07/06/2026
بلوچستان کی بیٹی ڈاکٹر ماہ نور ناصر پر حملہ پوری انسانیت پر حملہ ہے
قبائلی و سیاسی رہنما سردارزادہ میر سمیع اللہ لانگو نے بلوچستان کی بیٹی ڈاکٹر ماہ نور ناصر پر ہونے والے افسوسناک اور بزدلانہ حملے کی شدید الفاظ میں مذمت کرتے ہوئے کہا ہے کہ ڈاکٹر انسانیت کے مسیحا ہوتے ہیں اور ہسپتال وہ مقدس مقامات ہیں جہاں بیمار، لاچار اور بے سہارا لوگ زندگی کی امید لے کر آتے ہیں۔ طبی عملے کو نشانہ بنانا نہ صرف ایک فرد بلکہ پورے معاشرے اور انسانیت پر حملے کے مترادف ہے۔
انہوں نے کہا کہ بلوچستان کے بلوچ اور پشتون علاقوں میں ہماری بیٹیاں بے شمار مشکلات، سماجی رکاوٹوں اور محدود وسائل کے باوجود تعلیم حاصل کرکے ڈاکٹر، انجینئر اور دیگر شعبوں میں قوم و عوام کی خدمت کے لیے آگے بڑھتی ہیں۔ افسوس کہ ان کی محنت، صلاحیت اور خدمت کے جذبے کا صلہ انہیں عدم تحفظ، خوف اور تشدد کی صورت میں دیا جا رہا ہے۔
سردارزادہ میر سمیع اللہ لانگو نے کہا کہ اگر ایک لیڈی ڈاکٹر بھی اپنے فرائض کی ادائیگی کے دوران محفوظ نہیں تو یہ ریاستی اداروں اور قانون نافذ کرنے والے نظام کے لیے لمحۂ فکریہ ہے۔ ایسے واقعات عوام کے اعتماد کو مجروح کرتے ہیں اور معاشرے میں بے چینی پیدا کرتے ہیں۔
انہوں نے مطالبہ کیا کے بلوچستان بھر میں ڈاکٹرز، خصوصاً خواتین ڈاکٹرز اور طبی عملے کے تحفظ کے لیے مؤثر اور عملی اقدامات کیے جائیں۔
انہوں نے کہا کہ خاموشی اور مجرمانہ غفلت مزید سانحات کو جنم دے سکتی ہے ریاست اپنی بیٹیوں، اپنے معالجین اور اپنے شہریوں کے جان و مال کے تحفظ کو یقینی بنائے۔ ڈاکٹر ماہ نور ناصر پر حملہ دراصل پورے معاشرے، انسانی اقدار پر حملہ ہے جس کی جتنی بھی مذمت کی جائے کم ہے۔
