26/06/2026
آج میں آپ کو کسی بڑے تاجر، افسر یا امیر آدمی کی نہیں، بلکہ ایک ایسے انسان کی کہانی سنانا چاہتا ہوں جو شاید دنیا کی نظر میں بہت چھوٹا ہو، لیکن اللہ کی نظر میں بہت بڑا ہو سکتا ہے۔
اسٹاف کالونی کے گیٹ کے سامنے کئی سالوں سے ایک موچی بھائی بیٹھتے ہیں۔ نہ کوئی دکان، نہ کوئی آرام دہ جگہ، نہ اے سی، نہ پنکھا۔🥹 اوپر سے آگ برساتا سورج اور نیچے تپتی زمین۔ شدید گرمی میں جب ہم چند منٹ بھی باہر کھڑے نہیں ہو سکتے، یہ شخص سارا دن لوگوں کے پھٹے ہوئے جوتے سیتا ہے تاکہ شام کو اپنے بچوں کے لیے رزق لے جا سکے۔😭
میں ایک دن اپنی جوتی سلوانے ان کے پاس گیا۔ میرے ہاتھ میں ایک کلو خوبانیاں تھیں۔ آج کل پھل غریب آدمی کی پہنچ سے کافی دور ہو چکے ہیں۔ میں نے دیکھا کہ وہ میری جوتی کی سلائی بھی کر رہے تھے اور بار بار خوبانیوں کی طرف بھی دیکھ لیتے تھے۔ ان کی آنکھوں میں کوئی لالچ نہیں تھی، کوئی سوال نہیں تھا، کوئی درخواست نہیں تھی۔ بس ایک خاموش سی خواہش تھی، جو شاید صرف ایک بھوکا یا محروم انسان ہی محسوس کر سکتا ہے۔💔
اسی لمحے میرے دل میں خیال آیا کہ یہ لوگ کتنے خوددار ہوتے ہیں۔ نہ مانگتے ہیں، نہ ہاتھ پھیلاتے ہیں، نہ اپنی مجبوریوں کا رونا روتے ہیں۔ بس خاموشی سے محنت کرتے ہیں اور حلال رزق کماتے ہیں۔
میں نے فوراً ایک کلو خوبانی ان کی طرف بڑھا دی۔ اللہ گواہ ہے، اس وقت ان کے چہرے پر جو خوشی تھی، وہ شاید ہزاروں روپے دینے سے بھی نہ آتی۔ ان کی آنکھوں میں چمک تھی، دعا تھی، اور ایک ایسا سکون تھا جو الفاظ میں بیان نہیں کیا جا سکتا۔
یہ بات میں اپنی تعریف کے لیے نہیں لکھ رہا۔ اگر تعریف کرانی ہوتی تو شاید میں یہ واقعہ بیان ہی نہ کرتا۔ مقصد صرف اتنا ہے کہ ہم سب اپنے اردگرد موجود ان سفید پوش لوگوں کو پہچانیں جو مانگتے نہیں، مگر ضرورت مند ہوتے ہیں۔ جو فریاد نہیں کرتے، مگر مدد کے حقدار ہوتے ہیں۔
کبھی کسی موچی کے پاس جائیں، کسی ریڑھی والے کے پاس جائیں، کسی مزدور کے پاس جائیں، تو اگر استطاعت ہو تو 20، 30 یا 50 روپے اضافی دے دیا کریں۔ یقین مانیں، آپ کے چند روپے شاید ان کے گھر میں کسی بچے کے چہرے پر مسکراہٹ لے آئیں۔🤗
ہم اکثر سوچتے ہیں کہ اللہ غریبوں کی مدد کیسے کرتا ہے؟
اللہ خود زمین پر نہیں آتا…
وہ کسی کے دل میں رحم ڈال دیتا ہے،
کسی کے ہاتھ میں خیر رکھ دیتا ہے،
کسی کے رزق میں برکت ڈال دیتا ہے,
اور کسی کو کسی ضرورت مند کے دروازے تک پہنچا دیتا ہے۔
شاید اسی لیے کہتے ہیں کہ دنیا ابھی تک قائم ہے، کیونکہ آج بھی کچھ لوگ ایسے ہیں جو مانگتے نہیں، اور کچھ لوگ ایسے ہیں جو پوچھے بغیر دے دیتے ہیں۔
آج اگر آپ یہ پوسٹ پڑھ رہے ہیں تو ایک دعا ان محنت کش موچی بھائی کے لیے ضرور کیجیے گا۔
اللہ ان کے رزق میں برکت عطا فرمائے، ان کی محنت قبول فرمائے، اور ہمیں بھی ایسے لوگوں کی عزت کرنے اور ان کی خاموش ضرورتوں کو سمجھنے کی توفیق عطا فرمائے🤲
