https://gwadartimesnews.blogspot.com/?m=1

Digital Gwadar, Sayad Zahoor Shah Hashmi Road, Gwadar (2026)

27/06/2026

کوئٹہ: بلوچستان فشریز پالیسی بل کا کام مکمل، گوادر ماہی گیر اتحاد کے رہنما یونس انور نے حسنِ کارکردگی ایوارڈ اور پالیسی بل کی کتاب وصول کر لی

14/06/2026

شفافیت بولی ،سوالات خاموش رہے

کہتے ہیں کہ سرکاری اعلان بھی ایک فن ہوتا ہے ۔ لفظوں کو ایسے ترتیب دیا جاتا ہے کہ حقیقت بھی مطمئن دکھائی دے اور سوال بے آواز رہیں ۔
ڈپٹی کمشنر گوادر کا کہنا ہے کہ گریڈ 1سے 15 تک تمام بھرتیاں شفافیت اور میرٹ کی بنیاد پر مکمل ہوچکی ہیں ۔آج تک سمجھ نہیں آئی گوادر میں میرٹ کس موسم میں اگتا ہے ۔لوگ کہتے ہیں یہ کاغذ پر لکھا ایک خوبصورت لفظ ہے اور کچھ کا خیال ہے یہ صرف تقاریر میں زندہ رہتا ہے ۔
جب گریڈ 1 سے 15 تک ایک تحصیل کی بھرتیوں کی فہرست دیکھی تو یوں محسوس ہوا جیسے علم کی دیوی نے سفارش کا سہارا لے لیا ہو ۔ پہلے ہم سمجھتے تھے تعلیم ایک دروازہ ہے جو قابلیت سے کھلتا ہے مگر اب معلوم ہوا کہ چابی کبھی کبھی ناموں کی فہرست سے مل جاتی ہے ۔
شاید بدقسمتی ان قابل لوگوں کی ہے جو زمانہ سفارش میں پیدا ہوئے ہیں ۔ جہاں قابلیت سفارش کے دروازے پر دستک دے کر واپس آجاتی ہے اور نام اپنی ہی سفارش پر اندر داخل ہو جاتا ہے ۔
یوں محسوس ہوتا ہے کہ شفافیت اب ایک ایسا آئینہ بن چکی ہے جس میں صرف وہی چہرے صاف دکھائی دیتے ہیں جو پہلے ہی منتخب ہو چکے ہوتے ہیں ۔باقی سب اپنے عکس کو دھندلا سا دیکھ کر بھی یقین کرنے پر مجبور ہیں کہ شاید روشنی کم تھی چہرہ نہیں ۔ سرکاری فہرستیں بھی اب کسی ادبی شاہکار کی طرح ہیں جتنی خوبصورت ترتیب اتنا ہی گہرا ابہام ۔
اور پھر دلچسپ بات یہ ہے کہ میرٹ کے تقاضے بھی وقت کے ساتھ بدلتے رہے ہیں ؛ کبھی امتحان میں نمبر شرط تھے اب تعلقات میں نرمی کافی ہے ۔ یوں لگتا ہے جیسے نظام نے بھی ایک خاموش سا معاہدہ کر لیا ہو کہ سوال نہ اٹھیں تو جواب خود بخود درست مان لیے جائیں گے ۔
اگر تعلیم کو واقعی فروغ دینا مقصود ہے تو پھر علم کو آواز دی جائے نہ کہ آواز کے جاننے والوں کو علم دیا جائے ۔
ورنہ ڈر ہے کہ آنے والے وقت میں استاد بھی تقریر کے وقت یہ ضرور پوچھے گا " کیا میں قابل ہوں؟ یا بس قابلِ تعریف ؟
تحریر۔ رغد عارف

04/06/2026

اعلان فوتگی

انا للہ وانا الیہ راجعون

پاکستان پیپلز پارٹی کے رہنما محمد بزنجو کے بھتیجے اور ان کے بڑے بھائی خیر محمد کے صاحبزادے قمبر بزنجو وفات پا گئے ہیں۔ اللہ تعالیٰ مرحوم کو جوارِ رحمت میں جگہ دے اور لواحقین کو صبرِ جمیل عطا فرمائے۔ آمین۔

مرحوم کا جنازہ آج صبح 11 بجے محمد بزنجو کی رہائش گاہ واقع عصاء وارڈ (نزد گورنمنٹ گرلز ہائی سکول) سے اٹھایا جائے گا

04/06/2026

بی این پی ساحل و وسائل کے حقوق کی جنگ جاری رکھے گی، میر حمل کلمتی سابق ایم پی اے اور بلوچستان نیشنل پارٹی (مینگل) کے مرکزی رہنما میر حمل کلمتی نے کہا ہے کہ بی این پی ہمیشہ بلوچستان کے ساحل و وسائل اور عوامی حقوق کی بات کرتی رہی ہے اور آئندہ بھی یہ جدوجہد جاری رہے گی۔ انہوں نے کہا کہ ہمیں مختلف اوقات میں دھونس اور دھمکیوں کا سامنا کرنا پڑا، تاہم ہم اپنی جماعت کے ساتھ کھڑے ہیں اور کھڑے رہیں گے۔ گوادر پریس کلب کے پروگرام ’’حال احوال‘‘ میں اظہار خیال کرتے ہوئے میر حمل کلمتی نے کہا کہ ملا فاضل چوک سمیت اولڈ سٹی منصوبے کے تحت متعدد ترقیاتی پروگرام ان کے دور حکومت کی منصوبہ بندی کا حصہ تھے، تاہم موجودہ ایم پی اے ان منصوبوں کا کریڈٹ اپنے کھاتے میں ڈالنے کی کوشش کر رہے ہیں۔ انہوں نے دعویٰ کیا کہ موجودہ نمائندے اپنے ڈھائی سالہ دور میں عوامی فلاح و بہبود کے لیے کوئی نمایاں منصوبہ نہیں لا سکے۔انہوں نے کہا کہ ان کے دور میں گوادر میں تعلیمی اداروں کا جال بچھایا گیا، جن میں یونیورسٹی، ضلع کی تمام تحصیلوں میں گرلز اور بوائز کالجز کا قیام، اسکولوں کی اپ گریڈیشن اور صحت کے اداروں کو فعال بنانا شامل ہے۔ اسی طرح پسنی جیٹی کی فعالیت اور اورماڑہ و جیونی جیٹیوں کے قیام و ترقی کی منصوبہ بندی بھی ان کے دور کے اہم منصوبے تھے۔میر حمل کلمتی نے کہا کہ ان کے دور میں مختلف سرکاری اداروں میں بھرتیوں کے ذریعے ضلع گوادر کے سینکڑوں نوجوانوں کو روزگار فراہم کیا گیا، جبکہ آج نوجوان ڈگریاں ہاتھوں میں لیے ملازمتوں کے حصول کے لیے دربدر پھرنے پر مجبور ہیں۔
انہوں نے ماہی گیری کے شعبے کا ذکر کرتے ہوئے کہا کہ ان کے دور میں گوادر اور ساحل مکران میں غیر قانونی ٹرالنگ کے خاتمے کے لیے سخت اقدامات کیے گئے تھے، جس سے ماہی گیروں کا ذریعہ معاش محفوظ رہا۔ تاہم آج ساحل مکران سمندری قزاقوں اور غیر قانونی سرگرمیوں کی زد میں ہے، جس کے باعث ماہی گیروں کے معاشی حالات شدید متاثر ہو رہے ہیں ان کا کہنا تھا کہ گوادر میں ٹیلنٹ کی کوئی کمی نہیں اور ان کے دور میں نوجوانوں کی اعلیٰ تعلیم کے حصول کے لیے ہر ممکن رہنمائی اور معاونت فراہم کی گئی۔ انہوں نے کہا کہ موجودہ دور مقابلے اور چیلنجز کا دور ہے، اس لیے نوجوان اپنی تمام تر توجہ تعلیم اور مسابقتی امتحانات کی تیاری پر مرکوز کریں کیونکہ مستقبل انہی کا ہے۔ میر حمل کلمتی نے کہا کہ ان کے دور میں اپوزیشن کو ورغلایا گیا، جھوٹے الزامات عائد کیے گئے اور کفن پوش ریلیاں نکالی گئیں، لیکن آج وہ عناصر خاموش ہیں جبکہ ماورائے قانون نوجوانوں کی لاشیں گر رہی ہیں۔ انہوں نے سوال اٹھایا کہ اس وقت بلند و بانگ دعوے کرنے والے آج کہاں ہیں۔ انہوں نے کہا کہ انہوں نے بلوچستان نیشنل پارٹی کے پلیٹ فارم سے اہل بلوچستان کے حقوق کےحصول کے لیے جدوجہد کی ہے اور مستقبل میں بھی یہ جدوجہد جاری رہے گی۔ اس موقع پر گوادر پریس کلب کے صدر نور محسن نے سابق ایم پی اے میر حمل کلمتی کا شکریہ ادا کرتے ہوئے امید ظاہر کی کہ وہ آئندہ بھی گوادر پریس کلب کے ساتھ اپنا تعاون جاری رکھیں گے اور صحافی برادری کو درپیش مسائل کے حل کے لیے اپنی جدوجہد میں ان کا ساتھ دیں گے۔ اس موقع پر گوادر پریس کلب سے وابستہ صحافیوں سمیت بلوچستان نیشنل پارٹی کے کارکنان کی بڑی تعداد موجود تھی

03/06/2026

گوادر: چیئرمین ضلع کونسل شئے مختار کا مقامی نمائندوں کے ہمراہ سربندن کا اہم دورہ، بی ایچ یو ہسپتال اور یونین کونسل دفتر کا معائنہ، ڈینگی وائرس کی روک تھام کے لیے ہنگامی اقدامات کی ہدایت

چیئرمین ضلع کونسل گوادر شئے مختار نے ضلعی چیف آفیسر افضل شہزادہ کے ہمراہ سربندن کا ایک اہم دورہ کیا، جس میں انہوں نے بنیادی صحت کے مرکز بی ایچ یو ہسپتال اور یونین کونسل کے دفتر کا تفصیلی معائنہ کیا۔

اس موقع پر ان کے ہمراہ چیئرمین یونین کونسل سربندن نصیب اللہ نوشیروانی، ایل ایس او سربندن کے صدر عبدالغفار، سابق وائس چیئرمین اے ڈی نوشیروانی اور وائس چیئرمین سمین تاج بھی موجود تھے۔
دورے کے دوران چیئرمین ضلع کونسل شئے مختار نے بی ایچ یو ہسپتال کے مختلف شعبوں، بشمول وارڈز، ای پی آئی (EPI) سنٹر، زچہ بچہ سنٹر، ای سی جی روم اور ڈاکٹرز کے رہائشی کوارٹرز کا باریک بینی سے جائزہ لیا اور وہاں موجود ڈاکٹروں اور پیرامیڈیکل اسٹاف سے ملاقات کر کے انہیں درپیش مسائل سنے۔ معائنے کے دوران ہسپتال کے وارڈز میں صفائی ستھرائی کی ابتر صورتحال اور گندگی پر انہوں نے سخت برہمی کا اظہار کیا اور متعلقہ عملے کی سرزنش کرتے ہوئے صفائی کے نظام کو فوری طور پر بہتر بنانے کی سخت ہدایت کی۔
علاقے میں ڈینگی وائرس کے پھیلاؤ کے خدشات اور موجودہ صورتحال کے پیش نظر چیئرمین شئے مختار نے ہسپتال انتظامیہ کو خصوصی الرٹ رہنے کی تاکید کی۔ انہوں نے ہدایت کی کہ ڈینگی کے ممکنہ مریضوں کے لیے فوری طور پر تمام ضروری طبی سہولیات، ادویات اور ٹیسٹنگ کٹس کی دستیابی کو یقینی بنایا جائے، جبکہ ہسپتال اور گردونواح میں مچھر مار سپرے اور صفائی کے خصوصی انتظامات کیے جائیں تاکہ اس موذی وائرس کے پھیلاؤ کو روکا جا سکے۔

بعد ازاں، چیئرمین شئے مختار نے وفد کے ہمراہ یونین کونسل سربندن کے دفتر کا بھی دورہ کیا، جہاں انہوں نے ڈسٹرکٹ فنڈز کے تعاون سے جاری دفتر کی تزئین و آرائش اور مرمتی کاموں کا معائنہ کیا اور ترقیاتی کاموں کے معیار کا جائزہ لیا۔ اس موقع پر انہوں نے کام کو شفافیت اور جلد از جلد مکمل کرنے کی تاکید کی تاکہ عوامی خدمات کی فراہمی میں کوئی رکاوٹ پیش نہ آئے۔

03/06/2026

*گوادر:* چیرمین گوادر پورٹ نورالحق بلوچ کی زیرِ صدارت جی پی اے افسران کا اجلاس منعقد ہوا جس میں تعمیر شدہ گوادر پورٹ کمرشل کمپلیکس کی پیش رفت اور دکانوں کی نیلامی کے حوالے سے تفصیلی جائزہ لیا گیا۔ اجلاس کو بریفنگ دیتے ہوئے بتایا گیا کہ جی پی اے کمرشل کمپلیکس میں مختلف کیٹیگریز کی دکانیں موجود ہیں جن کی بولی 15 جون کو عوام کے سامنے شفاف انداز میں کرائی جائے گی۔ اجلاس کو آگاہ کیا گیا کہ یہ کمرشل کمپلیکس گوادر کا ایک جدید اور منفرد شاپنگ پلازہ ہے جہاں کاروباری سرگرمیوں کے لیے تمام بنیادی سہولیات فراہم کی گئی ہیں۔ بریفنگ میں بتایا گیا کہ کمپلیکس میں مختلف نوعیت کے کاروبار کے لیے جگہ مختص کی گئی ہے، جس میں دفاتر، میڈیکل اسٹورز، موبائل ایکسیسریز کی دکانیں، ہیئر ڈریسنگ سیلونز، ملٹی پرپز شاپس اور دیگر تجارتی شعبوں سے متعلق دکانیں شامل ہیں۔ خواتین کی سہولت اور کاروباری سرگرمیوں میں ان کی شمولیت کو مدنظر رکھتے ہوئے کمپلیکس میں فرسٹ فلور کو مختص کیا گیا ہے۔ اس موقع پر چیئرمین گوادر پورٹ نورالحق بلوچ نے اسٹیٹ ڈیپارٹمنٹ کے افسران کو ہدایت کی کہ جی پی اے ہاؤسنگ کمپلیکس میں قائم سہولت مرکز پر ایک ذمہ دار افسر تعینات کیا جائے تاکہ دکانوں کے حصول اور نیلامی کے عمل میں دلچسپی رکھنے والے افراد کو مکمل رہنمائی اور ضروری معلومات فراہم کی جا سکیں۔ اس موقع پر اس عزم کا بھی اظہار کیا گیا کہ گوادر پورٹ کمرشل کمپلیکس کو گوادر میں تجارتی سرگرمیوں کے فروغ اور مقامی سرمایہ کاروں کو بہترین کاروباری مواقع فراہم کرنے کا ایک مؤثر مرکز بنایا جائے گا۔

03/06/2026

ضلع کونسل کے چیرمین شئے مختار کا یونین کونسل سربندن کا دورہ صفائی مہم کا آغاز

25/05/2026

سید ظہور شاہ ہاشمی ڈیجیٹل لائبریری میں گوادر کے طلبہ کے لیے ڈی آئی جی مکران رینج عمران قریشی کا احسن اقدام

گوادر کی سید ظہور شاہ ہاشمی ڈیجیٹل لائبریری میں مقامی طلبہ و طالبات کے لیے مفت تدریس کا سلسلہ گزشتہ ایک سال سے کامیابی کے ساتھ جاری ہے۔ اس اہم تعلیمی سرگرمی کی نگرانی لاہور کی جی سی یونیورسٹی سے فارغ التحصیل نوجوان اسکالر فیض رفیق کر رہے ہیں، جو طالب علموں کو مقابلہ جاتی امتحانات (CSS/PCS)، رائٹنگ اسکلز، مضمون نویسی (Essay) اور پریسی رائٹنگ (Precis) سمیت مختلف مضامین کی تیاری کروا رہے ہیں۔
آج ڈی آئی جی مکران رینج عمران قریشی نے سید ظہور شاہ ہاشمی لائبریری کا خصوصی دورہ کیا اور فیض رفیق کی ان رضاکارانہ تعلیمی خدمات کو دل کھول کر سراہا۔ دورے کے دوران ڈی آئی جی مکران نے لائبریری کے بہترین انتظامات کو خصوصاً سراہا اور گوادر میں کتاب بینی کے کلچر کے فروغ کے لیے کی جانے والی کوششوں کی تعریف کی۔ اس موقع پر انہوں نے طلبہ کی حوصلہ افزائی کے لیے خود بھی ہفتے میں ایک دن ذاتی طور پر کلاس لینے کی خواہش کا اظہار کیا۔
عمران قریشی نے گوادر کے باصلاحیت طلبہ کے لیے اہم اعلانات کرتے ہوئے کہا کہ مقابلہ جاتی امتحانات کی تیاری کے لیے کوئٹہ اور کراچی سے مفت کتابیں منگوائی جائیں گی، جبکہ انہوں نے طلبہ کو دیگر بڑے شہروں کی معروف اکیڈمیوں میں کلاسز لینے کی پیشکش بھی کی۔ دورے کے موقع پر طلبہ و طالبات نے دیگر شہروں کی اکیڈمک کلاسز تک رسائی اور وہاں داخلے کی خواہش ظاہر کی، جس پر ڈی آئی جی مکران رینج عمران قریشی نے فوری فیصلہ کرتے ہوئے گوادر کے طلبہ کو ملک کی بہترین اکیڈمیوں میں مفت آن لائن کلاسز کے داخلے دلوانے کا اعلان کیا تاکہ وہ اپنے شہر میں رہ کر ہی معیاری تعلیم اور بہترین اساتذہ سے رہنمائی حاصل کر سکیں۔

24/05/2026

گوادر ( ڈیجیٹل گوادر ) مستونگ کے قریب مغوی وائس چانسلر سمیت تمام افراد بحفاظت بازیاب، میر کاروان کے سربراہ میر ارشد کلمتی کا اظہارِ اطمینان

گوادر: گوادر یونیورسٹی کے وائس چانسلر پروفیسر ڈاکٹر عبدالرازق صابر، پرو وائس چانسلر سید منظور احمد ارشاد، پروفیسر ارشاد بلیدی اور ڈرائیور ہاتم بلوچ کو بحفاظت بازیاب کر لیا گیا

اس اہم پیش رفت پر میر کاروان کے سربراہ میر ارشد کلمتی نے گہرے اطمینان اور خوشی کا اظہار کرتے ہوئے کہا کہ معزز اساتذہ اور تعلیمی شخصیات کی بحفاظت واپسی پورے بلوچستان، بالخصوص مکران کے عوام کے لیے ایک بڑی خوشخبری ہے۔ انہوں نے کہا کہ اس واقعے نے نہ صرف تعلیمی حلقوں بلکہ پورے معاشرے کو تشویش میں مبتلا کر دیا تھا، تاہم آج ان کی بازیابی سے ایک مثبت پیغام گیا ہے۔

میر ارشد کلمتی نے کہا کہ اساتذہ کسی بھی قوم کا قیمتی اثاثہ ہوتے ہیں، اور ان کی سلامتی پر کوئی سمجھوتہ نہیں کیا جا سکتا۔ انہوں نے متعلقہ اداروں پر زور دیا کہ ایسے واقعات کی روک تھام کے لیے مؤثر اور دیرپا حکمت عملی اختیار کی جائے تاکہ تعلیمی سرگرمیاں بلا خوف و خطر جاری رہ سکیں۔

انہوں نے مزید کہا کہ بلوچستان میں تعلیم کے فروغ کے لیے سازگار ماحول ناگزیر ہے، اور اساتذہ کا تحفظ اسی سمت میں پہلا قدم ہے۔ ان کا کہنا تھا کہ اس واقعے سے سیکیورٹی اور تعلیمی اداروں کے تحفظ کے حوالے سے سنجیدہ اقدامات کی ضرورت مزید اجاگر ہوئی ہے۔

سربراہ میر کاروان نے کہا اساتذہ اور تعلیمی عملے کا کردار کسی بھی معاشرے کی ترقی میں بنیادی حیثیت رکھتا ہے، اور ان کے تحفظ کو یقینی بنانا ریاست کی اولین ذمہ داری ہے۔

Digital Gwadar

27/06/2026

14/06/2026

04/06/2026

04/06/2026

03/06/2026

03/06/2026

03/06/2026

25/05/2026

24/05/2026

Address

Telephone

Website

Alerts

Shortcuts

Share

Category

Listing takedown request