13/03/2026
پاکستان میں فائیو جی اسپیکٹرم کی نیلامی مکمل
پاکستان میں فائیو جی اسپیکٹرم کی نیلامی کا عمل طویل انتظار کے بعد مکمل ہوگیا ہے، جس سے قومی خزانے کو 507 ملین ڈالر (142 ارب روپے) حاصل ہوئے۔ نیلامی میں 597 میگا ہرٹز کے ہدف کے مقابلے میں 480 میگا ہرٹز اسپیکٹرم فروخت کیا گیا۔
نیلامی کا عمل تین مراحل میں مکمل ہوا جس میں تین ٹیلی کام آپریٹرز زونگ، جاز اور یوفون نے نیکسٹ جنریشن موبائل سروسز اور ملک میں تیز رفتار ڈیجیٹل کنیکٹیویٹی کے لیے اسپیکٹرم حاصل کیا۔
منگل کی صبح وفاقی وزیر آئی ٹی شزا فاطمہ خواجہ، وفاقی وزیر خزانہ محمد اورنگزیب اور وفاقی وزیر اطلاعات و نشریات عطا تارڑ نے فائیو جی اسپیکٹرم نیلامی کے عمل کا باقاعدہ افتتاح کیا۔
اس موقع پر چیئرمین پاکستان ٹیلی کمیونیکیشن اتھارٹی میجر جنرل (ر) حفیظ الرحمان اور قومی اسمبلی کی قائمہ کمیٹی کے چیئرمین سید امین الحق بھی موجود تھے۔
وفاقی وزیر آئی ٹی شزا فاطمہ خواجہ کا کہنا تھا کہ فائیو جی ٹیکنالوجی سے انٹرنیٹ کی رفتار میں نمایاں بہتری آئے گی۔ وفاقی وزیر اطلاعات عطا تارڑ کے مطابق اس سے ڈیجیٹل کنیکٹیویٹی میں انقلاب آئے گا جبکہ وزیر خزانہ محمد اورنگزیب نے کہا کہ اس اقدام سے آئی ٹی برآمدات میں اضافہ ہوگا۔ چیئرمین پی ٹی اے نے اسے پاکستان کے لیے ایک تاریخی دن اور ڈیجیٹل تبدیلی کی جانب اہم پیش رفت قرار دیا۔
