15/09/2026
بہاولپور قاسم ٹاؤن میں مبینہ غیر قانونی شٹر کی تنصیب، مین روڈ پر کرسیاں اور گاڑیوں کی پارکنگ سے عوامی آمدورفت متاثر بہاولپور قاسم ٹاؤن کے مرکزی راستے پر مبینہ طور پر غیر منظور شدہ شٹر کی تنصیب اور اس کے سامنے سڑک کے کنارے کرسیاں رکھے جانے کے باعث عوامی آمدورفت میں رکاوٹ پیدا ہونے کا معاملہ سامنے آیا ہے، جس پر اہلِ علاقہ نے متعلقہ حکام سے فوری نوٹس لینے اور موقع پر معائنہ کرکے قانونی حیثیت واضح کرنے کا مطالبہ کیا ہے اہلِ محلہ کے مطابق قاسم ٹاؤن کے مرکزی راستے کے آغاز پر ایک مقام پہلے کھلے برآمدہ نما حصے کی صورت میں موجود تھا، جہاں بعد ازاں تقریباً دو فٹ کا چھوٹا شٹر نصب کیا گیا۔ تاہم تقریباً تین سے چار ماہ قبل مبینہ طور پر اپنی مدد آپ کے تحت اسی مقام پر تقریباً 10 سے 12 فٹ چوڑا شٹر نصب کرکے جگہ کو مزید وسیع کر دیا گیا، جس کے بعد وہاں باقاعدہ کاروباری سرگرمیاں بھی شروع ہوگئیں شہریوں کا کہنا ہے کہ ان کے علم کے مطابق مذکورہ بڑا شٹر منظور شدہ نقشے کا حصہ نہیں اور نہ ہی اس کی تنصیب کے لیے متعلقہ میونسپل کارپوریشن سے باقاعدہ اجازت یا منظوری حاصل کی گئی ہے۔ تاہم اس معاملے پر تاحال کسی مؤثر جانچ پڑتال یا قانونی کارروائی کے نہ ہونے سے اہلِ علاقہ میں تشویش پائی جاتی ہے اہلِ محلہ کے مطابق صورتحال اس وقت مزید سنگین ہوجاتی ہے جب مذکورہ کاروباری مقام پر آنے والے گاہک اپنی گاڑیاں اور موٹر سائیکلیں سڑک کے کنارے کھڑی کرکے خریداری یا آرڈر کے لیے رک جاتے ہیں، جس سے پہلے ہی محدود راستہ مزید تنگ ہوجاتا ہے اور دونوں اطراف سے آنے جانے والی ٹریفک کو مشکلات کا سامنا کرنا پڑتا ہے شہریوں نے مزید توجہ دلائی ہے کہ RPO آفس کے سامنے مین روڈ کے سائیڈ پر بھی مبینہ طور پر کرسیاں رکھ دی گئی ہیں، جس کے باعث سڑک کے کنارے غیر ضروری رکاوٹ پیدا ہورہی ہے۔ اہلِ علاقہ کا کہنا ہے کہ اگر خدانخواستہ کسی وقت ہیوی ٹریفک وہاں سے گزرے اور اچانک کسی رکاوٹ یا گاڑی کے باعث راستہ محدود ہوجائے تو کسی بڑے حادثے کا خدشہ خارج از امکان نہیں ذرائع کے مطابق اس معاملے پر شہریوں کی جانب سے پہلے سٹیزن پورٹل پر بھی درخواست جمع کروائی گئی تھی، جسے بعد ازاں متعلقہ حکام کو کارروائی کے لیے ارسال کیا گیا، تاہم درخواست پر تاحال کوئی مؤثر عمل درآمد نہیں ہوسکا۔ شہریوں کا کہنا ہے کہ سٹیزن پورٹل پر درج کی گئی بعض تحریری تفصیلات ان کی جانب سے نہیں بلکہ متعلقہ حکام کی طرف سے اپنی سطح پر تحریر کرکے آگے بھیجی گئی تھیں، مگر اس کے باوجود عملی طور پر مسئلہ جوں کا توں موجود ہے اہلِ علاقہ نے اب یہی درخواست TMA میونسپل کارپوریشن کے دفتر میں بھی جمع کرا دی ہے، جس کا ڈائری نمبر 1102 بتایا گیا ہے۔ درخواست میں مطالبہ کیا گیا ہے کہ موقع پر باقاعدہ معائنہ کیا جائے، متعلقہ منظور شدہ نقشہ اور سرکاری ریکارڈ کی جانچ کی جائے اور یہ معلوم کیا جائے کہ مذکورہ شٹر کس قانونی اجازت یا منظوری کے تحت نصب کیا گیا شہریوں نے مطالبہ کیا ہے کہ اگر شٹر غیر منظور شدہ یا منظور شدہ نقشے کے خلاف پایا جائے تو قانون و ضوابط کے مطابق کارروائی عمل میں لائی جائے، جبکہ سڑک کے کنارے رکھی گئی کرسیاں، گاڑیوں کی پارکنگ اور دیگر ممکنہ رکاوٹوں کا بھی فوری سدباب کیا جائے تاکہ عوامی شاہراہیں تجاوزات اور غیر ضروری رکاوٹوں سے پاک رہیں اور شہریوں کو محفوظ و بلا رکاوٹ آمدورفت کی سہولت میسر آسکے اہلِ علاقہ نے متعلقہ میونسپل حکام، بہاولپور انتظامیہ اور بہاولپور کے دیگر ذمہ دار اداروں سے مطالبہ کیا ہے کہ معاملے کو محض کاغذی کارروائی تک محدود رکھنے کے بجائے موقع پر عملی کارروائی کی جائے اور شہریوں کے بنیادی حقِ آمدورفت کو یقینی بنایا جائے۔
#بہاولپور #تجاوزات
