17/07/2026
میدان کولئی روڈ پر رٹیننگ وال کی تعمیر میں مبینہ ناقص میٹریل کا استعمال، شہریوں کی جانیں خطرے میں، انتظامیہ خاموش
کولئی پالس: ضلع کولئی پالس کے اہم سیاحتی راستے میدان کولئی روڈ پر زیرِ تعمیر رٹیننگ وال میں مبینہ طور پر ناقص میٹریل استعمال کیے جانے کے خلاف مقامی عوام نے شدید تحفظات کا اظہار کیا ہے۔ شہریوں کا کہنا ہے کہ تعمیراتی کام میں معیار کو نظر انداز کیا جا رہا ہے، جس سے نہ صرف سرکاری خزانے کو نقصان پہنچنے کا خدشہ ہے بلکہ روزانہ سفر کرنے والے ہزاروں افراد کی قیمتی جانیں بھی خطرے میں پڑ سکتی ہیں۔
مقامی افراد کے مطابق رٹیننگ وال کی تعمیر میں معیاری سیمنٹ، بجری اور دیگر تعمیراتی سامان کے بجائے کم معیار کا میٹریل استعمال کیا جا رہا ہے، جس کے باعث دیوار کی مضبوطی پر سنگین سوالات اٹھ رہے ہیں۔ عوام کا کہنا ہے کہ اگر یہی صورتحال برقرار رہی تو بارشوں یا لینڈ سلائیڈنگ کے دوران دیوار کسی بھی وقت گر سکتی ہے، جس سے بڑا جانی و مالی نقصان ہو سکتا ہے۔
شہریوں نے الزام عائد کیا ہے کہ متعلقہ ٹھیکیدار مبینہ طور پر تعمیراتی معیار پر سمجھوتہ کر کے عوام کی جانوں سے کھیل رہا ہے، جبکہ متعلقہ محکمے اور ضلعی انتظامیہ خاموش تماشائی بنی ہوئی ہے۔
علاقہ مکینوں نے حکومت خیبر پختونخوا، کمشنر ہزارہ، ڈپٹی کمشنر کولئی پالس اور متعلقہ تعمیراتی محکمے سے مطالبہ کیا ہے کہ منصوبے کا فوری تکنیکی معائنہ کرایا جائے، ناقص میٹریل کے استعمال کی شفاف تحقیقات کی جائیں، اور اگر بے ضابطگیاں ثابت ہوں تو ذمہ دار ٹھیکیدار اور متعلقہ اہلکاروں کے خلاف سخت قانونی کارروائی عمل میں لائی جائے تاکہ عوام کے جان و مال کا تحفظ یقینی بنایا جا سکے۔
Sardar Muhammad Riaz
Commissioner Hazara
DC Kolai Palas Kohistan
