award sa piling kawani ng iba't ibang tanggapan bilang pagkilala sa mahabang taon ng dedikadong serbisyo sa pamahalaang lungsod. Kabilang sa mga pinarangalan sina Joy Famini ng City Information Office at Chitalisa Valenciano ng City Health Office para sa kanilang 25 taon ng panunungkulan, habang ginawaran si Jerry Alapto ng General Services Office para sa kanyang 15 taon ng tapat na paglilingkod.

Ipinakilala rin nang pormal ang mga bagong halal na kinatawan ng iba't ibang komite sa ilalim ng City Human Resource Management Office, bilang bahagi ng patuloy na pagpapaunlad sa serbisyong pampamahalaan.

Layon ng pamahalaang lungsod na patuloy na bigyang-pugay ang mga mamamayang nagsisilbing huwaran sa kanilang larangan, bilang bahagi ng mas malawak na hangaring itaguyod ang mabuting pamamahala at ang pag-unlad ng komunidad.

-

Balita nina Trixie Zamoras at Lorraine Bedra
Larawan mula sa FB Page ng Victorias City Information Office

05/08/2025

𝗕𝗨𝗪𝗔𝗡 𝗡𝗚 𝗪𝗜𝗞𝗔𝗡𝗚 𝗣𝗔𝗠𝗕𝗔𝗡𝗦𝗔 | Sagisag ng Bandila

Sa unang tingin, isa lamang itong tahimik na hugis, isang parihabang tila walang sigaw at kilos.

Ngunit sa bawat sulok, may lihim na panata. Sa isang payak na parihaba ay nananahan ang apat na kulay na sumisimbolo sa ating katauhan na hinubog ng ating kasaysayan. Nilulukob ito ng puting liwanag na tanda ng pagkakaisa, paggalang, at paniniwalang pantay-pantay ang lahat sa ilalim ng iisang bandila. Ang makinang na dilaw na sumasalamin sa ating pinagmulan at ang kumakatawan sa likas nating pinanggalingan. Sa banayad na bughaw ay matatanaw ang humihimlay na kapayapaan, katarungan at katotohanan. Sa pulang umaalab na dinadaluyan ng katapangan at mga dugong inialay sa bayan.

Hindi lamang ito isang watawat bagkus isa itong palatandaan at bakas ng kasaysayan na ating pinanghahawakan.

Pagmamahal sa bayan ay hindi lamang naipababatid sa mga salita bagkus nararapat ding maipakita sa kilos. Kung kaya, tuwing buwan ng Agosto, sama-sama nating ipagdiriwang ang Buwan ng Wika bilang pagkilala sa papel ng wikang Filipino sa pagbubuklod ng sambayanang Filipino.

Kaluluwa ng bansa ang wika. Sa bawat salitang sinasambit, muling nabubuhay ang kasaysayang pilit pinawi ng panahon. Ito ang haliging pinag-uugatan ng ating pagkakakilanlan, isang tinig na nagbubuklod sa puso ng bawat Filipino. Sa gitna ng pagbabago, nananatili itong ilaw na gumagabay sa ating paglakbay bilang isang bayan.

Ikaw, ako, tayo. Sa ating mga palad, nakaukit ang dangal ng ating lahi. Sa pamamagitan ng ating wika, nabubuhay ang diwa ng bayan. Hindi tayo ang lumikha bagkus ang wika ang siyang patuloy na lumilikha sa atin. Sa bawat bigkas at salita ay katumbas ng kwento, sigaw, at katahimikan ng ating lahi.

Kaya sa pagwagayway ng bandila at bawat bigkas ng sariling wika nawa’y alalahanin natin na ang ating pagkatao ay nakaugat sa iisang bayan, iisang kasaysayan at iisang wika.

-

Isinulat ni Lorraine Bedra
Pag-aanyo nina Queen Anne Defensor at Sean Montevirgen

01/08/2025

𝗧𝗜𝗡𝗚𝗡𝗔𝗡 | Ginanap ang kauna-unahang misa para sa buwan ng Agosto na dinaluhan ng mga mag-aaral at kaguruan ng Negros Occidental National Science High School, Biyernes, Agosto 1.

Pinangunahan ni Rev. Fr. Mark Lester Maaliw, Priest-In-Charge of St. Padre Pio Chapel ang nasabing misa.

-

Larawang kuha ni Alhea Saribano

01/08/2025

𝗟𝗢𝗞𝗔𝗟 | Tingson, Ducay Lumahok sa Division Training para sa Learner Leaders at Advisers

Lumahok sina Negros Occidental National Science High School-Supreme Secondary Learners Government President Neio Destine Tingson at Vice President Maranatha Ducay sa division-wide training sa isinagawang Capacity Building of Learner Leaders and Teacher Advisers and Learner Government Programs nitong Hulyo 31, 2025 sa Victorias Elementary School Library.

Layunin ng programa na paunlarin ang kakayahan sa pamumuno ng mga opisyal ng learner governments at kanilang mga tagapayo sa pamamagitan ng pagtukoy sa mga prayoridad ng Learner Government Program, pag-unawa sa mga pansamantalang gabay, at pagbuo ng mga makabuluhang panukalang proyekto para sa paaralan at komunidad.

Tinalakay ni Mark Jun T. Condada ang mga pangunahing tungkulin ng learner governments, habang ipinaliwanag ni Noel F. Joaquin ang kahalagahan ng allyship sa pagpapatibay ng mga programang pangkabataan.

Pinamunuan ni Ms. Glaizelle Leonoras-Po ng NONSHS ang workshop sa pagsusulat ng program proposals sa hapon, kung saan tinuruan ang mga kalahok ng estratehiya sa paglikha ng konkretong proyekto para sa kanilang paaralan.

Binuksan ang aktibidad sa pamamagitan ng welcome remarks ni Principal Noe B. Baldomer, sinundan ng mga mensahe ng suporta mula kay School Governance and Operations Division Chief Ronamie V. Reliquias, PhD, at Assistant Schools Division Superintendent Roger Z. Rochar, PhD, OIC.

Pinangunahan naman ni Schools Division Superintendent Portia Mission Mallorca, PhD, CESO V ang panunumpa ng mga bagong opisyal ng Division Federated SELG at SSLG, habang inilahad ni Division Youth Formation Focal Person Liza O. Fronda ang activity matrix at house rules.

Nagtapos nang pormal ang programa ngayong araw, kung saan inaasahang lalagom ang mga natutuhan ng mga kalahok at mapagtibay ang kanilang mga panukalang proyekto para sa pagpapatupad sa kani-kanilang paaralan.

-

Balita ni Abraham Sia
Larawan mula kay Neio Tingson

25/07/2025

𝟬𝟳.𝟮𝟱.𝟮𝟱. | Araw ng Malayang Pamamahayag

Bawat araw na pinipilit ang magkaroon ng katahimikan, may sigaw na hindi kayang iwasan—sigaw na dumadaan sa tinta ng panulat, tibok ng mikropono, at titig ng kamera. Ito ang sigaw ng malayang pamamahayag, na sa kabila ng pananakot, pambubusabos, at pagtatangkang patahimikin, ay patuloy na pinupukaw ang laman ng nakabaon na kasinungalingan.

Sa pagbitaw ng katotohanan, may panganib, ngunit may mas malaki pang dahilan: ang karapatang malaman, ang karapatang magsalita, at ang karapatang manindigan.

Nakaangkla sa Republic Act No. 11440. Ang araw na ito ay nagbibigay-pugay sa walang takot na boses ng mga mamamahayag. Pinarangalan din nito ang pagkakatatag ng College Editors Guild of the Philippines (CEGP) noong Hulyo 25, 1931—isang makasaysayang marka para sa malayang pamamahayag ng mag-aaral kaakibat sa paglaban sa censorship. Dito napatutunayan na hindi madali ang maging tinig ng katotohanan sa panahong pinapatahimik ang lahat ng sumasalungat.

Sa mga bansang pinangungunahan ng takot, ang pagkakaroon ng malayang pamamahayag ang unang binubusalan ng katotohanan. Ngunit kahit may panganib, may mga mamamahayag na hindi umaatras, may mga mamahayag na handang magbigay ng katotohanan. Itinataya nila ang seguridad, kabuhayan, at minsan ang mismong buhay, lahat para sa layuning ibunyag ang totoo at karapat-dapat. Dahil para sa kanila, ang pagiging mamamahayag ay hindi trabaho kundi panata: panatang tumindig kahit mag-isa, at magsalita kahit dinig lang ng iilan, at sumigaw kahit walang nakikinig.

Ang malayang pamamahayag ay puso ng isang demokrasya — ito ay ang esensiya ng pagbibigay ng hustisya. Kung ito'y titigil, mawawala rin ang pag-ikot ng isang malayang lipunan at walang lalabas na katotohanan. Kaya’t habang may isang mamamahayag na tumitibok, habang may tinig na lumalaban, at habang may sigaw na nagpapalaya, mananatiling buhay ang pag-asa ng bayan. Dahil ang sigaw ng katotohanan ay hindi kailanman kayang busalan ng takot — ito’y laging makakahanap ng paraan upang marinig.

-

Sulat ni Joshua Sioco
Pag-aanyo ni Sean Montivergen

23/07/2025

𝗟𝗢𝗞𝗔𝗟 | SSLG President Tingson, PRO Gargar Itinalagang Information Officers sa Lungsod Victorias

Itinalaga sina Supreme Secondary Learners Government President Neio Destine Tingson at Public Relations Officer Chrisha Pearl Gargar ng Negros Occidental National Science High School bilang opisyal na information officers ng lungsod Victorias sa isinagawang School’s Deputy Information Officers Seminar 2025 nitong Hulyo 22, sa City Resort Pavilion II.

Dinaluhan nina Tingson mula sa senior high at Gargar mula sa junior high ang pagpupulong na may layuning palalimin ang kaalaman ng mga kabataang lider sa pamahalaan at hikayatin ang kanilang aktibong pakikilahok sa pamumuno, kung saan nahalal si Tingson bilang presidente ng SDIO na binubuo ng piling mag-aaral mula sa iba’t ibang paaralan sa lungsod.

Binuksan ni City Information Officer Joy P. Famini ang programa sa pamamagitan ng pagbibigay ng oryentasyon at paliwanag sa layunin ng aktibidad, gayundin ang pakikiisa ni Logistics Office Head Justine Sabalilag sa pagsasagawa ng mga gawain.

Tinalakay ng mga tagapagsalita ang apat na antas ng pamahalaan na kinabibilangan ng pambansa, panlalawigan, rehiyonal at lokal kasama ang proseso ng paggawa ng desisyon, pagpapatupad ng patakaran at pagbibigay ng mga serbisyong panlipunan gaya ng edukasyon, kalusugan, pabahay at seguridad sa pagkain.

Ipinaliwanag rin ang tungkulin ng mga mambabatas tulad ng mga senador at miyembro ng Sangguniang Kabataan pati na ang kahalagahan ng citizen participation sa anyo ng pagboto, volunteerism, community organizing, pagdalo sa public forum at aktibong pakikipag-ugnayan sa mga opisyal.

Ipinunto ng mga tagapagsalita na ang ganitong partisipasyon ng mamamayan ay mahalaga sa mas maayos na paggawa ng desisyon, mataas na tiwala sa pamahalaan, matatag na komunidad at mas makabuluhang demokrasya.

-

Balita ni Abraham Sia
Larawan mula kay Chrisha Gargar

23/07/2025

𝗜𝗡𝗧𝗘𝗥𝗡𝗔𝗦𝗬𝗨𝗡𝗔𝗟 𝗡𝗔 𝗣𝗔𝗠𝗣𝗔𝗟𝗔𝗞𝗔𝗦𝗔𝗡 | Barrios, Kinubra ang Kampeonato

Napanatili ng World Boxing Council welterweight champion na si Mario “El Azteca” Barrios ng Estados Unidos ang kaniyang ‘world title’ matapos ang labindalawang round fights laban sa Pambansang kamao ng Pilipinas na si Manny "Pacman" Pacquiao sa iskor na 115-113 pabor kay Barrios, at dalawang 114-114 na tabla sa MGM Grand Arena na ginanap sa Las Vegas ngayong ika-20 ng Hulyo.

Ipinamalas pa rin ni Pacquiao ang kaniyang natatanging galing at kabihasaan sa larangan ng boksing.

Samantala, hindi naman nagpatinag si Barrios at patuloy na lumaban upang mapanatili ang kaniyang iniingatan na titulo.

Nakita ni Barrios ang inaasam na tagumpay sa kaniyang jab at body shots na siyang nagpahina kay Pacquiao.

Sa kabilang dako, patuloy na lumaban si Pacquiao sa mga huling yugto, at ipinakita na may maibubuga pa siya sa edad na 46.

“I thought I won the fight. It was a close fight. He (Barrios) was very tough,” ani ni Pacquiao, matapos magtagumpay laban kay Barrios gamit ang kaniyang tapang at kakayahan.

Bumawi naman gamit ang mga butas sa galaw ni Pacquiao si Barrios sa ika-11 na yugto at nakakuha ng pagkakataon upang makalusot sa kaniya.

Ngunit sa huli, humina ang kaniyang depensa na naging dahilan upang maipanalo ni Pacquiao ang huling bahagi ng walang kahirap-hirap.

Isa sa mga hurado ang nagbigay ng 115-113 para kay Barrios, habang ang dalawa pa ay parehong nagbigay ng dalawa ring 114-114 na nagresulta sa majority draw.

Inaasahan ang rematch ng dalawang boksingero matapos magpahayag ng pagsang-ayon si Pacquiao sa isang panayam.

-
Balita ni Janelle Fruponga
Pag-aanyo ni Sean Montevirgen

Ang Iskolar

17/08/2025

15/08/2025

14/08/2025

11/08/2025

05/08/2025

05/08/2025

05/08/2025

01/08/2025

01/08/2025

25/07/2025

23/07/2025

23/07/2025

Address

Website

Alerts

Shortcuts

Share

Category