29/08/2026
استاد محترم — زندگی کا معمار - پرنسپل کمین خان صاحب, پرنسپل گورنمنٹ ہائیر سیکنڈری سکول خانپور، لوئر دیر
کہا جاتا ہے کہ استاد روحانی باپ کا درجہ رکھتا ہے۔ اور جن اساتذہ نے ہماری زندگی کی بنیادیں مضبوط کی ہوں، ان کی اہمیت انسان کبھی فراموش نہیں کر سکتا۔
میں ان دنوں اپنے ویکنڈ گزارنے کے لیے اپنے آبائی گاؤں لوئر دیر آیا ہوا تھا۔ اسی دوران اپنے اُس اسکول کا دورہ کرنے کا موقع ملا جہاں سے میں نے میٹرک کیا تھا، گورنمنٹ ہائر سیکنڈری اسکول خانپور۔
اسکول پہنچ کر ایک خوبصورت اتفاق نے پرانی یادیں تازہ کر دیں۔ میرے سائنس کے پرنسپل کمین خان صاحب، جنہوں نے نویں اور دسویں جماعت میں ہماری سائنس کی بنیادی تعلیم اور سمجھ بوجھ کی بنیاد رکھی تھی، آج اسی اسکول کے پرنسپل ہیں۔
میں نے جب ان کی کاوشوں اور اقدامات کو دیکھا تو دل خوش ہوگیا۔ انہوں نے صرف طلبہ کی تعلیمی اور اخلاقی تربیت پر توجہ نہیں دی بلکہ اسکول کے فزیکل انفراسٹرکچر کو بھی بہت بہتر بنایا ہے۔ اسکول کی موجودہ حالت دیکھ کر مجھے بے حد خوشی ہوئی اور دل سے اپنے استاد کے لیے دعائیں نکلیں۔ یقیناً ایک استاد کے لیے اس سے بڑا اعزاز کیا ہو سکتا ہے کہ اس کا لگایا ہوا پودا آج ایک تناور درخت بن چکا ہو۔
انہوں نے ہمیں مختلف کلاسز کا دورہ بھی کروایا۔ وہاں موجود اساتذہ سے ملاقات ہوئی اور یہ دیکھ کر بھی خوشی ہوئی کہ آج ہمارے اسکولوں میں پی ایچ ڈی اور اعلیٰ تعلیم یافتہ اساتذہ بھی اپنی خدمات انجام دے رہے ہیں۔
ہم نے بھی طلبہ سے گفتگو کی، اپنی زندگی کے تجربات، مشاہدات اور سیکھے ہوئے اسباق ان کے ساتھ شیئر کیے اور ان کی بہتر مستقبل کے حوالے سے اپنی خواہشات اور خیالات کا اظہار کیا۔
میرا ہمیشہ سے یہ ماننا ہے کہ ہم نے زندگی میں جو کچھ سیکھا ہے، اسے نئی نسل تک منتقل کرنا بھی ہماری ذمہ داری ہے۔ جب بھی میں اپنے گاؤں آتا ہوں، کوشش کرتا ہوں کہ یہاں کے بچوں کے ساتھ کچھ وقت گزاروں، ان کی رہنمائی کروں اور اپنے تجربات ان کے ساتھ شیئر کروں۔
اس موقع پر ا یاز محمد بھی موجود تھے، جو اس وقت سعودی عرب میں ملازمت کر رہے ہیں اور اسی اسکول کے سابق طالب علم رہے ہیں۔ ان کی موجودگی نے اس ملاقات کو مزید خوبصورت اور یادگار بنا دیا۔
آخر میں آپ سب سے بھی ایک گزارش ہے:
جب بھی آپ اپنے آبائی گاؤں جائیں، اپنے پرانے اسکول کا ضرور دورہ کریں۔ وہاں کے اساتذہ سے ملیں، طلبہ کے ساتھ وقت گزاریں اور اپنے علم، تجربے اور صلاحیت کے مطابق ان کی رہنمائی کریں۔
یاد رکھیں، شاید آپ کی چند باتیں، چند منٹ کی رہنمائی یا ایک چھوٹا سا مشورہ کسی طالب علم کی پوری زندگی کا رخ بدل دے۔
اپنی نئی نسل کے لیے وقت نکالنا صرف خدمت نہیں، ہمارا فرض بھی ہے۔
اللہ تعالیٰ ہمارے تمام اساتذہ کو صحت، عزت اور لمبی زندگی عطا فرمائے، اور انہیں ہماری آنے والی نسلوں کی تربیت کا مزید موقع دے۔ آمین۔ 🤲
#استاد #تعلیم
