28/09/2026
خیبر: جمرود تحصیل کے سامنے کوکی قوم کے مشران اور جاں بحق افراد کے لواحقین کا احتجاج،لاشیں پاک افغان شاہراہ پر رکھ بند کردی
خیبر کے تحصیل جمرود کے سامنے کوکی قوم کے مشران اور گزشتہ روز پولیس کے زیرِ حراست ہلاک ہونے والے دو افراد کے لواحقین کی جانب سے احتجاجی مظاہرہ جاری ہے۔ مظاہرین نے پاک افغان شاہراہ کو ہر قسم کی ٹریفک کے لیے بند کر دیا، جبکہ جاں بحق افراد کی لاشیں سڑک پر رکھ کر احتجاج کیا جا رہا ہے۔
مظاہرین اور لواحقین کا مؤقف ہے کہ ان کے بچے ایس ایچ او ملاگوری ریاض حسین کے قتل میں ملوث نہیں تھے اور انہیں بغیر کسی تحقیق و انکوائری کے ماورائے عدالت قتل کیا گیا ہے۔ لواحقین نے واقعے کی آزادانہ تحقیقات کا مطالبہ کرتے ہوئے سی سی پی او پشاور اور ڈی پی او خیبر کو فوری طور پر معطل کرنے کا مطالبہ بھی کیا ہے۔
لواحقین نے مطالبہ کیا کہ ہمارے بچوں کے قتل میں مبینہ طور پر ملوث افراد کے خلاف ایف آئی آر درج کی جائے، جبکہ متاثرہ خاندان کے خلاف درج ایف آئی آر بھی واپس لی جائے۔
واضح رہے کہ گزشتہ روز تحصیل ملاگوری کے علاقے میں نان کسٹم پیڈ گاڑیوں سے متعلق کارروائی کے دوران فائرنگ کے تبادلے میں ایس ایچ او ملاگوری ریاض حسین زخمی ہوئے تھے، جو بعد ازاں زخموں کی تاب نہ لاتے ہوئے شہید ہوگئے۔ پولیس نے موقع سے دو افراد کو گرفتار کیا تھا۔
پولیس کے مطابق گرفتار دونوں افراد کو جائے وقوعہ کی نشاندہی کے لیے لے جایا جا رہا تھا کہ راستے میں ان کے ساتھیوں نے انہیں پولیس کی حراست سے چھڑانے کی کوشش کے دوران فائرنگ کرکے ہلاک کر دیا۔
واقعے کے بعد جاں بحق افراد کے لواحقین کی جانب سے احتجاج جاری ہے، جبکہ پاک افغان شاہراہ کی بندش کے باعث ہر قسم کی ٹریفک معطل ہے۔
