23/07/2026
ملک بھر میں مون سون تباہ کاریاں، پنجاب اور خیبرپختونخوا میں 43 افراد جاں بحق، 177 زخمی
پنجاب اور خیبرپختونخوا میں مون سون بارشوں اور سیلابی صورتحال سے ہونے والے نقصانات کی تازہ رپورٹ جاری کر دی گئی ہے۔
پی ڈی ایم اے پنجاب کے مطابق رواں مون سون سیزن میں اب تک 21 افراد جاں بحق جبکہ 154 زخمی ہوئے ہیں۔
رپورٹ کے مطابق پنجاب میں آسمانی بجلی گرنے، عمارتیں گرنے، کرنٹ لگنے اور پانی میں ڈوبنے کے مختلف واقعات میں قیمتی جانیں ضائع ہوئیں، جبکہ 38 مکانات کو جزوی نقصان پہنچا۔
ادھر خیبرپختونخوا میں بارشوں، سیلابی ریلوں اور مکانات کی چھتیں و دیواریں گرنے کے واقعات میں 22 افراد جاں بحق اور 23 زخمی ہوئے۔
خیبرپختونخوا میں 37 مکانات متاثر ہوئے، جن میں 8 مکمل جبکہ 29 جزوی طور پر منہدم ہوئے۔
پی ڈی ایم اے نے شہریوں کو موسمی صورتحال کے پیش نظر احتیاطی تدابیر اختیار کرنے اور غیر ضروری سفر سے گریز کرنے کی ہدایت کی ہے۔
