28/06/2026
یوحنا یعقوب خان ضلع گوجرانوالہ کے لیے وزیرِ اقلیتی امور پنجاب کے کوآرڈینیٹر مقرر، نوٹیفکیشن جاری
صوبائی وزیر رامیش سنگھ اروڑہ نے یوحنا یعقوب کو باقاعدہ نوٹیفکیشن سونپ دیا؛ مسیحی برادری اور سماجی رہنماؤں کی طرف سے فیصلے کا خیرمقدم
گوجرانوالہ 28 جون 2026
فرانسیس آباد کی معروف اور ہر دلعزیز سماجی و سیاسی شخصیت یوحنا یعقوب خان کو ضلع گوجرانوالہ کے لیے وزیر برائے اقلیتی امور پنجاب کا کوآرڈینیٹر مقرر کر دیا گیا ہے، جس کا باقاعدہ نوٹیفکیشن بھی جاری کر دیا گیا ہے۔ گزشتہ روز منعقدہ ایک باوقار تقریب کے دوران صوبائی وزیر برائے اقلیتی امور رامیش سنگھ اروڑہ نے یوحنا یعقوب خان کو تقرری کا نوٹیفکیشن سونپا۔
اس موقع پر گفتگو کرتے ہوئے نومنتخب کوآرڈینیٹر یوحنا یعقوب خان نے اس عزم کا اظہار کیا کہ وہ قیادت کی طرف سے سونپی گئی اس اہم ذمہ داری کو بھرپور، ایمانداری اور احسن طریقے سے سرانجام دیں گے اور اقلیتوں کے حقوق اور فلاح و بہبود کے لیے کوئی کسر اٹھا نہ رکھیں گے۔
تقریب میں موجود سماجی کارکن ثاقب خادم، ڈویژنل کوآرڈینیٹر شہزاد بھٹی، اور سٹی صدر پاکستان مسلم لیگ (ن) مینارٹی ونگ گوجرانوالہ چمن شہزاد بھٹی نے یوحنا یعقوب خان کو مبارکباد پیش کرتے ہوئے کہا کہ:
"ہم سب سے پہلے خداوند کے شکر گزار ہیں اور اس کے بعد صوبائی وزیر رامیش سنگھ اروڑہ کا تہہ دل سے شکریہ ادا کرتے ہیں جنہوں نے تقریباً دو ماہ کی باریک بینی اور گہرے مشاہدے کے بعد، میرٹ اور جذبہِ خدمت کی بنیاد پر فرانسیس آباد کی اس مخلص شخصیت کو بطور نمائندہ منتخب کیا۔"
مقررین نے عقاب عالم (کوآرڈینیٹر ٹو سی ایم مینارٹی ایڈوائزری کونسل، گورنمنٹ آف پنجاب) اور شہزاد بھٹی (ڈویژنل کوآرڈینیٹر) کا بھی خصوصی شکریہ ادا کیا، جنہوں نے تمام تر دباؤ اور سازشوں کے باوجود ضلعی سطح پر ایک بہترین اور موزوں نمائندے کے انتخاب میں اپنا بھرپور کردار ادا کیا۔ اس کے علاوہ قاضی شعیب بابر، پاسٹر شہزاد اور سرفراز گل کی غیر مشروط محبت اور سپورٹ کو بھی سراہا گیا۔
رہنماؤں کا مزید کہنا تھا کہ یوحنا یعقوب خان گزشتہ کئی برسوں سے گوجرانوالہ میں سماجی خدمات کے حوالے سے نمایاں مقام رکھتے ہیں۔ ان کا بطور کوآرڈینیٹر چناؤ ضلع گوجرانوالہ کی مسیحی برادری کے لیے ایک سنگِ میل ثابت ہوگا۔ اس اہم تقرری پر اہلیانِ فرانسیس آباد اور گوجرانوالہ کی مسیحی عوام نے خوشی کا اظہار کرتے ہوئے صوبائی حکومت اور وزیرِ اقلیتی امور رامیش سنگھ اروڑہ کا شکریہ ادا کیا ہے۔
