15/02/2025
الوداع آڪاش!💔
سنڌ وري هڪ دفعو ٻيهر ڀلوڙ شاعر ۽ بهترين انسان کان محروم ٿي وئي 😭
مان هليو ڇو ويس؟
آڪاش انصاري
تُون پُڇين ٿو پرين!
مان هليو ڇو ويس،
جڏهن شام جو جامُ
خالي نه هو،
رات رم جهم هئي،
تنهنجي ساهن جي،
جھيڻن سُرن سان ستل،
منهنجي بستر تي،
منڪر ڪا موسم هئي،
تنهنجي ڪجلين اکين جي،
ڪنارن مٿي،
منهنجي چپڙن جي ٻيڙي،
لڳي ئي لڳي،
ها! انهي ئي کان اڳي،
مان هليو ڇو ويس؟
سچ پچين او پِرين!
دل به چاهيو گهڻو،
ڪا گهڙي تنهنجي،
وارن جي ڪارين گهٽائن منجهان،
واس وٺندو رهان!
ٻن گھڙين لئي سهي،
تنهنجي آغوش جي سانوري شام ۾،
ڪنھن روپوش پياسي مسافر جيان،
مان پناهون وٺان،
کن پل ئي سهي،
ٿڪ ٿورو ڀڃان،
دل ته چاهيو گهڻو،
تنهنجي نيڻن جون،
نرمل چانڊوڪيون،
سدا مست نينڍون نياپا کڻي،
روح جي رقصان رهن،
دل ته چاهيو گهڻو،
تنهنجي ٻانهن جون ڪچڙيون،
۽ ڪومل وليون،
سئو سنديسا کڻي،
منهنجي تن تي سدا،
ائين وکريل رهن،
ها مگر ڇا ڪريون،
تنهنجي ڪاڪل جي قيدي،
ٿيڻ کان اڳي،
قيدخانن ۾ ڪائي ڪشش هئي پرين!
جيڪا ويئي ڇِڪي،
دل ته ماڻڻ گهريون،
تنهنجون سڀ دلبريون،
ها مگر ڇا ڪريون،
دار جي درد کي،
پنهنجي لذت هئي،
جيڪا ويئي ڇِڪي،
تون پڇين ٿو پرين
مان هليو ڇو ويس؟
