02/02/2026
بَسَنْت: تہوار یا انسانی جانوں سے کھیل؟
تحریر: عرفان ڈار
پاکستان اس وقت تاریخ کے مشکل ترین معاشی حالات سے گزر رہا ہے۔ مہنگائی آسمان سے باتیں کر رہی ہے، بے روزگاری بڑھ رہی ہے، قرضوں کا بوجھ آنے والی نسلوں تک کو جکڑ چکا ہے۔ ایسے نازک وقت میں ترجیحات کیا ہونی چاہئیں؟ تعلیم، صحت، روزگار اور معیشت کی بحالی — یا پھر ایسے تہواروں کی ترویج جن کا نتیجہ خوشی سے زیادہ حادثات کی صورت میں نکلتا ہو؟
بَسَنْت کو ثقافتی رنگ دینے کی کوشش کی جاتی ہے، مگر حقیقت یہ ہے کہ ہمارے معاشرے میں یہ تہوار خوشیوں سے زیادہ قبروں کی تعداد بڑھانے کا سبب بنتا رہا ہے۔ ہر سال درجنوں نہیں بلکہ سینکڑوں گھر اجڑتے رہے ہیں۔ کسی کا گلا ڈور سے کٹ جاتا ہے، کوئی بجلی کی تاروں میں پھنس کر کرنٹ لگنے سے جان گنوا بیٹھتا ہے، کوئی چھت سے گر کر عمر بھر کے لیے معذور ہو جاتا ہے یا موت کی آغوش میں چلا جاتا ہے۔ کیا یہ خوشی ہے؟ یا ایک اجتماعی بے حسی؟
ہم ایک اسلامی جمہوریہ ہیں، جہاں ریاست کا فرض ہے کہ شہریوں کی جان و مال کا تحفظ کرے۔ جب ایک سرگرمی مسلسل انسانی جانوں کے ضیاع کا سبب بنے، تو اسے روکنا دانشمندی ہوتی ہے، نہ کہ اسے دوبارہ فروغ دینا۔ پہلے بھی بَسَنْت پر پابندی کوئی شوق میں نہیں لگائی گئی تھی، بلکہ انسانی جانوں کے تحفظ کے لیے لگائی گئی تھی۔ سوال یہ ہے کہ اب اچانک اسے دوبارہ زندہ کرنے کی ضرورت کیوں محسوس ہو رہی ہے؟
کچھ لوگ اسے ثقافت کا نام دیتے ہیں، مگر ثقافت وہ ہوتی ہے جو زندگی کو خوبصورت بنائے، نہ کہ جنازوں میں اضافہ کرے۔ کیا ہم نے کبھی سوچا کہ جن گھروں کے چراغ بجھتے ہیں، ان کے لیے بَسَنْت کی رنگینیاں کیسی لگتی ہوں گی؟ ان ماؤں سے پوچھیں جن کے بیٹے صرف ایک ڈور کی وجہ سے ہمیشہ کے لیے خاموش ہو گئے۔ ان بچوں سے پوچھیں جن کے باپ ایک لمحے کی تفریح کی قیمت اپنی جان سے ادا کر گئے۔
ایک اور پہلو بھی نظر انداز نہیں کیا جا سکتا۔ جب ملک پہلے ہی قرضوں میں ڈوبا ہو، تو ریاستی سطح پر ایسے ایونٹس کی سرپرستی مزید اخراجات کا باعث بنتی ہے۔ سیکیورٹی، انتظامات، ہسپتالوں کی ایمرجنسی تیاری، ٹریفک کنٹرول — یہ سب عوام کے ٹیکس کے پیسوں سے ہوتا ہے۔ کیا یہ وسائل کسی زیادہ ضروری شعبے پر خرچ نہیں ہونے چاہئیں؟
سب سے تشویشناک بات یہ ہے کہ بعض اوقات ایسے فیصلے عوامی فلاح سے زیادہ کسی اور ایجنڈے کا حصہ محسوس ہوتے ہیں۔ اصل مقصد کیا ہے، یہ تو اللہ ہی بہتر جانتا ہے، مگر عام آدمی کے لیے اس کا نتیجہ صرف خطرہ، نقصان اور غم کی صورت میں نکلتا ہے۔
خوشی منانا منع نہیں، مگر ایسی خوشی جو دوسروں کے لیے موت کا پیغام بن جائے، اس پر ضرور سوال اٹھنا چاہیے۔ زندہ قومیں وہی ہوتی ہیں جو جذبات سے نہیں، عقل اور ذمہ داری سے فیصلے کرتی ہیں۔
آج ضرورت اس بات کی ہے کہ ہم بحیثیت قوم یہ طے کریں کہ ہمیں وقتی رنگینیاں چاہئیں یا محفوظ مستقبل۔ آسمان پر اڑتی پتنگیں چند گھنٹوں کی خوشی تو دے سکتی ہیں، مگر زمین پر گرتی لاشیں نسلوں تک دکھ چھوڑ جاتی ہیں۔
