19/05/2026
ضلع چنیوٹ میں شدید گرمی کے دوران اسکول میں بچوں کو پنکھے بند کر کے پڑھانے کے معاملے پر وائرل ویڈیو کے بعد سخت کارروائی عمل میں لائی گئی ہے۔ ڈسٹرکٹ ایجوکیشن آفیسر کی مدعیت میں مقدمہ درج کر لیا گیا۔
ایف آئی آر کے مطابق گورنمنٹ گرلز پرائمری اسکول چک نمبر 131 ج ب میں اسکول انتظامیہ نے کم سن بچوں کو شدید گرمی اور حبس میں رکھا ہوا تھا جبکہ کلاس رومز کے تمام پنکھے بند تھے۔ درخواست میں مؤقف اختیار کیا گیا کہ جب متعلقہ افسر نے اسکول کا دورہ کیا تو بچے کمروں سے باہر دھوپ میں بیٹھے ہوئے تھے اور شدید گرمی سے پریشان دکھائی دے رہے تھے۔
ایف آئی آر میں کہا گیا ہے کہ اسکول میں بچوں کے لیے مناسب پینے کے پانی کا انتظام بھی موجود نہیں تھا جس کے باعث بچے گھبراہٹ، جسمانی تکلیف اور ذہنی اذیت کا شکار ہوئے جبکہ ان کی جان کو بھی خطرہ لاحق ہو سکتا تھا۔
درخواست کے مطابق اسکول انتظامیہ کا طرز عمل غیر انسانی، غیر قانونی اور چائلڈ پروٹیکشن ایکٹ کے بنیادی حقوق کے خلاف ہے۔ مزید کہا گیا کہ یہ اقدام حکومت اور پی ای ایف کے معاہدے کی خلاف ورزی بھی ہے۔
پولیس نے واقعے کا مقدمہ درج کر کے قانونی کارروائی شروع کر دی ہے۔
