10/09/2025
کراچی ایکسپورٹ پروسیسنگ زون میں عظیم الشان محفلِ میلاد النبی ﷺ کا انعقاد
کراچی ─ کراچی ایکسپورٹ پروسیسنگ زون اتھارٹی (EPZA) کے زیرِ اہتمام جشنِ ولادتِ مصطفیٰ ﷺ کے سلسلے میں ایک عظیم الشان اور روح پرور محفلِ میلاد النبی ﷺ منعقد ہوئی۔ اس بابرکت اجتماع میں سیکریٹری EPZA، بی جی ایم، جی ایم اور دیگر افسران سمیت معزز شخصیات نے شرکت کی۔
محفل سے ممتاز مبلغِ دعوتِ اسلامی مولانا یوسف سلیم عطاری مدنی دامت برکاتھم نے ایمان افروز خطاب فرمایا، جس کا موضوع حُسنِ مصطفیٰ ﷺ، اخلاقِ مصطفیٰ ﷺ اور حضور ﷺ سے محبت تھا۔ آپ نے نہایت دلنشین انداز میں سیرتِ طیبہ کے مختلف پہلوؤں پر روشنی ڈالی اور سامعین کو عملی زندگی میں ان تعلیمات کو اپنانے کی ترغیب دی۔
اس موقع پر شرکاءِ اجتماع نے مختلف اعمالِ خیر کی پابندی کا عزم کیا۔ شرکاء نے نماز کی پابندی کرنے، داڑھی رکھنے اور حضور ﷺ کی سیرت کے مطابق زندگی گزارنے کے وعدے کیے۔
محفل درود و سلام اور نعتیہ اشعار کی صداؤں سے گونجتی رہی، جبکہ عشقِ رسول ﷺ اور روحانیت کا رنگ محفل پر غالب رہا۔ شرکاء نے اس اجتماع کو 1500 ویں جشنِ ولادتِ مصطفیٰ ﷺ کے سلسلے کی ایک تاریخی اور یادگار محفل قرار دیا۔
