04/10/2026
گلگت : حکومت گلگت بلتستان نے وزیراعلیٰ کے مشیر عطاء اللّٰہ کو مزید دو اہم محکموں کے قلمدان سونپ دیے ہیں، جس کے بعد ان کے پاس مجموعی طور پر 10 صوبائی محکموں کی ذمہ داریاں آگئی ہیں۔ اس حوالے سے سروسز اینڈ جنرل ایڈمنسٹریشن ڈیپارٹمنٹ (کیبنٹ ونگ)، گلگت بلتستان سیکرٹریٹ کی جانب سے باقاعدہ نوٹیفکیشن جاری کر دیا گیا ہے۔ 3 اکتوبر 2026 کو جاری نوٹیفکیشن کے مطابق وزیراعلیٰ گلگت بلتستان کی منظوری سے مشیر وزیراعلیٰ عطاء اللّٰہ کو نارکوٹکس کنٹرول اور ٹرانسپورٹ کے محکموں کا قلمدان بھی تفویض کیا گیا ہے۔ اس سے قبل 2 اکتوبر کو جاری نوٹیفکیشن کے تحت عطاء اللّٰہ کو 8 محکموں کی ذمہ داریاں سونپی گئی تھیں، جن میں ایکسائز، ٹیکسیشن، زکوٰۃ و عشر، کوآپریٹو سوسائٹیز، سوشل ویلفیئر، پاپولیشن ویلفیئر، انسانی و بچوں کے حقوق اور خواتین کی ترقی و امورِ نوجوانان شامل ہیں۔ نئے احکامات کے بعد مشیر وزیراعلیٰ عطاء اللّٰہ مجموعی طور پر ان 10 محکموں کے امور دیکھیں گے۔ نوٹیفکیشن کے مطابق احکامات کی نقول ایوانِ صدر، وزیراعظم سیکرٹریٹ، چیف سیکرٹریز اور دیگر متعلقہ اداروں کو بھی ارسال کر دی گئی ہیں۔
