27/02/2026
گلگت سکوار میں 22 سالہ خاتون کی مبینہ خودکشی کی اطلاع موصول ہوئی ہے۔ پولیس کے مطابق متوفیہ کا تعلق ضلع استور سے تھا اور وہ کچھ عرصے سے گلگت میں مقیم تھیں۔ اطلاع ملتے ہی پولیس موقع پر پہنچی، شواہد اکٹھے کیے اور قانونی تقاضے مکمل کر لیے گئے۔ واقعے کی تحقیقات ہر زاویے سے جاری ہیں تاکہ تمام حقائق سامنے لائے جا سکیں۔
دوسری جانب ڈاکٹر اکبر ناصر خاں، انسپکٹر جنرل آف پولیس گلگت بلتستان، کی زیر صدارت آج ایک اجلاس میں خودکشی کے واقعات کی تفتیش کو نہایت سنجیدگی، پیشہ ورانہ مہارت اور فرانزک شواہد کی بنیاد پر مکمل کرنے کی ہدایت جاری کی گئی۔ اجلاس میں تمام ضلعی پولیس افسران کو تاکید کی گئی کہ ایسے ہر واقعے کے تمام ممکنہ پہلوؤں کا باریک بینی سے جائزہ لیا جائے تاکہ کسی بھی مجرمانہ عنصر کو نظر انداز نہ کیا جائے۔
پولیس حکام کا کہنا ہے کہ گلگت بلتستان پولیس اس امر کو یقینی بنا رہی ہے کہ مذکورہ واقعے کی تفتیش میرٹ، شفافیت اور مکمل شواہد کی بنیاد پر کی جائے۔ حکام کے مطابق تحقیقات میں پیش رفت سے عوام کو بروقت آگاہ کیا جائے گا۔
