08/03/2026
اسلام آباد میں ٹینکی مافیا کا راج، بغیر نمبر پلیٹ ٹریکٹروں سے حادثات میں اضافہ، ایک اور نوجوان جان کی بازی ہار گیا
اسلام آباد: وفاقی دارالحکومت میں پانی کی سپلائی کے نام پر چلنے والا مبینہ ٹینکی مافیا شہریوں کے لیے خطرہ بنتا جا رہا ہے۔ شہر کے مختلف علاقوں میں بغیر نمبر پلیٹ اور کم عمر یا غیر تربیت یافتہ ڈرائیوروں کے زیرِ استعمال پانی کے ٹینکر اور ٹریکٹر آئے روز حادثات کا سبب بن رہے ہیں۔ تازہ واقعے میں ایک اور نوجوان ٹینکی ٹریکٹر کے نیچے آ کر جاں بحق ہو گیا، جس کے بعد شہر میں ایسے حادثات کی تعداد پانچ تک پہنچ گئی ہے۔
عینی شاہدین کے مطابق حادثہ اس وقت پیش آیا جب ایک تیز رفتار پانی کا ٹینکی ٹریکٹر بے قابو ہو کر سڑک پر موجود موٹر سائیکل سوار نوجوان کو کچل گیا۔ نوجوان کو فوری طور پر قریبی اسپتال منتقل کیا گیا، مگر وہ زخموں کی تاب نہ لاتے ہوئے دم توڑ گیا۔ واقعے کے بعد علاقہ مکینوں میں شدید غم و غصہ پایا جا رہا ہے۔
شہریوں کا کہنا ہے کہ اسلام آباد کے مختلف سیکٹرز اور مضافاتی علاقوں میں پانی کے ٹینکرز اور ٹریکٹرز بغیر نمبر پلیٹ اور بغیر کسی قانونی اجازت کے دندناتے پھر رہے ہیں۔ اکثر ڈرائیور کم عمر یا غیر تربیت یافتہ ہوتے ہیں، جس کی وجہ سے نہ صرف ٹریفک قوانین کی خلاف ورزی ہوتی ہے بلکہ شہریوں کی جانیں بھی خطرے میں پڑ جاتی ہیں۔
شہری حلقوں نے الزام عائد کیا ہے کہ ضلع انتظامیہ اس سنگین مسئلے پر مکمل خاموشی اختیار کیے ہوئے ہے۔ متعدد حادثات کے باوجود نہ تو ٹینکی مافیا کے خلاف کوئی مؤثر کارروائی کی گئی اور نہ ہی غیر قانونی گاڑیوں کے خلاف کریک ڈاؤن کیا گیا۔
دوسری جانب ٹریفک پولیس بھی اس معاملے میں خاموش دکھائی دیتی ہے۔ شہریوں کے مطابق ٹریفک قوانین کی کھلی خلاف ورزی کے باوجود کسی قسم کی چیکنگ یا جرمانے نظر نہیں آتے۔ شہریوں کا کہنا ہے کہ مختلف سرکاری محکمے اس مسئلے کی ذمہ داری ایک دوسرے پر ڈال رہے ہیں جبکہ سارا ملبہ اسلام آباد پولیس کے تھانوں پر ڈال کر دیگر ادارے خود کو بری الذمہ قرار دے رہے ہیں۔
سماجی حلقوں اور شہری تنظیموں نے مطالبہ کیا ہے کہ حکومت اور ضلعی انتظامیہ فوری طور پر اس معاملے کا نوٹس لے، بغیر نمبر پلیٹ ٹینکروں کے خلاف سخت کارروائی کی جائے اور کم عمر یا غیر تربیت یافتہ ڈرائیوروں کو سڑکوں پر گاڑیاں چلانے سے روکا جائے تاکہ مزید قیمتی جانوں کے ضیاع سے بچا جا سکے۔ شہریوں نے یہ بھی مطالبہ کیا ہے کہ پانی کی فراہمی کے نظام کو بہتر بنایا جائے تاکہ ٹینکی مافیا کی اجارہ داری ختم ہو سکے۔
