https://balitangcasti.wordpress.com/

Balitang CASTI, Castillejos, Zambales (2025)

22/09/2025

BALITANG PANLALAWIGAN | Pansamantalang Pagsasara ng Tanggapan ng “Tulong Kapitolyo” Dahil sa Masamang Panahon

ZAMBALES — Inanunsyo ng Tanggapan ni Gobernador Jun Ebdane na pansamantalang magsasara ang programa ng Tulong Kapitolyo bukas, Martes, Setyembre 23, bilang pag-iingat bunsod ng masamang panahon na nararanasan sa lalawigan.

Ayon sa pamunuan, ang hakbang ay bahagi ng pangangalaga sa kaligtasan ng mga kawani at mamamayan na dumadayo sa tanggapan upang mag-avail ng serbisyo. Pinapayuhan ang publiko na manatiling nakaantabay para sa karagdagang abiso at anunsyo hinggil sa muling pagbubukas ng operasyon.

Nagpaabot din ng pasasalamat ang pamahalaang panlalawigan sa patuloy na pang-unawa at kooperasyon ng mga Zambaleño.

Para sa mga update, maaaring subaybayan ang mga opisyal na social media page ng Kapitolyo.

Ulat ni KABALITANG CASTI Correspondent
Kuya Sylmar Calata Hora

22/09/2025

🌐BALITANG PANAHON | Zambales Naka-Yellow Warning Level; PAGASA Nagbabala sa Posibleng Pagbaha
Setyembre 22, 2025 – Zambales News Online

ℹ️Isinailalim ng PAGASA sa Yellow Warning Level ang lalawigan ng Zambales ngayong Lunes ng umaga dahil sa pinalakas na Habagat na hatak ng Super Typhoon Nando.

Sa inilabas na bulletin alas-5:00 ng umaga, binigyang-diin ng ahensya na mataas ang posibilidad ng pagbaha sa mababang lugar at flood-prone areas sa Zambales, partikular kung magpapatuloy ang bugso ng ulan sa mga susunod na oras.

Kasabay nito, nagbabala rin ang PAGASA na asahan ang banayad hanggang katamtamang ulan na may paminsan-minsang malakas na pagbuhos sa mga karatig-lalawigan gaya ng Tarlac, Bataan, Pampanga, Bulacan, Nueva Ecija, at Metro Manila.

Pinapayuhan ang mga residente ng Zambales na manatiling alerto, maghanda ng mga emergency kit, at makipag-ugnayan sa kani-kanilang Disaster Risk Reduction and Management Offices (DRRMO). Mahigpit ding paalala sa mga nakatira malapit sa ilog, sapa, at mababang bahagi ng bayan na mag-ingat sa biglaang pagbaha.

Source: www.pagasa.dost.gov.ph.

Ulat ni KABALITANG CASTI Correspondent
Kuya Sylmar Calata Hora

21/09/2025

| Klase at Trabaho sa Pamahalaan Suspendido sa Higit 30 Probinsya at Lungsod Dahil sa Super Typhoon NandoPH

Setyembre 21, 2025 — Suspendido ang pasok sa lahat ng antas ng klase at sa mga tanggapan ng pamahalaan bukas, Lunes, Setyembre 22, sa Metro Manila at mahigit tatlumpung probinsya bunsod ng inaasahang matinding epekto ng Super Typhoon NandoPH at ng pinalakas nitong Habagat.

Kabilang sa mga lugar na apektado ang: Zambales, Abra, Antique, Apayao, Bataan, Batanes, Batangas, Benguet, Bulacan, Cagayan, Cavite, Ifugao, Ilocos Norte, Ilocos Sur, Isabela, Kalinga, La Union, Laguna, Metro Manila, Mountain Province, Nueva Ecija, Nueva Vizcaya, Occidental Mindoro, Oriental Mindoro, Pampanga, Pangasinan, Palawan, Romblon, Rizal, at Tarlac.

Ayon sa anunsyo, mananatiling bukas at patuloy ang operasyon ng mga ahensiyang nagbibigay ng essential services tulad ng mga ospital, serbisyong pangseguridad, at mga tanggapang responsable sa disaster response.

Samantala, muling pinaalalahanan ang publiko na magdoble-ingat, iwasan ang mga mapanganib na lugar gaya ng tabing-ilog at baybayin, at manatiling nakatutok sa mga opisyal na abiso ng pamahalaan upang maging ligtas sa gitna ng bagyo.

Source: Zambales for the People

Ulat ni KABALITANG CASTI Correspondent
Sylmar Calata Hora

21/09/2025

🌐BALITANG LOKAL | BalayBAE Association Ipinagdiwang ang Ika-7 Anibersaryo sa Pamamahagi ng Food Packs; Katuwang ang I AM Worldwide

ℹ️Sa pagdiriwang ng kanilang ika-7 taon ng pagkakatatag, matagumpay na nagdaos ng programang pamamahagi ng food packs sa piling residente ng Barangay Balaybay ang BalayBAE Association "Tahanang Balaybay Advocating Empowerment" (BALAYBAY) ngayong araw.

Pinangunahan ng tagapagtatag na si Sir Teddy “Ruffa” Capuli, LPT, kasama ang mga opisyal at kasapi ng organisasyon, naging makabuluhan ang aktibidad bilang pagpapakita ng kanilang patuloy na adbokasiya para sa pagpapalakas at pagtutulungan ng komunidad.

Malaking bahagi ng tagumpay ng programa ang naging suporta ang I AM Worldwide , sa pamumuno ni G. Norlito Pascua at ng kaniyang mga katuwang. Ang kanilang pakikiisa ay nagbigay-daan upang mas marami pang pamilyang nangangailangan ang mabigyan ng tulong.

Ayon kay Sir Teddy Capuli, ang anibersaryo ay hindi lamang pagdiriwang ng pitong taong paglilingkod kundi isang pagkakataon din upang ibahagi ang biyaya sa kapwa.
“Hindi lang ito simpleng selebrasyon. Mas mahalaga na sa bawat taon ay may maiiwan kaming alaala ng malasakit at pagtulong sa mga tao,” pahayag niya.

Nagpasalamat naman si Norlito Pascua sa pagkakataong maging kabalikat ng BalayBAE, at binigyang-diin ang kahalagahan ng pagtutulungan sa pagitan ng mga organisasyon at pribadong sektor upang maabot ang mas marami pang nangangailangan.

Lubos namang ikinagalak ng mga benepisyaryo ang natanggap na tulong, na nagsilbing inspirasyon at pag-asa para sa kanilang pang-araw-araw na pamumuhay.

Ang matagumpay na aktibidad ay nagpatunay na sa loob ng pitong taon, ang BalayBAE ay hindi lamang isang samahan kundi isang tahanan ng malasakit at pagkakaisa, at nagpapatuloy sa misyon nitong magtaguyod ng pagbabago at pag-angat ng pamayanan.

Ulat ni KABALITANG CASTI Correspondent
Kuya Sylmar Calata Hora

21/09/2025

🌐WARNING: SENSITIBONG MGA LARAWAN

ℹ️Maynila – Ilang miyembro ng kapulisan na naka-deploy sa Mendiola ngayong araw ang kinailangang bigyan ng agarang paunang lunas matapos makaranas ng hindi inaasahang insidente habang naka-duty.

Ayon sa ulat, mabilis na rumesponde ang Manila Disaster Risk Reduction and Management Office (CDRRMO) at Manila Health Department upang tugunan ang kalagayan ng mga pulis. Matapos ang inisyal na pangangalaga, agad silang dinala sa Ospital ng Sampaloc para sa mas masusing gamutan ng mga doktor.

Samantala, nagpaalala si Mayor Isko Moreno Domagoso sa publiko at sa mga law enforcers na pairalin ang disiplina, kaayusan, at kapayapaan sa lungsod ng Maynila, lalo na sa mga panahong may malalaking pagtitipon o kilos-protesta.

Photo courtesy: Isko Moreno Domagoso

Ulat ni KABALITANG CASTI Correspondent
Kuya Sylmar Calata Hora

21/09/2025

🌐TINGNAN | Patuloy na tensyon sa Maynila: Raliyista, tinangkang pumasok sa Malacañang; Teargas at water cannon, ginamit ng awtoridad

ℹ️Nagpapatuloy ang matinding tensyon sa lungsod ng Maynila matapos subukan ng mga raliyista na pumasok sa paligid ng Malacañang Palace ngayong araw. Sa ulat, gumamit na ng teargas at water cannon ang mga awtoridad upang maitaboy ang mga nagsisigawang demonstrador.

Ayon sa paunang impormasyon, ilang kabataan ang naaresto matapos umanong mangbato ng bato at iba pang bagay laban sa kapulisan. Sa kabila ng mahigpit na seguridad at dispersal operations, tuloy-tuloy pa rin ang mga sigawan ng mga raliyista na nananawagan kontra sa korapsyon sa pamahalaan.

Mahigpit na binabantayan ngayon ang paligid ng Malacañang upang maiwasan ang karagdagang kaguluhan. Patuloy na nagsasagawa ng clearing operations ang mga otoridad habang sinisikap na mapanatili ang kaayusan sa lungsod.

Source: Daily Inquirer

Ulat ni KABALITANG CASTI Correspondent
Kuya Sylmar Calata Hora

21/09/2025

🌐JUST IN | Tensyon sa Maynila: Raliyista, sinunog ang container van na nakaharang sa ruta

ℹ️Nagkaroon ng mainit na tensyon sa lungsod ng Maynila matapos magka-engkwentro ang mga raliyista at awtoridad ngayong araw. Sa gitna ng kilos-protesta, sinunog ng mga raliyista ang isang container van na umano’y nakaharang sa mismong daraanan ng kanilang martsa.

Bukod sa pagsunog, nakuhanan din ng video ang ilan sa mga raliyista na pinaghahampas at pinagbabato ang nasabing container.

Source: ABANTE NEWS

Ulat ni KABALITANG CASTI Correspondent
Kuya Sylmar Calata Hora

21/09/2025

🌐BALITANG LOKAL| ASA Philippines Foundation, inilunsad ang 120-Day Feeding Program sa Kanaynayan Community School

ℹ️Barangay San Pablo — Isang makabuluhang hakbang tungo sa mas malusog at mas maliwanag na kinabukasan para sa mga kabataan ang opisyal na paglulunsad ng 120-Days In-School Child Nutrition Program sa Kanaynayan Community School. Ang proyektong ito ay bunga ng pakikipagtuwang ng ASA Philippines Foundation, Inc. at ng programang HAPAGASA: Sustansya at Pag-asa, sa suporta ng Pamahalaang Barangay ng San Pablo sa pangunguna ng Kagalang-galang na Punong Barangay Ronaldo Boquiren katuwang ang kaniyang konseho

Sa temang “A 120-Days-In School Child Nutrition Program for a Future Healthier Eating Habit,” layunin ng programa na labanan ang malnutrisyon at hikayatin ang mas maayos na kaugalian sa pagkain ng mga mag-aaral. Sa loob ng 120 araw, tatanggap ang mga bata ng masustansyang pagkain na hindi lamang magpapatibay ng kanilang pangangatawan, kundi susuporta rin sa kanilang konsentrasyon at pagganap sa klase.

Ipinahayag ng pamunuan ng paaralan at mga kinatawan ng barangay ang kanilang pasasalamat sa proyektong ito. “Hindi lamang isipan kundi pati katawan ng aming mga mag-aaral ang binibigyang-lakas ng programang ito. Sa tulong ng inyong suporta, tiyak na mas magiging handa silang harapin ang kanilang pag-aaral at ang kinabukasan,” pahayag ng kinatawan mula sa Kanaynayan Community School.

Para sa ASA Philippines Foundation, ang proyektong ito ay patunay ng kanilang patuloy na misyon na isulong ang kaunlaran ng komunidad at kalusugan ng kabataan. Naniniwala silang ang tamang nutrisyon at edukasyon ay mahalagang sangkap para sa mas matibay na lipunan.

Nagpaabot din ng taos-pusong pasasalamat ang Pamahalaang Barangay ng San Pablo, sa pamumuno ni Punong Barangay Ronaldo Boquiren, sa ASA Philippines Foundation at sa mga katuwang nito, at iginiit na ang ganitong mga inisyatiba ay pundasyon para sa pangmatagalang pagbabago at pag-unlad ng komunidad.

Kuhang larawan ni KABALITANG CASTI Correspondent Kagawad Nikka Tungpalan Dimpal ng Barangay San Pablo

Ulat ni KABALITANG CASTI Correspondent
Kuya Sylmar Calata Hora

21/09/2025

🌐BALITANG LOKAL | Mga Grupo ng Sibiko sa Olongapo Nagsagawa ng Rally Laban sa Korupsiyon, Nanawagan ng Transparency

ℹ️Nagtipon nitong Linggo, Setyembre 21, 2025, ang daan-daang residente at mga miyembro ng iba’t ibang samahang sibiko sa Rizal Triangle Park upang ipanawagan ang mas mahigpit na pananagutan at ganap na transparency sa pamahalaan.

Pinangunahan ng People Against Corruption-Olongapo (PACO) ang kilos-protesta bilang bahagi ng pambansang pagkilos kontra korupsiyon. Nagsimula ang pagtitipon dakong alas-siyete ng umaga, kung saan nakasuot ng puti ang mga dumalo bilang sagisag ng pagkakaisa laban sa katiwalian.

Hawak ang mga plakard at bandila, mariing sumigaw ang mga raliyista ng mga panawagang “Bangon, Laban sa Korupsiyon!” bilang pahayag ng kanilang pagkadismaya at panawagan para sa malinis na pamamahala.

Ayon sa mga tagapagsalita ng PACO, nilimitahan ang pag-akyat sa entablado upang masigurong nakatuon lamang ang programa sa adbokasiyang anti-korupsiyon.

“Hindi ito laban ng iilang tao lamang, ito ay laban ng buong sambayanan. Ang tiwala ng taumbayan ay hindi dapat pinaglalaruan,” pahayag ng isa sa mga opisyal ng PACO.

Bahagi rin ng makasaysayang araw ang kilos-protesta dahil tumapat ito sa ika-53 anibersaryo ng deklarasyon ng Batas Militar noong 1972—isang panahong madalas inuugnay sa malawakang katiwalian at pang-aabuso sa kapangyarihan.

Dagdag ng mga tagapag-organisa, ang kanilang panawagan ay hindi lamang pagbabalik-tanaw sa mga nakalipas na pagkakamali kundi isang babala at panawagan para sa kasalukuyan at hinaharap: ang katiwalian ay hindi dapat magkaroon ng puwang sa alinmang administrasyon.

📸Photos credit to the owner

Ulat ni KABALITANG CASTI Correspondent
Kuya Sylmar Calata Hora

21/09/2025

BALITANG NASYONAL | Half-Day Work Suspension sa Setyembre 22 para sa Pagdiriwang ng Family Week

Inanunsyo ng Malacañang na sususpindihin ang trabaho sa lahat ng tanggapan ng pamahalaan sa ilalim ng Executive branch simula ala-una ng hapon sa Lunes, Setyembre 22, 2025, bilang pakikiisa sa taunang pagdiriwang ng “Kainang Pamilya Mahalaga” Day.

Batay ito sa Memorandum Circular No. 96, alinsunod sa Proklamasyon Blg. 60 (s. 1992) na nagdedeklara sa huling linggo ng Setyembre bilang Family Week, at Proklamasyon Blg. 326 (s. 2012) na nagtatalaga sa ikaapat na Lunes ng Setyembre bawat taon bilang “Kainang Pamilya Mahalaga” Day.

Layunin ng nasabing kautusan na mabigyan ang mga pamilyang Pilipino ng sapat na panahon upang sama-samang ipagdiwang ang Ika-33 Pambansang Family Week, at makalahok sa iba’t ibang programa’t aktibidad na inihahanda ng National Committee on the Filipino Family.

Gayunpaman, nilinaw ng Palasyo na ang mga ahensiyang may mahalagang tungkulin tulad ng pagbibigay ng serbisyong pangkalusugan, pagtugon sa sakuna at kalamidad, at iba pang pangunahing serbisyo ay mananatiling bukas upang matiyak ang tuloy-tuloy na serbisyo sa publiko.

Hinikayat din ng Malacañang ang iba pang sangay ng pamahalaan, mga independent commissions, gayundin ang pribadong sektor na sumunod sa parehong work suspension upang mabigyan ng pagkakataon ang lahat ng pamilyang Pilipino na makapagsama-sama sa mahalagang okasyong ito.

“Ang Tanggapan ng Pangulo ay mariing nananawagan sa lahat ng kawani ng pamahalaan sa Executive branch na lubos na suportahan ang mga programa at aktibidad para sa pagdiriwang ng Family Week,” ayon sa memorandum.

Epektibo kaagad ang kautusan na pinirmahan sa Lungsod ng Maynila noong Setyembre 19, 2025.

Ulat ni KABALITANG CASTI Correspondent
Kuya Sylmar Calata Hora

20/09/2025

BALITANG PANAHON| Babala ng Malakas na Pag-ulan Itinaas sa Zambales; Pagbaha Posibleng Tumama
Ika-20 ng Setyembre 2025 – Sabado, 9:22 ng gabi

Naglabas ng Orange Rainfall Warning ang PAGASA para sa lalawigan ng Zambales ngayong Sabado ng gabi bunsod ng malakas na ulan na dala ng Habagat (Southwest Monsoon) na pinalalakas ng Bagyong Nando.

Sa ilalim ng Orange Warning Level, tinuturing na seryoso at banta ang pagbaha, lalo na sa mga mabababang lugar, gilid ng ilog, at mga dalisdis ng bundok na madaling tamaan ng landslide. Pinapayuhan ang mga residente na maging alerto, maghanda ng mga emergency kit, at makinig sa mga anunsyo mula sa lokal na pamahalaan at Disaster Risk Reduction and Management Office (DRRMO).

Ayon sa PAGASA, maaaring magpatuloy ang malalakas na buhos ng ulan sa lalawigan sa mga susunod na oras. Posibleng magkaroon ng biglaang pagbaha at pag-apaw ng mga sapa at ilog kung magpapatuloy ang malakas na ulan.

Samantala, ang susunod na ulat ng ahensya ay nakatakdang ilabas alas-11 ngayong gabi.

Para sa karagdagang impormasyon, maaaring makipag-ugnayan sa PAGASA sa (02) 8927-1335 o (02) 8927-2877, o bumisita sa kanilang opisyal na website na www.pagasa.dost.gov.ph.

Source: DOST-PAGASA

20/09/2025

🔥 BALITANG CASTI EXCLUSIVE 🔥
Kusina Ni Ylyza Restaurant and Catering Services – “The Food Speaks for Itself”

😋🍲Craving flavorful and unforgettable dishes? Kusina ni Ylyza is your ultimate destination in Castillejos, Zambales! From Filipino favorites to Koryan specialties, we bring delicious food straight to your table or event.

🍽️ Dining Options:
🟢Dine-In – Enjoy our cozy, welcoming restaurant atmosphere.
🟢Take-Out & Delivery – Fresh meals delivered to your doorstep.
🟢Unlimited Samgyup & Barbecue Stations – Perfect for celebrations!

🎉 Catering Services:
🟢Customized food packages for weddings, birthdays, and special occasions.
🟢Flexible options for small gatherings or large events.

⏰ Operating Hours: Monday to Sunday, 11:00 AM – 11:00 PM
📞 Contact: 0999-567-0632

📍 Location: Barangay San Nicolas, Castillejos, Zambales

🗺️ Directions: Waze & Google Maps – search “Kusina ni Ylyza”

✨ Why Choose Us?
✅Fresh, high-quality ingredients
✅Diverse menu options for every craving
✅Professional and friendly service
✅Perfect for casual dining or memorable events

🤝 Collaborations, Partnerships & Advertisements:
Looking to partner with us, promote your brand, or advertise? Message Kuya Sylmar Calata Hora 📨

Elevate your dining experience. Celebrate with flavor. Choose Kusina ni Ylyza – Where “The Food Speaks for Itself.”

Balitang CASTI

22/09/2025

22/09/2025

21/09/2025

21/09/2025

21/09/2025

21/09/2025

21/09/2025

21/09/2025

21/09/2025

21/09/2025

20/09/2025

20/09/2025

Address

Website

Alerts

Shortcuts

Share

Category