Suno Gilgit-Baltistan, Shahrah-e-Quaid-e-Azam, Gilgit (2026)

09/05/2026

قطر نے امریکا سے کہا ہے کہ دوحہ میں مقیم افغان مہاجرین کو 29 ستمبر 2026 تک کسی اور مقام پر منتقل کیا جائے کیونکہ ان کی میزبانی کا معاہدہ عارضی بنیادوں پر کیا گیا تھا۔

امریکی محکمہ خارجہ کی جانب سے جاری سفارتی دستاویزات کے مطابق دونوں ممالک نے اس معاہدے کو 2026 تک بڑھانے پر اتفاق کیا ہے تاہم قطر نے واضح کیا ہے کہ یہ معاہدہ مستقل نہیں ہو سکتا۔

یہ معاہدہ ان افغان شہریوں سے متعلق ہے جنہیں 2021 میں طالبان کے افغانستان پر کنٹرول کے بعد افغانستان سے نکالا گیا تھا۔

رپورٹ کے مطابق ان افراد کو دوحہ کے قریب واقع ’کیمپ السیلیہ‘ میں رکھا گیا ہے جہاں وہ امریکا یا دیگر ممالک میں آبادکاری کے منتظر ہیں۔ اس وقت 1100 سے زائد افغان مہاجرین اس مرکز میں موجود ہیں۔

دستاویزات کے مطابق قطر نے امریکا سے مطالبہ کیا ہے کہ کیمپ میں موجود تمام افراد کی قانونی حیثیت کا فیصلہ کیا جائے جبکہ مزید افغان مہاجرین کو قطر نہ بھیجنے کی درخواست بھی کی گئی ہے۔

کیمپ السیلیہ 2021 میں افغانستان سے امریکی انخلا کے دوران ایک اہم ٹرانزٹ مرکز کے طور پر استعمال ہوا تھا جہاں ہزاروں افغان شہریوں کو بیرون ملک آبادکاری کے لیے پروسیس کیا گیا۔

یہ معاہدہ ابتدا میں 2023 میں طے پایا تھا جس میں 2024 کے بعد اب ایک اور توسیع کی گئی ہے، معاہدے کے تحت مقررہ مدت ختم ہونے کے بعد مہاجرین کی منتقلی کی ذمہ داری امریکا پر عائد ہوگی۔

09/05/2026

عمر کی تصدیق کرنے والی ویب سائٹس، ایپ اور ڈیوائسز اب معمول بنتی جا رہی ہیں کیونکہ دنیا بھر میں حکومتوں کی جانب سے بچوں کو نقصان دہ مواد سے تحفظ فراہم کرنے کے لیے اقدامات کیے جا رہے ہیں۔

یہی وجہ ہے کہ میٹا نے کم عمر صارفین کی عمر کی تصدیق کے لیے نئے اقدامات کرنے کا اعلان کیا ہے جو آرٹی فیشل انٹیلی جنس (اے آئی) ٹیکنالوجی پر مبنی ہیں۔

خاص طور پر ایک سسٹم کسی پروفائل سے جڑے کلیو جیسے سالگرہ یا دیگر کو اکٹھا کرکے کسی صارف کی عمر کا تعین کرنے میں مدد فراہم کرے گا۔

میٹا کی جانب سے جاری بیان میں بتایا گیا کہ ہم یہ واضح کرنا چاہتے ہیں کہ یہ چہرہ شناخت کرنے والا سسٹم نہیں، ہمارا اے آئی سسٹم بصری اشاروں اور عام چیزوں جیسے قد یا ہڈیوں کی ساخت کو دیکھ کر کسی فرد کی عمومی عمر کا تخمینہ لگاتا ہے۔

جن صارفین کے حوالے سے شک ہوگا کہ ان کی عمر 13 سال سے کم ہے، ان کے اکاؤنٹس ڈی ایکٹیویٹ کر دیے جائیں گے اور پھر انہیں اپنی عمر کے ثبوت فراہم کرنا ہوں گے، تاکہ اکاؤنٹ کو واپس حاصل کرسکیں۔

فیس بک اور انسٹا گرام کے صارفین بھی 13 سال سے کم عمر بچوں کے اکاؤنٹس کو رپورٹ کرسکتے ہیں اور میٹا کے مطابق اس طرح کم عمر صارفین کے اکاؤنٹس کی شناخت اور ڈیلیٹ کرنے میں مدد ملے گی۔

کمپنی نے کہا کہ ہم نوجوانوں کو آن لائن محفوظ اور مثبت تجربہ فراہم کرنا چاہتے ہیں اور اس حوالے سے ہم برسوں سے ٹولز اور فیچرز تیار کر رہے ہیں تاکہ کم عمر صارفین کو محفوظ اور ان کی عمر کے مطابق تجربہ فراہم کیا جاسکے۔

کمپنی کے مطابق اس طرح کے مزید اے آئی ٹولز کو میٹا پلیٹ فارمز پر کم عمر صارفین کو شناخت کرنے کے لیے استعمال کیا جا رہا ہے۔

اس نئی ٹیکنالوجی کو اب نئے خطوں میں متعارف کرایا جا رہا ہے۔

09/05/2026

تصور کریں کہ آپ کو ملازمت نہیں مل رہی تو والدین ہی آپ کو اجرت پر 'کل وقتی بچوں یا فل ٹائم چلڈرن' کے طور پر بھرتی کرلیں تو پھر؟

یقین کرنا مشکل ہوگا مگر ایک ملک میں واقعی یہ رجحان عام ہوتا جا رہا ہے۔

جی ہاں واقعی چین میں بھرپور کوششوں کے باوجود ملازمتوں حاصل کرنے میں ناکام نوجوان والدین کے ملازمین بننے کو ترجیح دے رہے ہیں۔

چین میں فل ٹائم چلڈرن کی اصطلاح سے مراد والدین کا کل وقتی ملازم ہوتا ہے۔

ایسے نوجوانوں کو والدین کی جانب سے ماہانہ تنخواہ ملتی ہے جو ایک سے 5 ہزار یوآن کے درمیان ہوتی ہے، جس کا انحصار والدین کی پنشن یا آمدنی پر ہوتا ہے۔

تنخواہ کے بدلے میں یہ نوجوان والدین کے ساتھ وقت گزارتے ہیں اور مشکل کام جیسے موبائل ایپس چلانے میں مدد فراہم کرتے ہیں۔

ایسے نوجوانوں کا کہنا ہے کہ وہ اپنے والدین کی نگہداشت کرنے کے ساتھ انہیں جذباتی سپورٹ فراہم کرتے ہیں اور یہ کام کسی ملازمت سے مختلف نہیں اور یہی وجہ ہے کہ وہ تنخواہوں کے حقدار ہیں۔

ایک خاتون شیاویا نے کہا کہ 15 ماہ تک والدین کی ملازمت کرنے کے بعد وہ کسی روایتی ملازمت کرنے کا ارادہ رکھتی ہیں۔

اس سے قبل یہ خاتون ایک ملازمت کرچکی تھیں مگر ساتھیوں کے خراب رویے کی وجہ سے اسے چھوڑنا پڑا۔

اس ملازمت کے بعد سرکاری ملازمت کے امتحان کی تیاری کے لیے والدین کی ملازمت کرنے کا فیصلہ کیا۔

والدین کی جانب سے خاتون کو ہر ماہ 3 ہزار یوآن دیے جاتے تھے۔

مگر ایک دن والدین نے کہا کہ اب بہت ہوگیا اور بازار میں خاتون کو باتیں سنائیں جس کے بعد انہوں نے نئی ملازمت تلاش کرنے کا فیصلہ کیا۔

واضح رہے کہ چین میں 16 سے 24 سال کی عمر کے نوجوانوں میں بیروزگاری کی شرح 14 سے 18 فیصد کے درمیان ہے۔

ایک اور خاتون ایلا نے بتایا کہ وہ اپنے والدین کی ملازمت کر رہی ہیں کیونکہ دادا کے انتقال کے بعد والد ڈپریشن کا شکار ہوگئے تھے۔

اس ملازمت کے دوران وہ والدین کو آن لائن خریداری میں مدد فراہم کرتی ہیں، ڈرائیونگ اور ان کے سفر کی منصوبہ بندی کرتی ہیں۔

09/05/2026

فالج ایسا مرض ہے جس کے شکار فرد کا فوری علاج نہ ہو تو موت کا خطرہ بہت زیادہ بڑھ جاتا ہے۔

فالج کے شکار فرد کا فوری علاج نہ ہو تو موت کا خطرہ بہت زیادہ بڑھ جاتا ہے اور یہی وجہ ہے کہ اس کا خطرہ بڑھانے والے عناصر اور علامات پر نظر رکھنا ضروری ہے۔

فالج کی 2 اقسام ہیں ایک برین ہیمرج جس میں دماغی شریان پھٹ جاتی ہے جبکہ دوسری قسم میں دماغ کو خون پہنچانے والی شریان بلاک ہوجاتی ہے جس سے آکسیجن کی کمی ہوتی ہے اور دماغ کو نقصان پہنچتا ہے۔

فالج کا سامنا ہر فرد کو ہوسکتا ہے مگر اس کا خطرہ ہر فرد کے لیے مختلف ہوتا ہے۔

عمر بڑھنے کے باوجود جوان رہنا چاہتے ہیں؟ تو ایک عادت آج ہی اپنالیں

55 سال کی عمر کے بعد ہر 10 سال بعد فالج کا خطرہ دگنا بڑھ جاتا ہے جبکہ ذیابیطس، ہائی بلڈ پریشر، موٹاپے اور ہائی کولیسٹرول سے بھی فالج کا خطرہ بڑھتا ہے۔

اب ایک نئی تحقیق میں چند ایسی علامات کے بارے میں بتایا گیا ہے جن سے فالج کا عندیہ کافی عرصے پہلے ہی مل جاتا ہے۔

چین کے Zhejiang یونیورسٹی اسکول آف میڈیسن کی تحقیق میں بتایا گیا کہ مسلز کے حجم میں کمی، ہاتھوں کی کمزور گرفت اور سست روی سے چلنے سے کسی فرد میں فالج کے خطرے میں اضافے کا عندیہ ملتا ہے۔

تحقیق میں بتایا گیا کہ جن افراد کے مسلز کی مضبوطی گھٹ جاتی ہے، ان میں کسی بھی قسم کے فالج کا خطرہ 30 فیصد تک بڑھ جاتا ہے۔

سائنسدانوں نے توند کی چربی کو روکنے کا نیا طریقہ دریافت کرلیا

اسی طرح ہاتھ کی کمزور گرفت سے فالج کا خطرہ 7 فیصد تک بڑھ جاتا ہے۔

تحقیق کے مطابق چلنے کی سست رفتار سے فالج کا خطرہ 64 فیصد تک بڑھ جاتا ہے۔

اس تحقیق میں 4 لاکھ 80 ہزار سے زائد افراد کے ڈیٹا کی جانچ پڑتال کی گئی۔

یہ سب سے افراد شروع میں فالج سے محفوظ تھے اور پھر ان کی صحت کا جائزہ کچھ برسوں تک لیا گیا۔

نتائج سے معلوم ہوا کہ مسلز کے حجم میں کمی، ہاتھ کی گرفت میں کمزوری اور چلنے کی رفتار میں کمی اور فالج کے زیادہ خطرے کے درمیان تعلق موجود ہے۔

درمیانی عمر کی وہ عام ترین عادت جو ہارٹ اٹیک کا شکار بنا سکتی ہے

محققین نے بتایا کہ عمر میں اضافے کے ساتھ مسلز کی مضبوطی اور حجم میں قدرتی طور پر کمی آتی ہے مگر ایسا بہت زیادہ تیزی سے ہو تو یہ فالج کے خطرے کی جانب اشارہ کرتا ہے کیونکہ اس کا مطلب یہ ہوتا ہے کہ جسم کمزو ہو رہا ہے، ورم بڑھ رہا ہے جبکہ میٹابولزم افعال تبدیل ہوگئے ہیں۔

انہوں نے مزید بتایا کہ مسلز کی کمزوری فالج کے زیادہ خطرے کی پہلی انتباہی علامت ہوسکتی ہے۔

ان کا کہنا تھا کہ چلنے کی رفتار میں کمی فالج کے زیادہ خطرے کے حوالے سے زیادہ ٹھوس علامت ہوتی ہے کیونکہ اس سے مجموعی صحت متاثر ہونے کا عندیہ ملتا ہے۔

روزانہ ایک سیب کھانے کی عادت ایک بہت عام دائمی مرض سے بچانے کیلئے مفید

فالج کی عام ترین علامات
فالج کی یہ عام علامات اچانک نمودار ہوتی ہیں جس کے دوران جسم کا ایک حصہ سن ہوجاتا ہے یا چلنا ممکن نہیں ہوتا، بات کرنا مشکل ہوجاتا ہے یا لوگوں کی بات سمجھ نہیں آتی، ایک جانب سے چہرہ ڈھلک جاتا ہے اور مسکرانا ممکن نہیں ہوتا، ذہنی الجھن، سر چکرانا اور ایک یا دونوں آنکھوں کی بینائی تبدیل ہوجانے جیسی علامات کا سامنا ہوسکتا ہے۔

خواتین میں فالج کی علامات مختلف ہوسکتی ہیں جیسے سردرد، ذہنی کیفیت بدل جانا، کوما اور شعور نہ رہنا وغیرہ۔

09/05/2026

’کانز فلم فیسٹیول 2026‘ کی الٹی گنتی شروع ہوچکی ہے اور بھارتی فلم انڈسٹری ایک بار پھر عالمی اسٹیج پر اپنی دھاک بٹھانے کے لیے پوری طرح تیار ہے۔

اس سال بولی ووڈ کی صفِ اول کی اداکارائیں ایشوریا رائے بچن، عالیہ بھٹ اور ادیتی راؤ حیدری فرانس کے خوبصورت ساحلی مقام ’فرانسیسی رویرا‘ پر اپنے حسن اور اسٹائل کے جلوے بکھیریں گی۔

انڈیا ٹوڈے کی رپورٹ کے مطابق بھارتی اداکارہ عالیہ بھٹ مسلسل دوسرے سال اس عالمی میلے میں بطور گلوبل ایمبیسڈر شرکت کر رہی ہیں۔

اپنی واپسی پر خوشی کا اظہار کرتے ہوئے عالیہ بھٹ نے کہا کہ لوریل پیرس کے ساتھ دوسری بار کانز آنا میرے لیے بہت خاص ہے۔ پچھلا سال ایک ناقابل فراموش تجربہ تھا اور میں اس بار ایک بڑے جشن کا حصہ بننے کے لیے بہت پرجوش ہوں۔

انہوں نے مزید کہا کہ یہاں خواتین کے درمیان ایک خوبصورت توانائی کا احساس ملتا ہے، جہاں ان کی آوازوں کو اہمیت دی جاتی ہے۔ میرے لیے یہ فخر کی بات ہے کہ میں ایک ایسے برانڈ کے ساتھ جڑی ہوں جو خواتین کی قدر اور ان کی خود مختاری کو دنیا بھر میں فروغ دیتا ہے۔

اداکارہ ادیتی راؤ حیدری کا کہنا تھا کہ کانز جیسا عالمی پلیٹ فارم اور خواتین کو بااختیار بنانے والے برانڈ کے ساتھ کام کرنا میرے لیے بہت معنی رکھتا ہے۔

انہوں نے اپنے جذبات بیان کرتے ہوئے کہا کہ کانز میں نمائندگی کرنا میرے لیے اعزاز کی بات ہے کیونکہ میرے نزدیک اصل خوبصورتی یہ ہے کہ آپ جیسے ہیں خود کو ویسے ہی قبول کریں اور اپنی انفرادیت پر پراعتماد رہیں۔

اس سال صرف ریڈ کارپٹ ہی نہیں بلکہ بھارتی سنیما نے تخلیقی میدان میں بھی اہم کامیابی حاصل کی ہے۔ معروف فلم ساز پائل کپاڑیا کو کانز کرٹکس ویک کے 65ویں ایڈیشن کی جیوری کی صدارت سونپی گئی ہے۔

کانز 2026 کی اس سال کی نمائندگی میں اسٹائل کے ساتھ ساتھ مقصدیت پر بھی توجہ دی گئی ہے تاکہ عالمی ریڈ کارپیٹ پرخواتین کی مضبوط آواز سنی جا سکے۔

یہ فیسٹیول 12 مئی 2026 سے شروع ہوگا اور 23 مئی 2026 تک جاری رہے گا۔ روایتی طور پر یہ میلہ مئی کے وسط میں منعقد کیا جاتا ہے اور تقریباً 12 دنوں تک جاری رہتا ہے۔

ایشوریا رائے بچن کی روایتی خوبصورتی سے لے کر عالیہ اور ادیتی کے جدید انداز تک، پوری دنیا کی نظریں اس فیسٹیول پر لگی ہوئی ہیں جو اپنی منفرد جمالیات اور فن کے ذریعے ایک بار پھر تاریخ رقم کرنے کے لیے تیار ہیں۔

پائل کپاڈیا جیسے باصلاحیت فلم سازوں کی موجودگی اس میلے کو بھارتی سنیما کے لیے مزید یادگار بنا دے گی۔

09/05/2026

گرمیوں کے آغاز اور پری مون سون سیزن کے قریب آتے ہی ماہرین صحت نے والدین کو خبردار کیا ہے کہ وہ بچوں کی خصوصی دیکھ بھال کریں، کیونکہ شدید گرمی میں پانی، نمکیات اور زنک کی کمی کے باعث بچوں میں اسہال اور قے جیسے امراض تیزی سے پھیل سکتے ہیں۔

کراچی کے ماہر امراض اطفال و معدہ پروفیسر ڈاکٹر اقبال اے میمن کے مطابق موسمی تبدیلی کے دوران بچوں کا مدافعتی نظام کمزور ہوتا ہے، جس کے باعث وہ بیماریوں کا زیادہ شکار ہوتے ہیں۔ ان کا کہنا تھا کہ گرمی، آلودہ پانی اور غیر معیاری خوراک بچوں میں معدے کے انفیکشن کا خطرہ بڑھا دیتے ہیں۔

ماہرین کے مطابق بچوں کے جسم سے پسینے اور بیماری کے باعث پانی اور ضروری نمکیات تیزی سے خارج ہو جاتے ہیں، جس سے کمزوری اور ڈی ہائیڈریشن کا خطرہ بڑھ جاتا ہے۔ اسہال بچوں میں گرمیوں کے دوران عام بیماری ہے، جو بار بار ہونے کی صورت میں سنگین صورتحال اختیار کر سکتی ہے۔

ڈاکٹرز نے ہدایت کی ہے کہ اسہال یا قے کی صورت میں بچوں کو فوری طور پر زیادہ مقدار میں پانی اور مائعات دیے جائیں۔ عالمی ادارہ صحت کی ہدایات کے مطابق او آر ایس کا استعمال فوری شروع کرنا چاہیے تاکہ جسم میں پانی اور نمکیات کی کمی پوری کی جا سکے۔

ماہرین نے کم شکر والے (لو اوسمولیرٹی) او آر ایس کے استعمال کو زیادہ مؤثر قرار دیا ہے، جو بچوں میں پانی کے بہتر جذب، قے اور اسہال میں کمی اور ڈرپ کی ضرورت کم کرنے میں مدد دیتا ہے۔

ڈاکٹر اقبال میمن کے مطابق اگر بیماری کی شدت برقرار رہے تو ڈاکٹر سے رجوع کرنا ضروری ہے، کیونکہ بعض صورتوں میں زنک بھی تجویز کیا جاتا ہے، جو نہ صرف اسہال کی شدت اور دورانیہ کم کرتا ہے بلکہ آئندہ بیماری سے بھی تحفظ دیتا ہے۔

ماہرین نے زور دیا ہے کہ اسہال کے دوران بچوں کو کھانا دینا بند نہ کیا جائے بلکہ ہلکی اور متوازن غذا دی جائے، جبکہ جوسز سے پرہیز کیا جائے۔ اس کے بجائے سادہ پانی، او آر ایس، لسی، ناریل پانی اور چاول جیسی غذائیں مفید ہیں۔

انہوں نے والدین کو مشورہ دیا کہ بچوں میں بیماری کی ابتدائی علامات پر نظر رکھیں، صاف پانی اور معیاری خوراک کا اہتمام کریں اور بروقت علاج کو یقینی بنائیں تاکہ گرمیوں میں بچوں کو سنگین طبی مسائل سے محفوظ رکھا جا سکے۔

09/05/2026

پاکستان میں سونے کی قیمت میں ایک روز اضافے کے بعد آج نمایاں کمی ریکارڈ کی گئی ہے۔

آل پاکستان صرافہ جیمز اینڈ جیولرز ایسوسی ایشن کے مطابق فی تولہ سونے کی قیمت 2700 روپے کم ہو کر 4 لاکھ 94 ہزار 62 روپے ہو گئی ہے۔

اسی طرح 10 گرام سونے کی قیمت 2315 روپے کمی کے بعد 4 لاکھ 23 ہزار 578 روپے تک آ گئی ہے۔

دوسری جانب عالمی مارکیٹ میں بھی سونے کی قیمت میں کمی دیکھی گئی، جہاں فی اونس قیمت 27 ڈالر کم ہو کر 4717 ڈالر ہو گئی ہے۔

مقامی صرافہ مارکیٹ میں سونے کے برعکس فی تولہ چاندی کی قیمت 80 روپے بڑھ کر 8525 روپے ہوگئی۔

واضح رہے کہ گزشتہ روز ملک میں سونے کی قیمتوں میں نمایاں اضافہ ہوا تھا، جب فی تولہ قیمت 7800 روپے جبکہ 10 گرام سونا 6687 روپے مہنگا ہوا تھا۔

09/05/2026

دنیا میں جب بھی کوئی بڑا واقعہ یا وبا پھوٹتی ہے تو اس سے متعلق سازشی نظریات بھی فوراً سامنے آجاتے ہیں۔ ہنٹا وائرس کے حالیہ کیسز اور ہلاکتیں سامنے آنے کے بعد بھی ایسا ہی ہوا اور مائیکروسافٹ کے بانی بل گیٹس کا ایک پرانا انٹرویو دوبارہ سوشل میڈیا پر وائرل ہو گیا ہے. اس انٹرویو میں انہوں نے خبردار کیا تھا کہ مستقبل میں آنے والی وبا کوِوڈ 19 سے بھی زیادہ خطرناک ہو سکتی ہے۔

ہنٹا وائرس کے سامنے آنے کے بعد سوشل میڈیا پر مختلف دعوے گردش کر رہے ہیں، ان دعوؤں میں سے ایک یہ بھی ہے کہ بِل گیٹس نے ’ہنٹا وائرس‘ سے متعلق پیش گوئی پہلے ہی کردی تھی۔

بل گیٹس نے ایک پرانے انٹرویو میں کہا تھا کہ دنیا کو آئندہ وباؤں کے لیے زیادہ بہتر تیاری کرنا ہوگی کیوں کہ ’کووڈ 19‘ کوئی آخری عالمی وبا نہیں تھی۔

دوبارہ وائرل ہونے والے اس انٹرویو میں بِل گیٹس نے امریکی نجی ٹی وی کے ایک پروگرام میں گفتگو کرتے ہوئے یہ بھی کہا تھا کہ اگلی وبا ممکنہ طور پر کووڈ سے زیادہ شدید ہو سکتی ہے۔

09/05/2026

امریکی محکمہ جنگ نے دعویٰ کیا ہے کہ خلائی مخلوق سے متعلق دہائیوں پرانے خفیہ دستاویزات اور تصاویر عوام کے لیے جاری کر دی گئی ہیں۔ ہم نے سچ سامنے رکھ دیا ہے، اب عوام خود جو چاہیں فیصلہ کر لیں۔ یہ مواد صدر ڈونلڈ ٹرمپ کے حکم پر ایک سرکاری ویب سائٹ پر اپ لوڈ کیا گیا ہے۔

ایسوسی ایٹڈ پریس ’اے پی‘ کے مطابق امریکی محکمہ دفاع نے آسمان میں نظر آنے والے پراسرار مناظر سے متعلق نئی فائلوں کا اجرا کا آغاز کر دیا ہے۔ حکام کا کہنا ہے کہ ان ریکارڈز کے ذریعے عوام کو موقع دیا جا رہا ہے کہ وہ خود اس حوالے سے دستیاب معلومات کا جائزہ لے کر اپنی رائے قائم کریں۔

اس عمل میں صرف محکمہ دفاع ہی نہیں بل کہ وائٹ ہاؤس، قومی انٹیلی جنس کی ڈائریکٹر، محکمہ توانائی، خلائی تحقیق کا ادارہ اور وفاقی تحقیقاتی ادارہ بھی شامل ہیں۔

محکمہ دفاع نے اپنے ایک بیان میں کہا ہے کہ ماضی کی حکومتوں نے بعض معلومات کو کم اہم ظاہر کرنے یا عوام کو گمراہ کرنے کی کوشش کی، تاہم موجودہ انتظامیہ عوام کے لیے زیادہ سے زیادہ شفافیت کی پالیسی پر عمل پیرا ہے۔ بیان کے مطابق مزید دستاویزات مرحلہ وار جاری کی جائیں گی۔

09/05/2026

آسٹریلیا نے کالعدم بلوچستان لبریشن آرمی (بی ایل اے) اور اس کی قیادت پر انسدادِ دہشت گردی مالی پابندیاں عائد کر دی ہیں۔ آسٹریلوی حکومت نے اسے دہشت گردی کے خلاف اپنے مضبوط مؤقف کا حصہ قرار دیا ہے۔

آسٹریلوی محکمہ خارجہ کی جانب سے جاری بیان کے مطابق ان کی حکومت نے کالعدم بلوچستان لبریشن آرمی (بی ایل اے) اور اس سے وابستہ تین سینئر رہنماؤں پر انسدادِ دہشت گردی مالی پابندیاں نافذ کر دی ہیں۔

آسٹریلوی حکومت کے مطابق یہ فیصلہ دہشت گرد سرگرمیوں میں ملوث ہونے اور ان کی معاونت کے ردعمل میں کیا گیا ہے۔

آسٹریلوی وزیرِ خارجہ پینی وانگ کے مطابق بی ایل اے پاکستان میں متعدد پرتشدد کارروائیوں میں ملوث رہی ہے، جن میں خودکش دھماکے اور دیگر حملے شامل ہیں۔ ان کے مطابق ان حملوں میں عام شہریوں، اہم تنصیبات اور ریاستی اداروں کو نشانہ بنایا گیا۔

آسٹریلوی حکومت نے واضح کیا ہے کہ وہ دہشت گردی اور انتہا پسندی کے خلاف اپنے عزم پر قائم ہے اور ایسے عناصر کے خلاف سخت اقدامات جاری رکھے گی۔

حکام کے مطابق ان پابندیوں کا بنیادی مقصد دہشت گرد تنظیموں کی مالی معاونت کو روکنا ہے تاکہ ان کے لیے فنڈنگ، بھرتی اور سرگرمیوں کا تسلسل مشکل بنایا جا سکے۔

آسٹریلوی حکومت کے مطابق یہ اقدامات عالمی سلامتی اور انسدادِ دہشت گردی پالیسی کا حصہ ہیں، جن کے تحت بین الاقوامی شراکت داروں کے ساتھ تعاون بھی جاری رہے گا۔

09/05/2026

امریکا نے کہا ہے کہ اسے توقع ہے کہ ایران آج جنگ کے خاتمے سے متعلق اپنی نئی سفارتی تجویز پر باضابطہ ردعمل دے گا، جسے خطے میں کشیدگی کم کرنے کی ایک اہم پیش رفت کے طور پر دیکھا جا رہا ہے۔ تاہم اسی دوران خلیج اور آبنائے ہرمز کے حساس آبی راستوں میں صورتِ حال بدستور کشیدہ ہے، جہاں امریکی اور ایرانی فورسز کے درمیان جھڑپوں اور حملوں کے تبادلے کی اطلاعات نے کشیدگی میں مزید اضافہ کر دیا ہے۔

برطانوی خبر رساں ادارے ْرائٹرز‘ کے مطابق امریکا نے کہا ہے کہ اسے توقع ہے کہ ایران آج جنگ کے خاتمے سے متعلق اپنی تازہ تجویز پر ردعمل دے گا۔ یہ پیش رفت ایسے وقت میں سامنے آئی ہے جب خلیج اور آبنائے ہرمز کے اطراف کشیدگی میں مسلسل اضافہ دیکھا جا رہا ہے اور عسکری سرگرمیوں میں تیزی آئی ہے۔

امریکی وزیرِ خارجہ مارکو روبیو نے روم میں صحافیوں سے گفتگو کرتے ہوئے کہا تھا کہ واشنگٹن ایران کے جواب کا منتظر ہے اور امید ہے کہ تہران کا مؤقف ایسا ہوگا جو باضابطہ اور سنجیدہ مذاکرات کے آغاز کی راہ ہموار کرے گا۔

دوسری جانب ایرانی وزارتِ خارجہ کے ترجمان اسماعیل بقائی کا کہنا تھا کہ تہران ابھی تک امریکی تجویز پر کسی حتمی نتیجے پر نہیں پہنچا اور معاملہ تاحال زیر غور ہے۔ ان کے مطابق امریکا کو اس حوالے سے ابھی تک کوئی جواب نہیں دیا گیا۔

وزارتِ خارجہ کے ترجمان اسماعیل بقائی کے مطابق ایران اپنی رائے ثالث ملک پاکستان کو پہنچائے گا، جو اس عمل میں ثالث کا کردار ادا کر رہا ہے۔

اسی دوران ایران کی نیم سرکاری خبر رساں ایجنسی ’فارس‘ کے مطابق آبنائے ہرمز میں ایرانی افواج اور امریکی بحری جہازوں کے درمیان وقفے وقفے سے جھڑپیں جاری رہیں۔ رپورٹ میں دعویٰ کیا گیا ہے کہ کشیدگی کے دوران متعدد واقعات پیش آئے جن میں دونوں جانب سے ایک دوسرے پر کارروائیاں کی گئیں۔

امریکی فوج کے مطابق اس نے ایران سے منسلک دو مزید بحری جہازوں کو نشانہ بنایا جو ایرانی بندرگاہ میں داخل ہونے کی کوشش کر رہے تھے۔ امریکی بیان میں کہا گیا کہ لڑاکا طیارے نے ان جہازوں کے انجن حصوں پر حملہ کر کے انہیں آگے بڑھنے سے روک دیا۔

ادھرایران نے بھی دعویٰ کیا ہے کہ اس کی بحریہ نے خلیج عمان میں ایک کارروائی کے دوران ’اوشن کوئی‘ نامی آئل ٹینکر کو قبضے میں لے لیا، جس پر ایرانی تیل کی برآمدات میں خلل ڈالنے اور قومی مفادات کو نقصان پہنچانے کی کوشش کا الزام عائد کیا گیا ہے۔

اس سے قبل امریکی صدر ڈونلڈ ٹرمپ نے کہا تھا کہ اگرچہ خطے میں جھڑپیں جاری ہیں، تاہم ایران کے ساتھ جنگ بندی اب بھی برقرار ہے۔ ان کے مطابق امریکی بحری جہازوں پر حملوں کا جواب دیا گیا، لیکن صورتِ حال مکمل جنگ کی طرف نہیں بڑھی۔

دوسری جانب ایران نے امریکا پر جنگ بندی کی خلاف ورزی کا الزام عائد کرتے ہوئے کہا ہے کہ امریکی کارروائیاں خطے میں کشیدگی میں اضافہ کر رہی ہیں۔ ایرانی حکام کے مطابق خلیج کے مختلف علاقوں میں امریکی اور اتحادی اہداف پر جوابی کارروائیاں بھی کی گئی ہیں۔

ایرانی وزیرِ خارجہ عباس عراقچی کے مطابق ایران کسی دباؤ کے سامنے نہیں جھکے گا اور ہر بار جب سفارتی حل قریب ہوتا ہے تو امریکا فوجی کارروائی کی طرف چلا جاتا ہے۔ ان کے مطابق خطے میں کشیدگی کے باوجود ایران کا مؤقف واضح ہے۔

Suno Gilgit-Baltistan

09/05/2026

09/05/2026

09/05/2026

09/05/2026

09/05/2026

09/05/2026

09/05/2026

09/05/2026

09/05/2026

09/05/2026

09/05/2026

Address

Telephone

Website

Alerts

Contact The Business

Shortcuts

Share

Category