21/05/2026
ایون رورل ہیلتھ سنٹر بنیادی سہولیات سے محروم
ایون: رورل ہیلتھ سنٹر ایون میں بنیادی طبی سہولیات کے فقدان نے مقامی آبادی کو شدید مشکلات سے دوچار کر دیا ہے۔ یہ ہسپتال کلاش ویلیز بومبوریت، رمبور اور بریر ویلی پر مشتمل واحد رورل ہیلتھ سنٹر ہے جہاں ہزاروں افراد علاج معالجے کے لیے رجوع کرتے ہیں، مگر افسوس کے ساتھ یہاں بنیادی طبی سہولیات نہ ہونے کے برابر ہیں۔
علاقہ مکینوں کے مطابق ہسپتال میں گزشتہ تقریباً چھ ماہ سے مستقل ڈاکٹر موجود نہیں جبکہ ٹیکنیشن حضرات ہی ہسپتال کے امور چلا رہے ہیں۔ ہسپتال میں لیڈی ڈاکٹر کی عدم دستیابی کے باعث خواتین مریضوں کو شدید مشکلات کا سامنا کرنا پڑ رہا ہے۔
اسی طرح ہسپتال میں ڈینٹل سرجن بھی موجود نہیں، جبکہ ایکس رے ٹیکنیشن اور ای پی آئی ٹیکنیشن کی بھی شدید کمی ہے۔ عوام کا کہنا ہے کہ ایمرجنسی ادویات بالکل موجود نہیں جس کی وجہ سے ہنگامی صورتحال میں مریضوں کو فوری طبی امداد فراہم کرنا ممکن نہیں رہتا۔
ہسپتال میں لیبارٹری تو موجود ہے مگر ضروری آلات نہ ہونے کے برابر ہیں، جبکہ ایکس رے ٹیکنیشن نہ ہونے کی وجہ سے کلاس فور ملازم ایکس رے کے امور انجام دے رہا ہے، جو انتہائی تشویشناک صورتحال ہے۔ ادویات کی قلت کے باعث غریب مریض نجی میڈیکل سٹورز سے مہنگی دوائیں خریدنے پر مجبور ہیں۔
اہلِ علاقہ، سماجی حلقوں اور عوامی نمائندوں نے جناب ڈپٹی کمشنر لوئر چترال اور ڈی ایچ او لوئر چترال سے پرزور مطالبہ کیا ہے کہ ایون رورل ہیلتھ سنٹر میں ہنگامی بنیادوں پر ڈاکٹرز، ایک لیڈی ڈاکٹر، ڈینٹل سرجن، ، ایکس رے ٹیکنیشن اور ای پی آئی ٹیکنیشن تعینات کیے جائیں، جبکہ ضروری ادویات، ایمرجنسی میڈیسن اور لیبارٹری آلات کی فوری فراہمی یقینی بنائی جائے تاکہ کلاش ویلیز اور ایون کے عوام کو بنیادی صحت کی سہولیات میسر آ سکیں۔۔
Deputy Commissioner Lower Chitral
Chief Minister Khyber Pakhtunkhwa
Chief Secretary Khyber Pakhtunkhwa
Prime Minister's Office of Pakistan
Health Department, KP
Ministry of Health and Family Welfare,
