GILGIT UPDATES, street 7, Gilgit (2025)

26/10/2025

Paid Content 🎬
لاہور میں مقیم گلگت بلتستان اور چترال کمیونٹی کے لیے خوشخبری!

*گرینڈ سٹی انٹرنیشنل، روڈا فیز 1، لاہور*

پاکستان کا سب سے بڑا ریور فرنٹ شہر!
حکومت پنجاب کی مکمل گارنٹی

✅5,3.5، سات اور 10مرلہ پلاٹس-
✅ ماہانہ قسط صرف 9500 روپے سے -
✅ 4 سالہ آسان اقساط-
اندرون لاہور سے صرف 10 منٹ کا فاصلہ،
لاہور گلبرگ سے 25 منٹ کا فاصلہ،

لاہور شہر میں گلگت بلتستان ، چترال اور اسماعیلی کمیونٹی کے لیے اسپیشل "الرحیم بلاک میں 500 پلاٹس مختص" جہاں جماعت خانے کےلیے 10 کنال زمین الاٹ۔
لوکیشن:
📍 رنگ روڈ , محمود بوٹی لاہور
ڈویلپمنٹ کا کام تیزی سے جاری

بکنگ کے لیے فوری رابطہ کریں 03129533394

23/10/2025

بالاورستان نیشنل فرنٹ کا اہم اجلاس، تنظیمی ڈھانچے کو فعال بنانے اور مرکزی کونسل کے قیام کا فیصلہ

گلگت (پریس ریلیز، 22 اکتوبر 2025)
بالاورستان نیشنل فرنٹ (بی این ایف) کا ایک اہم اجلاس قائدِ تحریک نواز خان ناجی کی زیرِ صدارت گلگت میں منعقد ہوا، جس میں تنظیم کے مدعو اراکین نے شرکت کی۔

اجلاس میں موجودہ عالمی حالات اور خطۂ بالاورستان پر ان کے ممکنہ اثرات، گلگت بلتستان کے مستقبل میں قومی تحریک کی اہمیت، اور قوم پرستوں کے مؤثر کردار پر تفصیلی غور کیا گیا۔ اس موقع پر بی این ایف کے تنظیمی ڈھانچے کو فعال بنانے کے لیے سینٹرل کمانڈ کے قیام کا فیصلہ کیا گیا، جبکہ باہمی رابطے کے لیے ایک ڈیجیٹل پلیٹ فارم تشکیل دینے پر بھی اتفاق کیا گیا تاکہ تمام کارکنان تک بروقت آگاہی پہنچائی جا سکے۔

اجلاس میں طے پایا کہ آئندہ ماہ پارٹی کی مرکزی کونسل تشکیل دی جائے گی اور ذمہ داران کے انتخاب کا طریقہ کار طے کر کے الیکشن کمیشن کے ذمہ داران کا چناؤ مکمل کیا جائے گا، جو آئندہ لائحہ عمل پارٹی کو پیش کریں گے۔

شرکائے اجلاس نے اس امر پر زور دیا کہ گلگت بلتستان کے سیاسی مسائل پر بی این ایف کے کارکن پارٹی پروگرام کے مطابق بھرپور کردار ادا کریں گے۔ تاہم یہ بھی واضح کیا گیا کہ غیرضروری اور وقتی نوعیت کے سماجی ایشوز میں پارٹی کی شمولیت قائدِ تحریک کی سربراہی میں جنرل کونسل کے فیصلے سے مشروط ہوگی۔ کسی بھی فرد کو ذاتی فیصلے کا اختیار حاصل نہیں ہوگا، اور خلاف ورزی کی صورت میں تنظیمی کارروائی عمل میں لائی جائے گی۔

اجلاس کے اختتام پر تمام اراکین نے قائدِ تحریک نواز خان ناجی کی قیادت پر مکمل اعتماد کا اظہار کرتے ہوئے قومی تحریک کے لیے اپنی خدمات جاری رکھنے کے عزم کا اعادہ کیا۔

22/10/2025

گلگت میں طلباء کے درمیان جھگڑے کا معاملہ جرگے میں حل، دیامر کے طالب علم کے ورثاء نے مخالف فریق کو معاف کر دیا

گلگت (پ۔ر)گزشتہ دنوں پبلک سکول اینڈ کالج چوک گلگت میں طلباء کے درمیان پیش آنے والے افسوسناک واقعے میں ایک طالب علم زخمی ہوا تھا، جس کا تعلق ضلع دیامر چلاس سے بتایا جاتا ہے۔ اس ناخوشگوار واقعے کے بعد معاملے کے حل کے لیے ایک جرگے کا انعقاد کیا گیا۔

جرگے میں دونوں فریقین کے والدین نے شرکت کی، جن میں ایک فریق کا تعلق چلاس جبکہ دوسرے فریق کا تعلق نگرل و گلگت کے مختلف علاقوں سے تھا۔ ڈپٹی کمشنر گلگت کیپٹن (ر) عارف احمد نے دونوں فریقین کے درمیان افہام و تفہیم کی فضا میں صلح کرانے میں مرکزی کردار ادا کیا۔

جرگے کے دوران دیامر کے زخمی طالب علم کے ورثاء نے اعلیٰ ظرفی کا مظاہرہ کرتے ہوئے دوسرے فریق کو معاف کر دیا۔ اس موقع پر تمام شرکاء نے اتفاق کیا کہ گلگت بلتستان میں پائیدار امن و امان کے قیام کے لیے اجتماعی کوششیں جاری رکھی جائیں گی اور باہمی تعاون و بھائی چارے کو فروغ دیا جائے گا۔

16/10/2025

گلگت میں بلدیاتی و یونین کونسل سطح کے الیکشن بلاک کوڈز سے متعلق اہم اجلاس
گلگت (پ۔ر)ڈپٹی کمشنر / ڈسٹرکٹ مجسٹریٹ گلگت کیپٹن (ر) عارف احمد کی زیر صدارت بلدیاتی، یونین کونسل اور ضلعی سطح پر الیکشن بلاک کوڈز کے حوالے سے ایک اہم اجلاس ڈپٹی کمشنر آفس گلگت میں منعقد ہوا۔

اجلاس میں ڈپٹی ڈائریکٹر لوکل گورنمنٹ اینڈ رورل ڈیولپمنٹ اور اسسٹنٹ کمشنر گلگت نے شرکت کی۔ اجلاس کے دوران الیکشن کمیشن آف پاکستان کی جانب سے جاری کردہ رہنما اصولوں کے تحت بلاک کوڈز کی تیاری، تصدیق اور ریکارڈ کی درستگی سے متعلق تفصیلی تبادلۂ خیال کیا گیا۔

ڈپٹی کمشنر گلگت کیپٹن (ر) عارف احمد نے متعلقہ محکموں کے افسران کو ہدایت دی کہ تمام بلدیاتی و یونین کونسل سطح کے بلاک کوڈز کے عمل کو شفاف، درست اور مقررہ وقت کے اندر مکمل کیا جائے تاکہ آئندہ بلدیاتی انتخابات کے انتظامات کو مؤثر بنایا جا سکے۔

انہوں نے مزید کہا کہ ضلعی انتظامیہ الیکشن کمیشن اور محکمہ لوکل گورنمنٹ کے ساتھ مکمل تعاون جاری رکھے گی تاکہ انتخابی عمل کی شفافیت اور معیار کو یقینی بنایا جا سکے۔

16/10/2025

ریجنل کونسل پونیال اشکومن کے صدر دادو خان صابر کی قیادت میں وفد کی مولانا قاضی نثار احمد سے ملاقات، بین المذاہب ہم آہنگی اور امن کے فروغ پر زور

گاہکوچ(پریس ریلیز)ریجنل کونسل برائے پونیال اشکومن کے صدر جناب دادو خان صابر کی سربراہی میں ایک معزز وفد نے حال ہی میں محترم مولانا قاضی نثار احمد صاحب سے ان کی رہائش گاہ پر ملاقات کی۔

وفد میں اسماعیلی ریجنل اطرب پونیال اشکومن کے چیئرمین ارشاد بیگ، پبلک افیئرز اینڈ سیکیورٹی کے چیئرمین شیر زمان، آغا خان صالحی و مصالحتی بورڈ کے چیئرمین خوش ولی اور دیگر اراکین شامل تھے۔

ملاقات کے دوران صدر دادو خان صابر نے اسماعیلی جماعت کی جانب سے مولانا قاضی نثار احمد کی خیریت دریافت کی اور ان کی صحت و سلامتی کے لیے نیک خواہشات کا اظہار کیا۔ وفد نے اس موقع پر اللہ تعالیٰ کا شکر ادا کیا کہ اس نے اپنے فضل و کرم سے مولانا صاحب کو حالیہ افسوسناک واقعے میں محفوظ رکھا۔

صدر صاحب اور اراکین نے مولانا قاضی نثار کے کردار کو خراجِ تحسین پیش کرتے ہوئے کہا کہ وہ گلگت بلتستان میں امن، بھائی چارے اور مذہبی ہم آہنگی کے فروغ میں نمایاں کردار ادا کر رہے ہیں۔ ان کا مثبت اور مثالی رویہ علاقے میں امن و استحکام کے لیے مشعلِ راہ ہے۔

مولانا قاضی نثار احمد نے وفد کی آمد پر شکریہ ادا کرتے ہوئے کہا کہ محبت، رواداری اور باہمی احترام ہی امن کی بنیاد ہیں، اور اگر ہم ان اقدار کو اپنی زندگی کا حصہ بنالیں تو کوئی طاقت ہمیں تقسیم نہیں کر سکتی۔

14/10/2025

ضلع گلگت کو پولیو فری بنانے کے لیے تمام وسائل بروئے کار لائے جا رہے ہیں، ڈپٹی کمشنر گلگت

گلگت (پ۔ر)
ڈپٹی کمشنر / ڈسٹرکٹ مجسٹریٹ گلگت کیپٹن (ر) عارف احمد کی زیر صدارت پولیو مہم کے دوسرے روز کی کارکردگی کا جائزہ لینے کے حوالے سے ایک اہم اجلاس منعقد ہوا۔

اجلاس میں ایڈیشنل ڈی ایچ او گلگت، اسسٹنٹ کمشنر دنیور، اسسٹنٹ کمشنر گلگت، ڈی ایم ایس سٹی ہسپتال، نمائندہ عالمی ادارہ صحت (WHO) گلگت سمیت متعلقہ محکموں کے افسران نے شرکت کی۔

اجلاس سے خطاب کرتے ہوئے ڈپٹی کمشنر گلگت نے کہا کہ پولیو مہم ایک قومی فریضہ ہے، اس مہم کو کامیاب بنانے کے لیے تمام تر وسائل بروئے کار لائے جا رہے ہیں تاکہ ضلع گلگت کو پولیو سے مکمل طور پر محفوظ بنایا جا سکے۔

ایڈیشنل ڈی ایچ او گلگت نے اجلاس کو پولیو مہم کے پہلے اور دوسرے روز کی کارکردگی کے حوالے سے تفصیلی بریفنگ دیتے ہوئے بتایا کہ پولیو ٹیمیں اپنے اپنے علاقوں میں مقررہ اہداف کے مطابق بچوں کو پولیو کے قطرے پلا رہی ہیں۔

ڈپٹی کمشنر گلگت نے ہدایت کی کہ پولیو ٹیمیں مہم کے دوران اپنے تمام اہداف مکمل کریں اور یہ یقینی بنایا جائے کہ کوئی بھی بچہ پولیو کے قطروں سے محروم نہ رہ جائے، کیونکہ آج کے بچے ہی ہمارے کل کا مستقبل ہیں۔

انہوں نے مزید کہا کہ ڈی ایچ او گلگت اور تینوں سب ڈویژنوں کے اسسٹنٹ کمشنرز پولیو ٹیموں کی مانیٹرنگ کو یقینی بنائیں تاکہ مہم کے دوران پیش آنے والے مسائل کو فوری طور پر حل کیا جا سکے۔

ڈپٹی کمشنر نے تمام متعلقہ اداروں اور عوام سے اپیل کی کہ وہ پولیو کے خاتمے کے لیے جاری اس قومی مہم میں بھرپور تعاون کریں تاکہ آئندہ نسلوں کو معذوری جیسے مرض سے بچایا جا سکے۔

14/10/2025

عدالتی مقدمات کے بروقت حل کے لیے ڈپٹی کمشنر گلگت کی زیر صدارت اہم اجلاس
گلگت (پریس ریلیز) ڈپٹی کمشنر / کلکٹر گلگت کیپٹن (ر) عارف احمد کی زیر صدارت عدالتی مقدمات کے جلد از جلد نمٹانے کے حوالے سے ایک اہم اجلاس ڈپٹی کمشنر آفس گلگت میں منعقد ہوا۔

اجلاس میں ڈپٹی ایڈووکیٹ جنرل سپریم اپیلیٹ کورٹ گلگت، ڈپٹی ایڈووکیٹ جنرل چیف کورٹ گلگت، اسسٹنٹ کمشنر گلگت، دنیور، جگلوٹ، اسسٹنٹ کمشنر عملدرآمد گلگت، اسسٹنٹ کمشنر ریونیو گلگت، تمام ڈسٹرکٹ اٹارنیز گلگت، این ٹی پیشی ڈسٹرکٹ اٹارنی گلگت، لیگل ایڈوائزر ڈی سی آفس گلگت اور دیگر متعلقہ افسران نے شرکت کی۔

اجلاس کے دوران زیرِ سماعت مقدمات کی تفصیلات، پیش رفت اور ان کے بروقت حل سے متعلق امور کا تفصیلی جائزہ لیا گیا۔ ڈپٹی کمشنر گلگت نے متعلقہ افسران کو ہدایت دی کہ تمام سرکاری مقدمات کی پیروی میں کسی قسم کی تاخیر نہ کی جائے اور عدالتوں میں حکومتِ گلگت بلتستان کا مؤقف مؤثر انداز میں پیش کیا جائے۔

انہوں نے مزید کہا کہ قانونی معاملات میں مربوط رابطہ کاری، درست ریکارڈ کی دستیابی اور بروقت پیشی کو یقینی بنا کر عدالتی نظام میں شفافیت اور تیزی لائی جا سکتی ہے۔

آخر میں ڈپٹی کمشنر نے تمام افسران کو ہدایت دی کہ آئندہ اجلاس میں مقدمات کی پیش رفت سے متعلق تفصیلی رپورٹ پیش کی جائے تاکہ ان کی نگرانی کے عمل کو مزید مؤثر بنایا جا سکے۔

13/10/2025

گلگت میں قصابوں کے خلاف کارروائی: 4 دکانیں سیل، 5 قصاب جیل بھیج دیے گئے
گلگت (نمائندہ خصوصی) اسسٹنٹ کمشنر و ایڈمنسٹریٹر میونسپل کارپوریشن گلگت کیپٹن (ر) عادل علی کی نگرانی میں شہر میں قصابوں کے خلاف سخت کارروائی عمل میں لائی گئی۔ میٹ انسپکٹر ڈاکٹر مشتاق عالم، میونسپل مجسٹریٹس عمران اللہ، محمد طاہر اور میونسپل پولیس فورس کے جوانوں نے گوشت کی قیمتوں اور معیار کو چیک کرنے کے لیے جوٹیال کینٹ، جوٹیال پبلک چوک بازار، جنرل بس اسٹینڈ اور شہیدِ ملت روڈ کے علاقوں میں وسیع آپریشن کیا۔

نرخنامے کی خلاف ورزی پر 4 دکانیں سیل کر دی گئیں جبکہ 5 قصابوں کو موقع پر جیل بھیج دیا گیا۔ اسسٹنٹ کمشنر نے اس موقع پر میڈیا سے گفتگو میں کہا کہ عوام کے استحصال کی اجازت نہیں دی جائے گی اور اشیائے خوردونوش کی فراہمی طے شدہ نرخوں کے مطابق یقینی بنائی جائے گی۔

انہوں نے عوام سے اپیل کی کہ گرانفروشی کے خلاف ضلعی انتظامیہ کے ساتھ تعاون کریں تاکہ خود ساختہ مہنگائی پر قابو پایا جا سکے۔ عوامی حلقوں نے اسسٹنٹ کمشنر اور ان کی ٹیم کی جانب سے کی گئی کارروائی کو وقت کی ضرورت قرار دیتے ہوئے اسے قابلِ تحسین اقدام قرار دیا۔

07/10/2025

گلگت سے راولپنڈی جانے والی گاڑیوں کے لیے نیا اوقات کار مقرر

گلگت ڈپٹی کمشنر گلگت کے دفتر سے جاری اعلامیے کے مطابق گلگت سے راولپنڈی جانے والی تمام چھوٹی اور بڑی گاڑیوں کے لیے نیا اوقات کار مقرر کر دیا گیا ہے۔

اعلامیے میں کہا گیا ہے کہ تمام گاڑیاں صبح 10 بج کر 30 منٹ سے قبل گلگت شہر سے روانہ ہوں گی، جبکہ دوپہر 1 بجے تک تھلیچی پولیس چیک پوسٹ کو عبور کرنا لازمی قرار دیا گیا ہے۔

ڈپٹی کمشنر گلگت کے مطابق، دوپہر 1 بجے کے بعد کسی بھی قسم کی گاڑی کو تھلیچی سے آگے جانے کی اجازت نہیں ہوگی۔

دفتر ڈپٹی کمشنر کا کہنا ہے کہ یہ فیصلہ عوامی سلامتی، ٹریفک کے مؤثر نظام اور مسافروں کی حفاظت کو یقینی بنانے کے لیے کیا گیا ہے۔

ڈپٹی کمشنر گلگت نے عوام الناس سے اپیل کی ہے کہ وہ انتظامیہ کی ہدایات پر عمل کریں تاکہ کسی بھی قسم کی دشواری یا تاخیر سے بچا جا سکے۔

30/09/2025

مسلم لیگ (ق) غذر نے پاکستان اور سعودی
عرب کے درمیان تاریخی دفاعی معاہدے پر شاندار یومِ تشکر منایا۔

غذر : اس موقع پر ضلعی صدر مسلم لیگ (ق) غذر عبداللہ شاہ کی قیادت میں تقریب کا انعقاد کیا گیا، جس میں پارٹی رہنماؤں، کارکنوں اور عوام کی بڑی تعداد نے جوش و خروش کے ساتھ شرکت کی۔ تقریب میں ملک و قوم کی سلامتی کے لیے خصوصی دعائیں مانگی گئیں اور اس تاریخی موقع کی خوشی میں بڑا کیک کاٹا گیا۔

عبداللہ شاہ نے تقریب سے خطاب کرتے ہوئے کہا کہ پاکستان اور سعودی عرب کے درمیان یہ دفاعی معاہدہ صرف ایک کاغذی کارروائی نہیں بلکہ امتِ مسلمہ کی یکجہتی اور مضبوط دفاع کی ضمانت ہے۔ انہوں نے کہا کہ مسلم لیگ (ق) غذر عوامی سطح پر اس معاہدے کو بھرپور حمایت دیتی ہے، کیونکہ یہ خطے میں پاکستان کے کردار کو مزید مستحکم کرے گا۔ ان کا کہنا تھا کہ پاکستان اور سعودی عرب دو جسم ایک جان ہیں، دونوں ممالک کے درمیان تعلقات کی مضبوطی دشمنوں کے لیے واضح پیغام ہے کہ امت مسلمہ ناقابلِ تسخیر ہے۔

28/09/2025

پائلٹ ہائر سیکنڈری اسکول شیرقلعہ میں ایک پروقار تقریب کا انعقاد کیا گیا، جس میں طلبہ کونسل کی تقریبِ حلف برداری

ریٹائرڈ اساتذہ کو خراجِ تحسین اور آغا خان یونیورسٹی ایگزامینیشن بورڈ کے ایم ایس پی پروجیکٹ میں حصہ لینے والے طلبہ کو اسناد تقسیم کی گئیں۔

تقریب کے مہمانِ خصوصی مونٹین انسٹی ٹیوٹ فار ایجوکیشن اینڈ ڈویلپمنٹ کے ڈائریکٹر و سابق نگران وزیر عبدالجہان تھے۔ اس موقع پر اسماعیلی طریقہ بورڈ شیرقلعہ کے چیئرمین خوشی محمد، گورنمنٹ بوائز ہائی اسکول کے پرنسپل شاہ جہان، النور ایجوکیشن ویلفیئر سوسائٹی کے اراکین، والدین اور معززینِ علاقہ نے بھی شرکت کی۔

پرنسپل نے خطبۂ استقبالیہ پیش کرتے ہوئے کہا کہ اس تقریب کا مقصد ریٹائر ہونے والے اساتذہ کی خدمات کو خراجِ تحسین پیش کرنا، طلبہ کونسل کے نو منتخب لیڈران سے حلف لینا اور پروجیکٹ بیسڈ لرننگ میں نمایاں کارکردگی دکھانے والے طلبہ کو اسناد دینا ہے۔ انہوں نے ریٹائرڈ اساتذہ گل بیگم، زاہد حسین اور شیر بن کی خدمات کو زبردست الفاظ میں سراہا۔

مہمانِ خصوصی عبدالجہان نے منتخب طلبہ لیڈران کو سیش پہنائے اور ان سے حلف لیا۔ اپنے خطاب میں انہوں نے شیرقلعہ کو
یو سی آف ایجوکیشن قرار دیتے ہوئے کہا کہ پائلٹ ہائر سیکنڈری اسکول نے علاقے میں تعلیم کے فروغ میں نمایاں کردار ادا کیا ہے۔ انہوں نے مزید کہا کہ بچے بہترین ماحول میں ہی آگے بڑھتے ہیں اور مونٹین انسٹی ٹیوٹ فار ایجوکیشن اینڈ ڈویلپمنٹ مستقبل میں بھی اس ادارے کے ساتھ تعاون جاری رکھے گا۔

اس موقع پر ریٹائرڈ ٹیچر مس گل بیگم نے والدین پر زور دیا کہ وہ اپنے بچوں کی تعلیم و تربیت کو اولین ترجیح دیں۔ چیئرمین النور ایجوکیشن ویلفیئر سوسائٹی دیداد شاہ ایڈووکیٹ نے کہا کہ ہم محدود وسائل کے باوجود اساتذہ کو ای او بی آئی اور ہیلتھ انشورنس جیسی سہولیات فراہم کر رہے ہیں۔

سابق چیئرمین النور ایجوکیشن ویلفیئر سوسائٹی نصیر احمد نے کہا کہ آغا خان یونیورسٹی ایگزامینیشن بورڈ کے ساتھ الحاق کے بعد ادارے میں طلبہ کی تعداد میں نمایاں اضافہ ہوا ہے اور اب دور دراز کے علاقوں سے بھی والدین اپنے بچوں کو یہاں بھیج رہے ہیں۔

تقریب میں چیئرمین النور ایجوکیشن ویلفیئر سوسائٹی نے ریٹائرڈ ہونے والے اساتذہ کو تحائف پیش کیے، جبکہ اسکول کی جانب سے پرنسپل اور سینئر اساتذہ علی شیر، مس مہناز اور انجم نے بھی ریٹائرڈ اساتذہ کو یادگاری تحائف دیے۔

اسکول کے طلبہ نے اس موقع پر مختلف تعلیمی و ثقافتی پروگرام پیش کیے جنہیں شرکاء نے بے حد پسند کیا۔ تقریب کے اختتام پر مدرس علی شیر نے تمام مہمانوں کا شکریہ ادا کیا۔

24/09/2025

وفاقی حکومت اور حکومت گلگت بلتستان اور مقامی تاجروں کی سپریم کونسل کے مجاز نمائندوں کے درمیان ہونے والے معاہدے کا اُردو متن۔۔۔

صفحہ 1

وفاقی حکومت، حکومت گلگت بلتستان اور مقامی تاجروں کی سپریم کونسل کے مجاز نمائندوں کے مابین سلک روٹ ڈرائی پورٹ سست کی ہموار سرگرمیوں کے لیے معاہدہ

یہ معاہدہ 23 ستمبر 2025ء کو طے پایا اور اس پر دستخط کیے گئے:

فریقین

پاکستان کی وفاقی حکومت، بذریعہ وفاقی وزیر برائے پاور ڈویژن، چیئرمین فیڈرل بورڈ آف ریونیو (آئندہ متن میں ’’وفاقی حکومت‘‘ کہلائے گی)

حکومت گلگت بلتستان (آئندہ متن میں ’’جی بی حکومت‘‘ کہلائے گی)

مقامی تاجروں کے نمائندے (آئندہ متن میں ’’تاجر‘‘ کہلائیں گے)

دیباچہ / تمہیدی نکات

چونکہ تمام فریقین سلک روٹ ڈرائی پورٹ (SRDP) سست کی ہموار سرگرمیوں کے خواہاں ہیں تاکہ علاقائی تجارت کو فروغ دے کر تیز رفتار اقتصادی ترقی ممکن ہو سکے؛

چونکہ تاجر ان مسائل کے فوری حل کے خواہاں ہیں جو 28 فروری 2025ء سے پہلے سست ایریا میں درآمد شدہ سامان پر کسٹمز قوانین کے نفاذ سے پیدا ہوئے؛

چونکہ تاجر اور جی بی حکومت اس بات کے خواہاں ہیں کہ ایک مضبوط اور شفاف طریقۂ کار وضع کیا جائے تاکہ وہ درآمدی اشیاء جو مقامی استعمال کے لیے لائی جائیں، ان پر وہ وفاقی ٹیکس عائد نہ ہوں جو گلگت بلتستان پر لاگو نہیں ہوتے، تاکہ مقامی آبادی کو فائدہ پہنچے؛

چونکہ وفاقی حکومت اس بات کی خواہاں ہے کہ تمام وفاقی قوانین اور ضوابط، جو سرحد پار تجارت کو منظم کرتے ہیں، ان پر مکمل عمل درآمد ہو، اور ساتھ ہی SRDP سست کی ہموار سرگرمیاں بھی جاری رہیں۔ نیز یہ کہ ایک مضبوط طریقۂ کار وضع کیا جائے تاکہ مستقبل میں جو ٹیکس میں چھوٹ دی جائے گی وہ صرف اور صرف گلگت بلتستان کے مقامی لوگوں کے لیے ہی دستیاب ہو جو جی بی کے دائرہ اختیار میں رہتے ہیں۔

صفحہ 2

شرائط و ضوابط

1۔ محصولات سے استثنیٰ (ٹیکس ایکسیمپشن)

الف) وفاقی حکومت ایسے FBR کے محصولات (جیسے سیلز ٹیکس، انکم ٹیکس، اور فیڈرل ایکسائز ڈیوٹی) جو اب تک گلگت بلتستان پر لاگو نہیں کیے گئے ہیں، سوست راستہ درآمدات پر وصول نہیں کرے گی، بشرطیکہ مندرجہ ذیل شرائط پوری ہوں:

i. درآمد کی گئی اشیا صرف گلگت بلتستان کے جغرافیائی دائرہ اختیار کے اندر مقامی استعمال کے لیے ہوں۔
ii. اشیا مقامی فرموں اور کمپنیوں کے ذریعے درآمد کی جائیں جو مقامی لوگوں کی ملکیت ہوں اور جنہیں گلگت بلتستان حکومت کی طرف سے due طور پر اجازت نامہ دیا گیا ہو۔
iii. گڈز ڈیکلئریشن (GD) پاکستان کسٹمز کے سامنے بغیر کسی غلط بیانی کے دائر کی جائے۔
iv. پاکستان کسٹمز کی جانب سے تشخیص (ایپریزمنٹ) کے بعد اشیا annex-I میں دی گئی مثبت ٹیلف لائنز (tariff lines) کی فہرست کے دائرہ کار میں آتی ہوں۔

ب) متفقہ مثبت ٹیلف لائنز کی فہرست میں وہ درآمدی اشیا شامل ہیں جن کی مقامی لوگوں کو گلگت بلتستان میں ضرورت ہے، اور جن کے ٹیلف ایریا (یعنی باقی پاکستان) میں فروخت ہونے کا خطرہ نہ ہو۔

ج) محصولات سے استثنیٰ کی کل سالانہ رقم چار ارب روپے سے تجاوز نہیں کرے گی۔

د) ہر ٹیلف لائن کے لیے کوٹہ کا حجم ملکی فی کس بنیاد پر، متعلقہ ٹیلف لائنز کے تحت درآمد ہونے والی اشیا کی assess کردہ کسٹم ویلیو کی بنیاد پر طے کیا گیا ہے۔

ہ) اگر کسی مخصوص شے کی کمی/ضرورت ہو تو رجسٹرڈ ٹریڈ باڈیز ایسے معاملات گلگت بلتستان حکومت کے ذریعے وفاقی سطح پر متعلقہ حکام کے سامنے regulatory ڈیوٹیز میں خصوصی رعایت حاصل کرنے کے لیے اٹھائیں گی۔

و) محصولات سے استثنیٰ کی سہولت کسٹم سسٹم میں درآمدات کی assess کردہ ویلیو کے خلاف، متعلقہ ٹیلف لائنز کے لیے، First Come First Serve کی بنیاد پر کٹے گی جیسا کہ گلگت بلتستان حکومت طے کرے۔ مستثنیٰ حد سے زیادہ درآمد کی گئی کسی بھی شے پر محصولاتی استثنیٰ کا حق نہیں ہوگا، چاہے اس کی اجازت ہی کیوں نہ دی گئی ہو۔

ز) محصولاتی استثنیٰ کی حد کا جائزہ ہر دو سال بعد یا ضرورت کے مطابق وفاقی حکومت، گلگت بلتستان حکومت اور رجسٹرڈ ٹریڈ باڈیز کی سفارشات پر لے گی۔

ح) وفاقی حکومت، گلگت بلتستان حکومت کے مشورے سے، محصولاتی استثنیٰ معطل کر سکتی ہے اگر سوست بندرگاہ کی کارروائیاں گلگت بلتستان کے مقامی لوگوں کی جانب سے اٹھائے گئے اقدامات سے متاثر ہوتی ہیں۔

ط) وفاقی حکومت، گلگت بلتستان حکومت کے مشورے سے، ان اشیا پر جزوی یا مکمل طور پر محصولاتی رعایت واپس لے سکتی ہے جو سوست سے محصولاتی رعایت کے ساتھ cleare کی گئی تھیں لیکن جنہیں تجارتی مقدار میں گلگت بلتستان کے جغرافیائی دائرہ اختیار سے باہر سمگل کیا گیا ہو۔

ی) کسٹم ٹریبونل ضرورت پڑنے پر سوست SRDP سے متعلق معاملات کی سماعت گلگت بلتستان میں کرے گا۔

ک) ڈپٹی ڈائریکٹر ویلیوایشن سال میں ایک بار گلگت بلتستان کا دورہ کریں گے۔

---

۔۔۔۔۔۔

صفحہ 3

2۔ رُکی ہوئی کھیپوں (Consignments) کا تصفیہ

a) وفاقی حکومت ترجیحی بنیادوں پر اُن احکامات پر فوری عمل درآمد کرے گی جو کسٹمز اپیلٹ ٹربیونلز نے ان اپیلوں میں دیے ہیں یا دیں گے جو مقامی درآمد کنندگان نے سست ڈرائی پورٹ پر رُکی ہوئی کھیپوں کے حوالے سے دائر کی ہیں۔

b) ٹرمینل آپریٹر تاخیر، ڈیٹینشن چارجز یا ڈیمریج کی معافی کی درخواست پر غور کرے گا جو رُکی ہوئی کھیپوں سے متعلق ہو۔

c) وہ سامان جو امپورٹ پالیسی آرڈر کی خلاف ورزی میں درآمد کیا گیا ہو، باقاعدہ قانونی کارروائی کے بعد ضبط کر لیا جائے گا۔

3۔ نفاذ (Implementation)

a) تاجر اس معاہدے پر دستخط کے فوراً بعد اپنے احتجاج کو ختم کریں گے۔

b) اس معاہدے پر دستخط کے تیس دن کے اندر، وفاقی حکومت اپنی پوری کوشش سے ایک SRO جاری کرے گی جو ٹیکس استثنیٰ سے متعلق ہو اور تمام اسٹیک ہولڈرز کی منظوری کے بعد جاری ہوگا۔

c) ٹیکس استثنیٰ سے متعلق SRO پر بروقت عمل درآمد کے لیے، جی بی حکومت اپنا ایک فوکل ادارہ مقرر کرے گی جو وفاقی حکومت کے ساتھ مل کر کسٹمز کے WeBOC سسٹم میں اجازت ناموں اور کوٹہ الاٹمنٹ کے لیے آن لائن طریقہ کار وضع کرے۔

d) جی بی حکومت، رجسٹرڈ تجارتی تنظیموں سے مشاورت کے بعد، ایک مضبوط اور شفاف طریقہ کار تیار کرے گی تاکہ ٹیکس استثنیٰ سے متعلق اجازت نامے، کوٹہ مختص اور نظرثانی کا نظام مؤثر طریقے سے چل سکے۔

e) شفافیت کے پیش نظر، چار ارب روپے کے ٹیکس استثنیٰ کی تفصیلات، جو گلگت بلتستان کے انفرادی درآمد کنندگان کو دی گئی ہوں، اور اشیاء کی مکمل تفصیلات جی بی حکومت کی طرف سے شائع کی جائیں گی اور FBR کی ویب سائٹ پر بھی دستیاب ہوں گی۔

f) سست ڈرائی پورٹ پر عمل درآمد کو بہتر بنانے کے لیے، کسٹمز یہ عمل جاری رکھے گا کہ اگر کسی سامان کے ڈکلیریشن میں غلط بیانی یا خلاف ورزی پائی گئی تو اس پر فوری قانونی کارروائی کی جائے۔

4۔ تنازعات کا حل (Dispute Resolution)

a) اس معاہدے سے پیدا ہونے والے یا اس سے جڑے کسی بھی تنازع کو باہمی مشاورت اور مذاکرات کے ذریعے حل کیا جائے گا۔

b) اگر مذاکرات کے ذریعے تنازع حل نہ ہو سکے تو اسے ’’آربیٹریشن ایکٹ 1940‘‘ کے تحت ثالثی کے لیے بھیجا جائے گا۔

c) وفاقی حکومت، گلگت بلتستان کے عوام کے لیے خصوصی سہولیات کو بڑھانے پر غور کر سکتی ہے تاکہ علاقے سے چین کو برآمدات میں اضافہ کیا جا سکے۔

۔۔۔۔۔۔

صفحہ 4

د) گلگت بلتستان حکومت سرحدی علاقوں (سب ڈویژن گوجال) کی ترقی اور بنیادی ضروریات کی فراہمی کا ایک میکانزم صوبائی سالانہ بجٹ کے ذریعے ترتیب دے گی۔

اس کی شہادت کے طور پر

فریقین نے اس معاہدے پر مذکورہ بالا پہلی تاریخ کو عملدرآمد کیا ہے۔

وفاقی حکومت کے نمائندے

1. اوایس لغاری، وفاقی وزیر برائے توانائی (پاور ڈویژن)
2. ثناء اللہ خان، وفاقی وزیر برائے بین الصوبائی رابطہ/ وزیر اعظم کے مشیر برائے سیاسی و عوامی امور۔
3. امیر مقام، وفاقی وزیر برائے کشمیر امور و سافران
4. سلیم منڈوی والا، سینیٹر، چیئرمین سینیٹ اسٹینڈنگ کمیٹی برائے مالیات و محصولات۔

حکومتِ گلگت بلتستان کے نمائندے

1. گلبر خان، وزیر اعلیٰ گلگت بلتستان
2. حفیظ الرحمان، سابق وزیر اعلیٰ گلگت بلتستان
3. امجد اظہر حسین ایڈووکیٹ، رکن گلگت بلتستان اسمبلی/صدر (پپپ) گلگت بلتستان

ٹریڈرز سپریم کونسل کے نمائندے

1. اشفاق احمد، صدر گلگٹ چیمبر
2. کامران غازی
3. گل شیر خان
4. سلیم الدین
5. عباد اللہ
6. کوثر حسین
7. عباس علی
8. حافظ عاطف اللہ، ایڈووکیٹ

GILGIT UPDATES

26/10/2025

23/10/2025

22/10/2025

16/10/2025

16/10/2025

14/10/2025

14/10/2025

13/10/2025

07/10/2025

30/09/2025

28/09/2025

24/09/2025

Address

Telephone

Website

Alerts

Contact The Business

Shortcuts

Share

Category