05/09/2026
کراچی یونیورسٹی روڈ مکسڈ ٹریفک لین کھولنے کے لیے ہدف مقرر کردیا گیا ہے۔ ٹرانس کراچی کے اجلاس میں بی آر ٹی ریڈ لائن منصوبے پر پیشرفت کا جائزہ لیا گیا جس میں ایف ڈبلیو او نے یونیورسٹی روڈ کی مکسڈ ٹریفک لین 15ستمبر تک کھولنے کا ہدف مقرر کیا ہے جبکہ موسمیات فلائی اوور بھی مکسڈ ٹریفک کے لیے 20 ستمبر تک مکمل کرکے کھول دیا جائے گا۔ اسکے علاوہ حسن اسکوائر سے نیپا پل تک بائیں جانب کی سڑک ستمبر کے تیسرے ہفتے میں کھولنےکا فیصلہ کیا گیا ہے، ایف ڈبلیو او حکام کا کہنا ہے کہ حسن اسکوائر سے نیپا تک سڑک کی تکمیل میں تاخیر کی وجہ نئی سیوریج لائن کی تنصیب ہےجبکہ یونیورسٹی روڈ کے اطراف عمارتوں کے لیے نئی سیوریج لائن بچھائی جارہی ہے۔ ٹرانس حکام کا کہنا ہے کہ ریڈلائن منصوبے پر مختلف مقامات پر متعدد آن گراؤنڈ چیلنجز کا سامنا ہے، اس کے باوجود تعمیراتی سرگرمیاں مسلسل جاری ہیں جبکہ انتظامیہ نے ایف ڈبلیو او کے تعمیراتی کام کی رفتار اور معیار پر مکمل اعتماد کا اظہار کیا ہے۔
