30/08/2026
*جموں و کشمیر کمیونٹی انٹرنیشنل کا تاریخی اجلاس: تحریکِ آزادیِ کشمیر میں نئی راہیں متعین*
اسلام آباد — 30 اگست 2026
جموں و کشمیر کمیونٹی انٹرنیشنل کی مرکزی ایگزیکٹو کمیٹی کا ماہانہ مشاورتی و تنظیمی اجلاس اسلام آباد میں منعقد ہوا۔ اجلاس کی صدارت چیئرمین جموں و کشمیر کمیونٹی انٹرنیشنل غلام نبی بٹ نے کی، جبکہ اجلاس کا ایجنڈا جنرل سیکرٹری راجہ پرویز احمد نے پیش کیا۔
اجلاس میں جموں و کشمیر کمیونٹی انٹرنیشنل کی تنظیمی سرگرمیوں، تحریکِ آزادیِ کشمیر کے حوالے سے آئندہ کی حکمتِ عملی اور بیرونِ ملک تنظیم کے دائرۂ کار کو مزید مؤثر اور فعال بنانے کے مختلف امور پر تفصیلی غور و خوض کیا گیا۔
اجلاس میں بتایا گیا کہ جموں و کشمیر کمیونٹی انٹرنیشنل اسلام آباد میں مختلف سیاسی، سماجی اور سفارتی فورمز کے ساتھ مسلسل رابطے میں ہے اور مسئلہ کشمیر، حقِ خودارادیت اور پاکستان کی مثبت خارجہ پالیسی کو اجاگر کرنے کے لیے اپنی کوششیں جاری رکھے ہوئے ہے۔
ایگزیکٹو کمیٹی کے ارکان نے تنظیم کو بیرونِ ملک مزید منظم اور فعال بنانے کے ساتھ ساتھ آزاد کشمیر بھر میں نوجوانوں پر مشتمل تنظیمی کمیٹیاں تشکیل دینے کی تجاویز پر بھی غور کیا۔ اس سلسلے میں آزاد کشمیر کے تینوں ڈویژنوں میں مرحلہ وار ممبرسازی مہم شروع کرنے کی تجویز بھی زیرِ غور آئی، تاکہ نوجوان نسل کو تحریکِ آزادیِ کشمیر کے مؤثر اور منظم کردار سے جوڑا جا سکے۔
اجلاس میں مقبوضہ جموں و کشمیر میں بھارتی حکومت کی جانب سے انسانی حقوق کی سنگین خلاف ورزیوں پر بھی گہری تشویش کا اظہار کیا گیا۔ فیصلہ کیا گیا کہ دنیا کے مختلف ممالک میں موجود متعلقہ سفارت خانوں اور عالمی انسانی حقوق کے اداروں کو خطوط ارسال کرکے مقبوضہ کشمیر میں جاری بھارتی مظالم، انسانی حقوق کی پامالیوں اور کشمیری عوام کے بنیادی حقوق کی خلاف ورزیوں سے آگاہ کیا جائے گا۔
اجلاس میں فیصلہ کیا گیا کہ جموں و کشمیر کمیونٹی انٹرنیشنل دنیا بھر میں 6 ستمبر، یومِ دفاعِ پاکستان، کو نہایت جوش و جذبے اور قومی یکجہتی کے ساتھ منائے گی۔ بیرونِ ملک تنظیم کے مختلف چیپٹرز اور ذمہ داران اس سلسلے میں خصوصی پروگرامز کا اہتمام کریں گے۔
ایگزیکٹو کمیٹی کے ارکان نے آزاد جموں و کشمیر میں حالیہ کامیاب انتخابات کے انعقاد پر حکومتِ پاکستان، حکومتِ آزاد کشمیر اور متعلقہ انتظامیہ کو مبارکباد پیش کرتے ہوئے آزادانہ، منصفانہ اور پُرامن انتخابی عمل کے انعقاد پر خراجِ تحسین پیش کیا۔
جموں و کشمیر کمیونٹی انٹرنیشنل نے آزاد جموں و کشمیر کے نومنتخب وزیراعظم بیرسٹر افتخار گیلانی کو بھی منصب سنبھالنے پر دلی مبارکباد پیش کی اور ان کے لیے نیک خواہشات کا اظہار کرتے ہوئے امید ظاہر کی کہ وہ آزاد کشمیر کی تعمیر و ترقی، عوامی مسائل کے حل اور مسئلہ کشمیر کو مؤثر انداز میں اجاگر کرنے کے لیے اپنا بھرپور کردار ادا کریں گے۔
اجلاس میں جموں و کشمیر کمیونٹی انٹرنیشنل میں شامل ہونے والے نئے اراکین کا پرتپاک خیرمقدم بھی کیا گیا۔ نئے اراکین میں چوہدری محمد سعید، چوہدری ممتاز، محمد صغیر اور محمد وسیم اعوان شامل ہیں۔ اجلاس کے شرکاء نے اس امید کا اظہار کیا کہ نئے اراکین تنظیم کو مزید فعال، مضبوط اور منظم بنانے میں اپنا بھرپور کردار ادا کریں گے۔
اجلاس کے دوران تنظیم کے سینئر وائس چیئرمین سردار کامران اعظم، پروفیسر خواجہ فاروق احمد، راجہ محمد زرین خان، مشتاق پیرزادہ، چوہدری محمد شکیل، ڈاکٹر عابد عباسی، سید یوسف ہمدانی، چوہدری محمد سعید، چوہدری ممتاز اور محمد نصیر نے مختلف امور پر اپنے خیالات کا اظہار کیا اور تنظیمی سرگرمیوں کو مزید مؤثر بنانے کے لیے اپنی تجاویز پیش کیں۔
اجلاس کے اختتام پر اس عزم کا اعادہ کیا گیا کہ جموں و کشمیر کمیونٹی انٹرنیشنل دنیا بھر میں کشمیری عوام کے بنیادی حقوق، حقِ خودارادیت اور مسئلہ کشمیر کو اجاگر کرنے کے لیے اپنی سیاسی، سفارتی اور تنظیمی جدوجہد کو مزید مؤثر انداز میں جاری رکھے گی۔
