31/07/2025
خیبر پختونخوا کے گلیشیائی علاقوں میں ممکنہ خطرات، پی ڈی ایم اے کی وارننگ جاری
صوبائی ڈیزاسٹر مینجمنٹ اتھارٹی (پی ڈی ایم اے) نے خیبر پختونخوا کے مختلف اضلاع میں وقفے وقفے سے بارش کے پیش نظر گلیشیائی جھیلیں پھٹنے کے خطرے سے خبردار کر دیا ہے۔
پی ڈی ایم اے کے مطابق چترال اپر و لوئر، دیر، سوات اور کوہستان اپر کے علاقوں میں گلیشیائی جھیلیں پھٹنے کے واقعات کا خدشہ بڑھ گیا ہے۔ عوام کو ممکنہ خطرات سے خبردار رہنے اور احتیاطی تدابیر اختیار کرنے کی ہدایت کی گئی ہے۔
اتھارٹی نے ضلعی انتظامیہ کو حساس علاقوں کی مسلسل نگرانی، بروقت وارننگ سسٹم فعال رکھنے اور انخلاء کی مشقوں کو یقینی بنانے کی ہدایات جاری کی ہیں۔ ندی نالوں کے قریب غیر ضروری نقل و حرکت اور گاڑیوں کو تیز بہاؤ والے پانی سے گزارنے سے اجتناب برتنے کی بھی اپیل کی گئی ہے۔
پی ڈی ایم اے نے ممکنہ متاثرہ علاقوں میں انخلاء کے مقامات تیار کر لیے ہیں جبکہ ریسکیو سروسز اور ہنگامی امدادی ٹیموں کو الرٹ رہنے کی ہدایت دی گئی ہے۔ سیاحوں کو خاص طور پر محتاط رہنے اور موسمی حالات کے مطابق سفر کرنے کا مشورہ دیا گیا ہے۔
مزید برآں سڑکوں کی بروقت بحالی کے لیے نیشنل ہائی وے اتھارٹی ، فرنٹیئر ورکس آرگنائزیشن اور کمیونیکیشن اینڈ ورکس محکموں کو بھی پیشگی اقدامات کے لیے الرٹ کر دیا گیا ہے۔
پی ڈی ایم اے کی جانب سے عوامی سطح پر آگاہی مہم بھی شروع کر دی گئی ہے تاکہ ممکنہ نقصانات سے بچاؤ کے طریقوں سے عوام کو آگاہ کیا جا سکے۔ایمرجنسی کی صورت میں عوام پی ڈی ایم اے کے ایمرجنسی آپریشن سنٹر سے 1700 پر رابطہ کر کے معلومات اور مدد حاصل کر سکتے ہیں۔
