Diamer News Network

23/08/2026

19/08/2026

17/08/2026

ضروری اطلاع

متاثرین دیامر بھاشا ڈیم پراجیکٹ — ڈبل چولہا

ڈپٹی کمشنر آفس دیامر کے علم میں یہ بات آئی ہے کہ بعض عناصر متاثرینِ دیامر بھاشا ڈیم کو یہ کہہ کر بلاوجہ تنگ اور پریشان کر رہے ہیں کہ ڈبل چولہا ان کی وجہ سے ملا ہے۔

واضح کیا جاتا ہے کہ ڈبل چولہا متاثرینِ دیامر بھاشا ڈیم کا حق ہے اور کاغذی کارروائی و ریکارڈ کی درستگی کے بعد متاثرین کو چیکس کی ادائیگی کی جا رہی ہے۔ اس سلسلے میں واپڈا اور ضلعی انتظامیہ دیامر کی کاوشیں شامل ہیں۔

اگر کوئی شخص یا عنصر متاثرین کو ناجائز طور پر تنگ، پریشان یا بلیک میل کر رہا ہے تو متاثرین بلاخوف ثبوت اور شواہد کے ساتھ ڈپٹی کمشنر آفس دیامر سے رجوع کریں۔ ایسے عناصر کے خلاف قانون کے مطابق سخت کارروائی عمل میں لائی جائے گی۔

ڈپٹی کمشنر آفس دیامر متاثرینِ دیامر بھاشا ڈیم کے حقوق اور جائز مفادات کی بھرپور ترجمانی اور حفاظت جاری رکھے گا۔

ڈپٹی کمشنر آفس دیامر

17/08/2026

کمشنر دیامر استور ڈویژن عظیم اللہ نے کہا ہے کہ متاثرین کو بیجا تنگ کرنے والے ثبوت لیکر میرے پاس آئیں ۔ ایسے عناصر کو عبرت کا نشان بناونگا ۔۔۔

15/08/2026

کمشنر دیامر/استور ڈویژن کا ایڈیشنل ڈسٹرکٹ تانگیر کا ایک روزہ دورہ۔

کمشنر دیامر/استور ڈویژن جناب عظیم اللہ نے آج ایڈیشنل ڈسٹرکٹ تانگیر کا ایک روزہ سرکاری دورہ کیا۔ ان کے ہمراہ ڈائریکٹر ہیلتھ دیامر/استور ڈویژن اور ڈسٹرکٹ ہیلتھ آفیسر دیامر بھی موجود تھے۔

ایڈیشنل ڈپٹی کمشنر تانگیر اور اسسٹنٹ کمشنر تانگیر نے تانگیر پل پر کمشنر دیامر/استور ڈویژن کا استقبال کیا اور انہیں خوش آمدید کہا۔

دورے کے دوران کمشنر دیامر/استور ڈویژن نے تحصیل ہیڈکوارٹر ہسپتال (THQ) تانگیر کا تفصیلی دورہ کیا اور عوام کو فراہم کی جانے والی طبی و صحت کی سہولیات کا جائزہ لیا۔ انہوں نے ہسپتال کے مختلف شعبہ جات کا معائنہ کیا، دستیاب طبی سہولیات، ادویات، آلات، عملے کی دستیابی اور دیگر ضروری انتظامات کا جائزہ لیا۔ کمشنر نے ہسپتال میں زیرِ علاج مریضوں سے بھی ملاقات کی اور ان سے فراہم کی جانے والی طبی سہولیات اور درپیش مشکلات کے بارے میں معلومات حاصل کیں۔

اس موقع پر میڈیکل سپرنٹنڈنٹ THQ ہسپتال تانگیر نے کمشنر کو ہسپتال میں فراہم کی جانے والی طبی خدمات، دستیاب سہولیات، ادویات و طبی آلات، افرادی قوت اور ہسپتال کو درپیش مختلف مسائل و ضروریات کے حوالے سے تفصیلی بریفنگ دی۔

کمشنر نے ہسپتال کے مسائل اور ضروریات کا بغور جائزہ لیا اور یقین دلایا کہ دورے کے دوران سامنے آنے والے جائز اور حقیقی مسائل کو متعلقہ حکام کے ساتھ اٹھایا جائے گا۔ انہوں نے کہا کہ تانگیر کے عوام کو بہتر، مؤثر اور معیاری طبی سہولیات کی فراہمی کے لیے ہر ممکن اقدامات کیے جائیں گے۔

بعد ازاں کمشنر دیامر/استور ڈویژن نے ایڈیشنل ڈپٹی کمشنر ہاؤس تانگیر کا دورہ کیا، جہاں ایڈیشنل ڈپٹی کمشنر تانگیر نے انہیں ایڈیشنل ڈسٹرکٹ تانگیر کے مجموعی انتظامی امور، ترقیاتی منصوبوں، امن و امان کی صورتحال، بنیادی ضروریات اور عوام کو درپیش اہم مسائل کے بارے میں تفصیلی بریفنگ دی۔

بریفنگ کے دوران تانگیر میں جاری مختلف ترقیاتی منصوبوں کی پیش رفت، سست رفتار اور غیر فعال منصوبوں، بنیادی ڈھانچے، عوامی سہولیات اور دیگر اہم امور پر بھی تفصیلی تبادلہ خیال کیا گیا۔

کمشنر نے متعلقہ افسران کو ہدایت کی کہ تمام ترقیاتی منصوبوں کی باقاعدگی سے نگرانی اور موقع پر معائنہ یقینی بنایا جائے تاکہ منصوبوں میں معیار اور شفافیت برقرار رکھتے ہوئے انہیں مقررہ مدت کے اندر مکمل کیا جا سکے۔ انہوں نے بالخصوص سست رفتار اور تعطل کا شکار منصوبوں کے حوالے سے فوری اقدامات اٹھانے اور ان پر کام کی رفتار تیز کرنے کی ہدایت کی۔

کمشنر نے مزید کہا کہ ترقیاتی منصوبوں کے معیار پر کسی قسم کا سمجھوتہ نہیں کیا جائے گا اور متعلقہ محکمے منصوبوں کی بروقت تکمیل اور مطلوبہ معیار کو یقینی بنانے کے لیے مؤثر نگرانی کریں۔

کمشنر دیامر/استور ڈویژن نے ایڈیشنل ڈپٹی کمشنر تانگیر کی جانب سے نشاندہی کیے گئے عوامی مسائل اور انتظامی ضروریات کا بھی نوٹس لیا اور یقین دلایا کہ جائز عوامی مسائل کے حل کے لیے متعلقہ محکموں کے ذریعے ترجیحی بنیادوں پر اقدامات کیے جائیں گے۔

کمشنر نے اس عزم کا اظہار کیا کہ ڈویژنل انتظامیہ، ضلعی انتظامیہ اور متعلقہ محکموں کے درمیان مؤثر رابطہ اور باہمی تعاون کو مزید مضبوط بنایا جائے گا تاکہ ایڈیشنل ڈسٹرکٹ تانگیر میں گورننس، ترقیاتی سرگرمیوں اور عوامی خدمات کی فراہمی کو مزید بہتر بنایا جا سکے۔

دفتر ایڈیشنل ڈپٹی کمشنر تانگیر

14/08/2026

*پریس نوٹ*

*چلاس: بوائز ماڈل ہائی سکول میں یوم آزادی پاکستان جوش و جذبے سے منایا گیا*

چلاس، 14 اگست 2026
ضلعی انتظامیہ اور محکمہ تعلیم ضلع دیامر کے زیر اہتمام بوائز ماڈل ہائی سکول چلاس میں 14 اگست یوم آزادی پاکستان کی پروقار تقریب بڑے جوش و خروش سے منائی گئی۔
تقریب کے مہمانِ خصوصی ڈویژنل کمشنر دیامر-استور ڈویژن عظیم اللہ تھے۔ تقریب کے صدر محفل ڈپٹی کمشنر دیامر لیفٹننٹ (ر) اویس احمد عباسی تھے۔ پروگرام کا آغاز صبح 7:59 بجے سائرن کی آواز سے ہوا۔ 8:00 بجے پرچم کشائی، قومی ترانہ اور سلامی پیش کی گئی۔ اس کے بعد تلاوتِ قرآن پاک، نعتِ رسول، ملی نغمے اور یوم آزادی کے موضوع پر تقاریر پیش کی گئیں۔
بوائز ماڈل ہائی سکول چلاس، ہائی سکول تکیہ اور ہائی سکول شاہین کوٹ کے طلبہ نے تقریب میں بھرپور شرکت کی۔ طلبہ نے اپنی تقاریر میں پاکستان کے قیام کی جدوجہد، قائد اعظم کے فرمودات اور شہداء کی قربانیوں کو خراجِ عقیدت پیش کیا۔
مہمانِ خصوصی کمشنر عظیم اللہ نے کہا کہ 14 اگست ہمیں شہداء کی عظیم قربانیوں کی یاد دلاتا ہے۔ یہ ایک خواب کی تعبیر کا دن ہے۔ آزادی ایک بہت بڑی نعمت ہے اور اس کی حفاظت ہم سب کی مشترکہ ذمہ داری ہے۔ انہوں نے کہا کہ اتحاد، ایمان اور نظم و ضبط کو اپنا کر ہی ہم ملک اور ضلع کو ترقی کی راہ پر گامزن کر سکتے ہیں۔ کمشنر صاحب نے کہا کہ 1947 میں گلگت بلتستان کے لوگوں نے ڈوگروں کو بھگا کر پاکستان سے کھلے دل سے الحاق کیا تھا۔ آج ہمیں عہد کرنا ہے کہ پاکستان بشمول گلگت بلتستان کو مضبوط بنائیں گے۔ انہوں نے بوائز ماڈل ہائی سکول کو اپگریڈ کرنے اور دیگر مسائل حل کرنے کی یقین دہانی بھی کرائی۔
صدر محفل كیفٹنٹ (ر) ڈپٹی کمشنر اویس احمد عباسی نے کہا کہ پاکستان کی تاریخ کا یہ روشن باب ہے۔ اس وطن کی خاطر ہمارے آباؤ اجداد نے جانوں کی قربانیاں دیں۔ پاکستان کی ترقی کا دارومدار پڑھے لکھے نوجوانوں پر ہے۔
حقوق دو تحریک کے صدر مولانا حضرت اللہ نے کہا کہ پاکستان کلمے کی بنیاد پر وجود میں آیا۔ ہمارا ملک بدامنی اور سازشوں کے باوجود بنیان المرصوص جیسے معرکوں میں سرخرو ہوا۔ اب مکہ معاہدہ سے وطن عزیز مزید مضبوط ہوگا۔

سابق ڈپٹی کمشنر آدم شاہ نے کہا کہ ہمیں تعصبات سے بالاتر ہو کر اتحاد کا مظاہرہ کرنا ہوگا اور ملک کی ترقی کے لیے کام کرنا ہوگا۔سول سوسائٹی کے نمائندوں نے کہا کہ یوم آزادی کا پیغام یہ ہے کہ ہم فرقہ واریت اور نفرت کو چھوڑ کر اتحاد کی فضا قائم کریں۔ تعلیم، امن اور بھائی چارے سے ہی ضلع دیامر ترقی کر سکتا ہے۔تقریب کے اختتام پر نمایاں کارکردگی دکھانے والے اساتذہ اور طلبہ میں اسناد اور انعامات تقسیم کیے گئے۔ آخر میں ملک و قوم کی سلامتی اور ترقی کے لیے خصوصی دعا کی گئی۔
تقریب میں ڈی آئی جی دیامر رینج ارسلان شاہ زیب ڈپٹی ڈائریکٹر محکمہ تعلیم رحیم اللہ اسسٹنٹ ڈائریکٹر انفارمیشن شفقت محمود ،ڈپٹی ڈائریکٹر محکمہ زراعت، سول سوسائٹی، یوتھ اور میڈیا کے نمائندوں سمیت کثیر تعداد میں لوگوں نے شرکت کی۔
# #

14/08/2026

چلاس ۔ ڈویژنل کمشنر دیامر استور ڈویژن عظیم اللہ ۔ ڈپٹی کمشنر دیامر لیفٹیننٹ ریٹائرڈ محمد اویس عباسی آر ایچ کیو ہسپتال چلاس میں مریضوں کی عیادت کررہے ہیں