28/04/2025
ڪينالن جو معملو ھميشہ لاءِ ختم نہ ٿيو، گڏيل مفادن واري ڪائونسل جو اهم اجلاس: نون ڪئنالن جي تعمير تي گڏيل مفاهمت تائين روڪ، ان مقصد لاءِ هڪ ڪميٽي جوڙي ويندي، جيڪا اتفاق راءِ سان معاملن کي ٻيهر طئي ڪندي.
اسلام آباد (نيوز رپورٽ): گڏيل مفادن واري ڪائونسل (CCI) پنهنجي تازي اجلاس ۾ وفاقي حڪومت جي ان پاليسي جي حمايت ڪئي آهي ته بنا گڏيل مفاهمت جي نوان ڪئنال (واٽر چينل) نه ٺاهيا ويندا. وفاقي حڪومت فيصلو ڪيو آهي ته جيستائين صوبن وچ ۾ مڪمل اتفاق راءِ قائم نه ٿئي، تيستائين نون منصوبن تي اڳتي نه وڌيو ويندو.
اجلاس ۾ طئي ڪيو ويو ته زراعت جي پاليسي ۽ پاڪستان جي واٽر مئنيجمينٽ انفراسٽرڪچر جي ترقي لاءِ سڀني صوبائي حڪومتن سان رابطو ڪري هڪ ڊگهي مدي وارو متفقه روڊميپ تيار ڪيو ويندو. پاڻيءَ جي ورڇ واري معاهدي 1991 ۽ پاڻيءَ جي پاليسي 2018 تحت سڀني صوبن جا پاڻيءَ جا حق محفوظ آهن، جيڪي سڀني اسٽيڪ هولڊرن جي اتفاق سان طئي ٿيا آهن.
صوبن جي خدشن کي دور ڪرڻ ۽ ملڪ جي خوراڪ ۽ ماحولياتي تحفظ کي يقيني بڻائڻ لاءِ، هڪ ڪميٽي جوڙڻ جو فيصلو ڪيو ويو، جنهن ۾ وفاق ۽ سڀني صوبن جي نمائندگي شامل هوندي. اها ڪميٽي پاڪستان جي زرعي ضرورتن ۽ صوبن جي پاڻيءَ جي استعمال لاءِ تجويزون پيش ڪندي، جيڪي مٿين معاهدن جي روشني ۾ هونديون.
ڪائونسل پاڻيءَ جي اهميت تي زور ڏيندي چيو ته آئين ٺاهيندڙن ان جي اهميت کي تسليم ڪيو ۽ طئي ڪيو ته پاڻيءَ سان لاڳاپيل تڪرار گڏيل مفاهمت ذريعي خوش اسلوبي سان حل ڪيا ويندا. سڀني صوبن جي خدشن کي احتياط سان مخاطب ڪيو ويندو.
ان سلسلي ۾، ڪائونسل نون ڪئنالن جي تعمير لاءِ 7 فيبروري 2024 تي عارضي طور منظور ٿيل اي سي اين اي سي (ECNEC) جي منظوري ۽ 17 جنوري 2024 تي جاري ڪيل آءِ آر ايس اي (IRSA) جي پاڻيءَ جي دستيابي واري سرٽيفڪيٽ کي واپس ڪرڻ جو فيصلو ڪيو. منصوبه بندي ڊويزن ۽ آءِ آر ايس اي کي هدايت ڪئي وئي آهي ته سڀني اسٽيڪ هولڊرن سان مشاورت کي يقيني بڻائين ۽ قومي يڪجهتي جي مفاد ۾ گڏيل مفاهمت حاصل ڪئي وڃي.
