03/09/2025
"یہ ہے وادیِ لیپا۔۔۔ ایک جنت، جو بادلوں کے سنگ کھیلتی ہے، جس کے پہاڑ فطرت کی گواہی دیتے ہیں اور جس کی ہوا دل و دماغ کو سکون بخشتی ہے۔ یہاں کے چشمے صدیوں سے بہہ رہے ہیں اور ان کی ٹھنڈی چھو ہر مسافر کے دل کو تازگی دیتی ہے۔
لیکن ذرا سوچئے۔۔۔ اگر کل یہ بہتے چشمے خشک ہو جائیں، یہ سبز پہاڑ اجڑ جائیں، اور یہ بادل رحمت کے بجائے عذاب بن کر برسنے لگیں؟ یہی ہے گلوبل وارمنگ کی اصل حقیقت۔۔۔ ایک خطرہ جو دنیا بھر کو اپنی لپیٹ میں لے رہا ہے۔
یورپ کی شدید گرمی، ایشیا کے تباہ کن سیلاب، اور قطبین کی پگھلتی برف۔۔۔ یہ سب ایک ہی کہانی سناتے ہیں۔ اور وہ یہ کہ انسان نے فطرت کے ساتھ جو ناانصافی کی ہے، اس کی قیمت پوری دنیا چکا رہی ہے۔
لیپا اب تک اس بڑے خطرے سے محفوظ ہے۔ مگر یاد رہے۔۔۔ 2018 میں شمزبری پہاڑ پر کلاوڈ برشٹ ہوا تھا، جو ہمیں خبردار کرتا ہے کہ یہ وادی بھی کل ایسے حادثے کا شکار ہو سکتی ہے۔ یہ حسین مناظر، یہ درخت، یہ ندی نالے۔۔۔ سب ہماری ذمے داری ہیں۔
یہ وقت ہے کہ ہم اپنے جنگلات بچائیں، درخت لگائیں، اور اپنے ماحول کو سنبھالیں۔ کیونکہ اگر آج ہم نے قدم نہ اٹھایا تو کل آنے والی نسلیں ہم سے یہ سوال کریں گی:
کیا ہم نے لیپا جیسے جنت نظیر خطے کی حفاظت کی؟ یا اسے بھی دنیا کے دوسرے اجڑے دیسوں کی طرح برباد ہونے دیا؟
فیصلہ آج ہمارے ہاتھ میں ہے۔۔۔ 🌍🍃"
