11/09/2026
وزیرِ داخلہ سید ضیاء الحسن لنجار نے واضح الفاظ میں کہا: ’’چھوٹا منشی، بڑا منشی، بالکل نہیں چلے ) کراچی میں وزیر داخلہ کا رات گئے مختلف تھانوں کا اچانک دورہ، پولیس افسران معطل
کراچی: وزیر داخلہ سندھ سید ضیاء الحسن لنجار نے میئر کراچی کے ہمراہ رات گئے شہر کے مختلف تھانوں کا اچانک دورہ کیا اور پولیس کی کارکردگی، حاضری اور تھانوں میں نظم و ضبط کا جائزہ لیا۔
وزیر داخلہ نے مختلف تھانوں میں اچانک سرچ آپریشن کے دوران پولیس افسران اور اہلکاروں کی ڈیوٹی چیک کی۔ غفلت اور فرائض میں کوتاہی پر بعض پولیس افسران کو معطل بھی کیا گیا۔
اس موقع پر وزیر داخلہ سید ضیاء الحسن لنجار نے پولیس افسران کو سختی سے ہدایت کرتے ہوئے کہا کہ "چھوٹا منشی، بڑا منشی بالکل نہیں چلے گا۔ پولیس کی وردی آپ کو دی گئی ہے، تھانے میں وردی پہن کر بیٹھیں اور اپنی ڈیوٹی انجام دیں۔"
وزیر داخلہ نے کہا کہ پولیس افسران اور اہلکار اپنی ذمہ داریاں پوری ایمانداری اور نظم و ضبط کے ساتھ ادا کریں۔ شہریوں کو بہتر پولیسنگ کی فراہمی حکومت کی ترجیح ہے اور فرائض میں غفلت کسی صورت برداشت نہیں کی جائے گی۔
انہوں نے واضح کیا کہ تھانوں کی نگرانی اور اچانک دوروں کا سلسلہ جاری رہے گا، جبکہ پولیس کے نظام میں بہتری اور شہریوں کے مسائل کے فوری حل کے لیے مزید اقدامات بھی کیے جائیں گے۔
