26/08/2026
بریگیڈیئر حیدر علی کی شہید سپاہی عبدالرازق کی قبر پر حاضری، مستحق خاندانوں میں راشن اور مٹھائی تقسیم
لکی مروت :کمانڈر 55 بریگیڈ بریگیڈیئر حیدر علی نےاعضرخیل میں شہید سپاہی عبدالرازق کی قبر پر حاضری دی۔ شہید عبدالرازق 77W ایف سی بٹالین (نارتھ) میں اپنے فرائض سرانجام دے رہے تھے۔ اس موقع پر بریگیڈیئر حیدر علی نے شہید کی قبر پر پھولوں کی چادر چڑھائی اور ان کی لازوال قربانی کو خراجِ عقیدت پیش کیا۔ بعد ازاں شہید کے درجات کی بلندی اور ملک و قوم کے امن و سلامتی کے لیے خصوصی دعا بھی کی گئی۔
عید میلاد النبی ﷺ کی بابرکت مناسبت سے عذار خیل، تاجزئی اور غزنی خیل کے علاقوں میں مقامی آبادی بالخصوص مستحق خاندانوں میں راشن اور مٹھائی تقسیم کی گئی۔ اس فلاحی اقدام کا مقصد عید کی خوشیوں میں عوام کو شریک کرنا اور سیکیورٹی فورسز کی جانب سے عوامی خدمت اور فلاح و بہبود کے عزم کو عملی شکل دینا تھا۔
اس موقع پر بریگیڈیئر حیدر علی نے مقامی عمائدین، معززین اور عوام سے ملاقاتیں بھی کیں اور علاقائی صورتحال پر تبادلہ خیال کیا۔ انہوں نے عوام کو یقین دلایا کہ سیکیورٹی فورسز امن و استحکام کے قیام، عوام کے تحفظ اور علاقائی ترقی کے لیے اپنا کردار جاری رکھیں گی۔
مقامی عمائدین اور عوام نے سیکیورٹی فورسز کی جانب سے عید میلاد النبی ﷺ کے موقع پر کیے گئے اس خیرسگالی اور فلاحی اقدام کو سراہتے ہوئے دلی تشکر کا اظہار کیا۔ انہوں نے شہداء کی قربانیوں کو خراجِ تحسین پیش کرتے ہوئے علاقے میں پائیدار امن کے قیام کے لیے سیکیورٹی فورسز کے ساتھ مکمل تعاون کے عزم کا اعادہ بھی کیا۔
عوامی حلقوں کے مطابق یہ سرگرمی سیکیورٹی فورسز اور مقامی آبادی کے درمیان باہمی اعتماد، اخوت، خیرسگالی اور سول ملٹری ہم آہنگی کے فروغ کی جانب ایک مثبت اقدام ہے، جو دونوں کے درمیان مضبوط تعلقات کی عکاسی کرتا ہے۔
