14/06/2026
پہاڑوں کی چٹانیں آج بھی گواہی دے رہی ہیں کہ امیر المؤمنین حضرت عمر فاروق رضی اللہ عنہ کا دورِ خلافت کس قدر حسین، عدل و انصاف پر مبنی اور انسانیت کی فلاح کے لیے وقف تھا۔
آج سے تقریباً 1400 سال بعد بھی لوگوں کے ہاتھوں لکھی گئی عبارتیں زندہ ہیں، جو اس بات کا ثبوت ہیں کہ اس عظیم خلیفہ کے لیے لوگ ہر لمحہ دعا گو رہتے تھے اور ان سے محبت رکھتے تھے۔
سعودی عرب کے مدینہ منورہ کے علاقے المہد میں آثارِ قدیمہ کے ماہرین نے ایک نایاب اور قدیم چٹانی کتبہ دریافت کیا ہے جس پر یہ الفاظ درج ہیں:
"اللہ ولی عمر بن الخطاب فی الدنیا والآخرۃ، لا إلہ إلا اللہ"
یعنی:
"اللہ دنیا اور آخرت میں عمر بن الخطاب کا مددگار اور کارساز ہے، اللہ کے سوا کوئی معبود نہیں۔"
ماہرین کے مطابق یہ تحریر ابتدائی اسلامی دور کی یادگار ہے اور حجازی رسم الخط میں لکھی گئی ہے، جو عربی رسم الخط کی قدیم ترین اقسام میں شمار ہوتا ہے۔
حضرت عمر فاروق رضی اللہ عنہ وہ عظیم ہستی ہیں جن کے بارے میں رسول اللہ ﷺ نے دعا فرمائی: "اے اللہ! اسلام کو عمر بن خطاب یا عمرو بن ہشام میں سے جس کے ذریعے چاہے عزت عطا فرما۔" پھر اللہ تعالیٰ نے عمر بن خطاب رضی اللہ عنہ کو اسلام کے لیے منتخب فرمایا۔ آپؓ کے اسلام قبول کرنے کے بعد مسلمانوں کو وہ قوت اور استحکام حاصل ہوا جس کا اثر تاریخ کے صفحات میں آج بھی نمایاں نظر آتا ہے۔ احادیث کی کتابیں اس حقیقت کی گواہ ہیں کہ حضرت عمر رضی اللہ عنہ کا اسلام لانا امتِ مسلمہ کے لیے ایک عظیم نعمت ثابت ہوا۔
حضرت عمر رضی اللہ عنہ کی شخصیت کا سب سے نمایاں پہلو ان کا خوفِ خدا تھا۔ رسول اللہ ﷺ نے متعدد مواقع پر آپؓ کو جنت کی بشارت عطا فرمائی، مگر اس کے باوجود آپؓ اللہ تعالیٰ کی پکڑ سے اس قدر خوفزدہ رہتے تھے کہ آخرت کے تصور سے لرز اٹھتے تھے۔ روایات میں آتا ہے کہ جب حضرت حذیفہ بن یمان رضی اللہ عنہ، جو رسول اللہ ﷺ کے رازدار صحابی تھے، منافقین کے نام جانتے تھے تو حضرت عمر رضی اللہ عنہ ان کے پاس تشریف لے گئے اور نہایت عاجزی سے دریافت کیا کہ کہیں ان منافقین میں عمر کا نام تو شامل نہیں؟ یہ سوال ایک عام انسان کا نہیں بلکہ اس شخص کا تھا جو اُس وقت دنیا کی عظیم ترین سلطنتوں میں سے ایک کا حکمران تھا۔ لیکن خوفِ خدا نے اسے ہمیشہ عاجز اور جواب دہ محسوس کروایا۔
اللہ اکبر! یہ وہ امیر المؤمنین تھے جن کی حکومت نصف دنیا تک پھیل چکی تھی، مگر ان کی سادگی ایسی تھی کہ اقتدار ان کے رہن سہن کو بدل نہ سکا۔ ان کے لباس پر پیوند ہوتے تھے، ان کا طرزِ زندگی عام مسلمانوں جیسا تھا، اور انہوں نے کبھی شاہانہ زندگی اختیار نہیں کی۔ صحابۂ کرام رضوان اللہ علیہم اجمعین نے کئی مرتبہ اصرار کیا کہ آپ اپنے لباس اور طرزِ زندگی میں کچھ تبدیلی فرمائیں تاکہ بیرونی وفود پر اسلامی ریاست کا رعب قائم ہو، لیکن حضرت عمر رضی اللہ عنہ نے سادگی کو ترجیح دی۔ یہاں تک کہ ام المؤمنین حضرت عائشہ صدیقہ رضی اللہ عنہا نے بھی اس حوالے سے مشورہ دیا، مگر حضرت عمر رضی اللہ عنہ کی عاجزی اور سادگی اپنی جگہ قائم رہی۔
حضرت عمر فاروق رضی اللہ عنہ نے کبھی اپنے منصب سے ذاتی فائدہ نہیں اٹھایا اور نہ ہی اپنے خاندان کے کسی فرد کو ناجائز طور پر آگے بڑھنے دیا۔ جب اپنی وفات کے وقت خلافت کے مسئلے پر غور کیا تو اپنے کسی بیٹے، بھائی یا قریبی رشتہ دار کو جانشین مقرر نہیں کیا، بلکہ چھ رکنی شوریٰ تشکیل دی جس میں جلیل القدر صحابۂ کرام شامل تھے تاکہ امت مشورے سے اپنا خلیفہ منتخب کرے۔
یہ بات بھی قابلِ غور ہے کہ حضرت سعید بن زید رضی اللہ عنہ، جو عشرہ مبشرہ میں شامل تھے اور حضرت عمر رضی اللہ عنہ کے قریبی رشتہ دار بھی تھے، انہیں اس شوریٰ میں شامل نہیں کیا گیا تاکہ کوئی یہ نہ سمجھے کہ رشتہ داری کی بنیاد پر کسی کو ترجیح دی جا رہی ہے۔ اسی طرح اپنے صاحبزادے حضرت عبداللہ بن عمر رضی اللہ عنہما کے بارے میں واضح فرمایا کہ انہیں مشورے میں شامل رکھا جا سکتا ہے مگر خلافت کے لیے امیدوار نہ بنایا جائے۔ اقتدار کے معاملے میں ایسی دیانت اور غیر جانبداری انسانی تاریخ میں بہت کم نظر آتی ہے۔
حضرت عمر رضی اللہ عنہ کے دور میں بیت المقدس فتح ہوا، فارس کی ساسانی سلطنت شکست سے دوچار ہوئی، رومی سلطنت کو بڑے بڑے معرکوں میں ناکامی کا سامنا کرنا پڑا، اور اسلامی ریاست ایک عظیم عالمی طاقت بن کر ابھری۔ لیکن ان تمام فتوحات کے باوجود حضرت عمر رضی اللہ عنہ کی توجہ اپنے رب کی رضا اور اپنی رعایا کی خدمت پر مرکوز رہی۔
یہی وجہ ہے کہ حضرت عمر فاروق رضی اللہ عنہ کے عدل کا اعتراف صرف مسلمانوں نے ہی نہیں بلکہ غیر مسلم مؤرخین اور مفکرین نے بھی کیا۔ آج بھی دنیا بھر میں "عمر کے عدل" کی مثال دی جاتی ہے۔ بہت سے غیر مسلم مصنفین نے ان کے نظامِ حکومت، احتساب اور عوامی فلاح کے اصولوں کو مثالی قرار دیا ہے۔
افسوس کی بات یہ ہے کہ جس شخصیت کے عدل، دیانت، تقویٰ اور خدمات کا اعتراف دوست اور دشمن سب کرتے ہیں، اسی عظیم ہستی کے بارے میں بعض نام نہاد مسلمان نازیبا زبان استعمال کرتے ہیں۔ حالانکہ تاریخ کا انصاف یہ ہے کہ حضرت عمر فاروق رضی اللہ عنہ جیسی شخصیات انسانیت کا مشترکہ سرمایہ ہوتی ہیں۔
پھر وہ وقت بھی آیا جب ایک مجوسی غلام، ابو لؤلؤ فیروز نے نمازِ فجر کے دوران آپؓ پر حملہ کر دیا۔ شدید زخمی ہونے کے باوجود حضرت عمر رضی اللہ عنہ نے امت کے معاملات، خلافت کے مستقبل اور مسلمانوں کی بھلائی کے بارے میں اپنی آخری نصیحتیں جاری رکھیں۔ آپؓ چند روز تک زندہ رہے اور پھر اپنے رب سے جا ملے، مگر جاتے جاتے بھی امت کو انتشار سے بچانے کا سامان کر گئے۔
آج صدیوں بعد دریافت ہونے والی یہ چٹانی تحریر صرف چند الفاظ نہیں، بلکہ اس بات کی گواہی ہے کہ حضرت عمر فاروق رضی اللہ عنہ اپنے زمانے میں لوگوں کے دلوں میں کس قدر عظیم مقام رکھتے تھے۔ ان کے لیے دعائیں لکھی گئیں، ان کی محبت چٹانوں پر نقش کی گئی، اور آج 1400 سال بعد بھی وہ نقوش باقی ہیں۔
حقیقت یہ ہے کہ دنیا نے بے شمار حکمران دیکھے، مگر عدل میں عمر، سادگی میں عمر، دیانت میں عمر، احتساب میں عمر اور خوفِ خدا میں عمر جیسی مثالیں بہت کم ملتی ہیں۔ یہی وجہ ہے کہ آج بھی مسلمان ہوں یا غیر مسلم، لوگ حضرت عمر فاروق رضی اللہ عنہ جیسے حکمران کی خواہش رکھتے ہیں۔
رضی اللہ تعالیٰ عنہ وارضاہ۔
القلم | محمد فیاض قریشی۔
