11/09/2025
Barzaga Hinahamon si Lacson: ‘Ipatawag Mo Sina Romualdez at Co Kung Matapang Ka!’
Hindi pa man humuhupa ang tensyon sa pagitan nina Cavite Rep. Elpidio “Kiko” Barzaga at dating Senate President Tito Sotto, isa na namang senador ang kinakalampag ngayon ng kongresista, si Sen. Ping Lacson, ang bagong chairman ng Senate Blue Ribbon Committee.
Ayon kay Barzaga, nakasalalay sa mga susunod na hakbang ni Lacson ang kredibilidad ng kanyang pamumuno sa makapangyarihang komite. Hamon ng kongresista: patunayan ni Lacson na may tunay siyang tapang at integridad sa pamamagitan ng pagpapatawag sa mga bigating pangalan sa Kamara tulad nina House Appropriations Chair Zaldy Co at House Speaker Martin Romualdez.
“Kung kaya mo si Zaldy Co at Romualdez sa Blue Ribbon, edi goods,” ani Barzaga. “Pero pag hindi, edi parehas lang kayo ni Sotto, takot sa malalaking personalidad.”
Hindi na bago sa politika ang sagupaan ng Senado at Kamara, ngunit sa pagkakataong ito, tila mismong kredibilidad ng Blue Ribbon Committee ang inilalagay sa alanganin. Para kay Barzaga, ang tunay na sukatan ng lakas ng isang lider ay kung kaya nitong patawan ng imbestigasyon kahit ang mga kaalyado o matataas na opisyal.
Sa ngayon, wala pang tugon mula kay Sen. Lacson ukol sa hamong ito, ngunit kung may inaabangan ang taumbayan, ito ay kung kakagat ba siya sa hamon… o mananahimik gaya ng mga nauna.
