27/12/2024
ایک ایسی سچی سٹوری جو آپ کی زندگی بدل دے گی ۔
بادشاہ بھی اللہ کے بغیر،سکون سے نہیں رہ سکتے۔۔پڑھیں اور پڑھائیں ۔۔
بنو امیہ کا بادشاہ عبدالملک بن مروان جب ملک شام میں طاعون کی وبا پھیلی تو موت کے ڈر سے گھوڑے پر سوار ہو کر اپنے شہر سے بھاگ نکلا اور ساتھ میں اپنے خاص غلام اور کچھ فوج بھی لے لی اور وہ طاعون کے ڈر سے اس قدر خائف اور ہراساں تھا کہ زمین پر پاؤں نہیں رکھتا تھا بلکہ گھوڑے کی پشت پر سوتا تھا۔ دورانِ سفر ایک رات اس کو نیند نہیں آئی۔ تو اس نے اپنے غلام سے کہا کہ تم مجھے کوئی قصہ سناؤ۔
تو ہوشیار غلام نے بادشاہ کو نصیحت کرنے کا موقع پا کر یہ قصہ سنایا کہ ایک لومڑی اپنی جان کی حفاظت کے لئے ایک شیر کی خدمت گزاری کیا کرتی تھی تو کوئی درندہ شیر کی ہیبت کی وجہ سے لومڑی کی طرف دیکھ نہیں سکتا تھا۔ اور لومڑی نہایت ہی بے خوفی اور اطمینان سے شیر کے ساتھ زندگی بسر کرتی تھی۔ اچانک ایک دن ایک عقاب لومڑی پر جھپٹا تو لومڑی بھاگ کر شیر کے پاس چلی گئی۔ اور شیر نے اس کو اپنی پیٹھ پر بٹھالیا۔ عقاب دوبارہ جھپٹا اور لومڑی کو شیر کی پیٹھ پر سے اپنے چنگل میں دبا کر اڑ گیا۔ لومڑی چلا چلا کر شیر سے فریاد کرنے لگی تو شیر نے کہا کہ اے لومڑی! میں زمین پر رہنے والے درندوں سے تیری حفاظت کرسکتا ہوں لیکن آسمان کی طرف سے حملہ کرنے والوں سے میں تجھے نہیں بچا سکتا۔
یہ قصہ سن کر عبدالملک بادشاہ کو بڑی عبرت حاصل ہوئی اور اس کی سمجھ میں آگیا کہ میری فوج ان دشمنوں سے تو میری حفاظت کرسکتی ہے جو زمین پر رہتے ہیں مگر جو بلائیں اور وبائیں آسمان سے مجھ پر حملہ آور ہوں، ان سے مجھ کو نہ میری بادشاہی بچا سکتی ہے نہ میرا خزانہ اور نہ میرا لشکر میری حفاظت کرسکتا ہے۔ آسمانی بلاؤں سے بچانے والا تو بجز خدا کے اور کوئی نہیں ہوسکتا۔ یہ سوچ کر عبدالملک بادشاہ کے دل سے طاعون کا خوف جاتا رہا اور وہ رضاء الٰہی پر راضی رہ کر سکون و اطمینان کے ساتھ اپنے شاہی محل میں رہنے لگا
نتیجہ ۔۔ اس تاریخی واقعہ سے ہم کیا سیکھ سکتے ہیں ؟
1۔طاعون یا کسی بھی موذی وبا سے بھاگنا نہیں چاہیے ۔
2۔اگر کوئی غلام یا نوکربھی کوئی نصیحت آموز بات کرے تو قبول کرلینے میں سکون ہے
3۔چاپلوس لوگ اپنے ساتھ نہیں رکھنے چاہیے ۔۔
4۔غلام نے غلام ہوکر بغیر خوف کے اپنے بادشاہ کو نصیحت لگا کر اس کا قبلہ درست کردیا ۔۔
5۔غلام نے انتظار کیا جب بادشاہ کوئی بات سننے پر قائل ہوا تو،غلام نے زبان کو حرکت دی ۔
6 ۔ ہمارا یہ پکا یقین اور محکم ایمان ہوانا چاہیے کہ سب کچھ خدا کی مرضی سے ہوتا ہے ۔
سیددلاور حسین شاہ کاظمی
27 دسمبر 2024 بروز جمعہ المبارک
وقت صبح 5:53
بمقام ۔۔جامع مسجد محمدیہ غوثیہ گلی نمبر 2 چشتی آباد نزد کوہ نور ٹیکسٹائل ملز راولپنڈی
