Lakki Times

15/03/2026

لکی مروت

03/03/2026

لکی مروت
رپورٹ عبدالسلام مروت
تحصیل سرائے نورنگ کے علاقے کوٹکہ محمد خان کنڈی میں پینے کے پانی کا سرکاری ٹیوب ویل گزشتہ دو ہفتوں سے خراب ہے، جس کے باعث مقامی آبادی کو شدید مشکلات کا سامنا ہے۔ رمضان المبارک میں صورتحال مزید سنگین ہو گئی ہے اور افطاری کے وقت صاف پانی دستیاب نہ ہونے سے روزہ دار پریشان ہیں۔اہل علاقہ کا کہنا ہے کہ بجلی کی بندش اور ٹیوب ویل کی خرابی کے باعث گھروں میں پانی نہیں پہنچ رہا، لوگ دور دراز سے پانی لانے پر مجبور ہیں۔ شہریوں نے ٹی ایم او کرامت اللہ خان سرائے نورنگ سے فوری نوٹس لے کر ٹیوب ویل کی مرمت اور افطاری و سحری کے اوقات میں پانی کی فراہمی یقینی بنانے کا مطالبہ کیا ہے۔

14/02/2026

لکی مروت:
درہ تنگ کے مقام پر سڑک بند ہونے کے باعث مسافر گاڑیوں اور عام شہریوں کو شدید مشکلات کا سامنا کرنا پڑا۔ ٹریفک معطل ہونے سے لوگ مجبورا متبادل راستوں کا رخ کرنے پر مجبور ہو گئے، جو نہ صرف طویل بلکہ انتہائی دشوار بھی ہیں۔
مسافروں کا کہنا ہے کہ یہ راستے سفر کے لیے موزوں نہیں، مگر مجبوری کے تحت انہیں یہی کٹھن راستے اختیار کرنا پڑ رہے ہیں۔ شہریوں نے متعلقہ حکام سے مطالبہ کیا ہے کہ صورتحال کا فوری نوٹس لے کر سڑک کو جلد از جلد بحال کیا جائے تاکہ عوام کو مزید پریشانی کا سامنا نہ کرنا پڑے۔

14/02/2026

لکی مروت پاکستان تحریک انصاف پارٹی کے جنرل سیکرٹری عید نواز نے پارٹی کارکنان کے ہمراہ خیبرپختونخوا کو پنجاب سے ملانے والی مرکزی شاہراہ کو درہ تنگ کے مقام پر ہر قسم کی ٹریفک کے لیے بند کر دیا۔سڑک کی بندش کے باعث مسافروں، ٹرانسپورٹرز اور مال بردار گاڑیوں کو شدید مشکلات کا سامنا ہے۔ دونوں صوبوں کے درمیان آمدورفت مکمل طور پر معطل ہو گئی ہے جس سے روزمرہ سفر کرنے والے افراد خاص طور پر متاثر ہو رہے ہیں۔
مزید تفصیلات اور تازہ اپڈیٹس کے لیے دیکھتے رہیے لکی ٹائمز نیوز ۔

10/02/2026

جامعہ لکی مروت اور سرحد چیمبر آف کامرس کے درمیان مفاہمتی یادداشت پر دستخط
یونیورسٹی آف لکی مروت کے وائس چانسلر پروفیسر ڈاکٹر اورنگزیب خان اور سرحد چیمبر آف کامرس اینڈ انڈسٹری کے سینئر نائب صدر محمد ندیم نے باہمی تعلیمی، تحقیقی اور صنعتی تعاون کے فروغ کے لیے مفاہمتی یادداشت پر دستخط کیے۔ اس شراکت داری سے طلبہ کو تحقیق، جدت اور عملی مہارتوں کے نئے مواقع میسر آئیں گے۔

10/02/2026

خیبرپختونخوا
رمضان المبارک کے دوران منگل اور بدھ کے روز گوشت (بڑا اور چھوٹا) کی فروخت پر کوئی ناغہ نہیں ہوگا۔
فوڈ ڈیپارٹمنٹ خیبرپختونخوا

08/02/2026

07/02/2026

🔴 بڑی بریکنگ نیوز 🔴
لکی مروت
سرائے نورنگ: آل شاپ کیپر یونین کے صدر حاجی امان اللہ کا 8 فروری کو ہڑتال نہ کرنے کا اعلان، کل بروز اتوار سرائے نورنگ میں تمام کاروباری مراکز کھلے رہیں گے۔ یونین صدر حاجی امان اللہ

01/01/2026

اسلام آباد
وفاقی حکومت نے پیٹرولیم مصنوعات کی قیمتوں میں کمی کر دی۔
پیٹرول 10 روپے 28 پیسے سستا ہو کر 253 روپے 17 پیسے فی لیٹر ہو گیا،
جبکہ ڈیزل 8 روپے 57 پیسے کمی کے بعد 257 روپے 08 پیسے فی لیٹر مقرر۔
نوٹیفکیشن جاری

25/12/2025

لکی مروت
تعلیم، تحقیق اور ترقی کے سفر میں ایک نیا سنگِ میل عبور کرتے ہوئے جامعہ لکی مروت، جامعہ بنوں، کلام بی بی انٹرنیشنل ویمن یونیورسٹی، رفاہ انٹرنیشنل یونیورسٹی اسلام آباد اور ہائر ایجوکیشن کمیشن اسلام آباد کے اشتراک سے دوروزہ بین الاقوامی تعلیمی و تحقیقی کانفرنس کا انعقاد کیا گیا، جس نے ملکی اور عالمی سطح پر علمی دنیا کی توجہ حاصل کی۔کانفرنس کا مقصد جنوبی خیبرپختونخوا کی جامعات کو تحقیق، اعلیٰ تعلیم اور عالمی اداروں کے ساتھ روابط کے میدان میں مستحکم بنانا تھا۔ وائس چانسلر یونیورسٹی آف لکی مروت پروفیسر ڈاکٹر اورنگزیب خان اس عظیم الشان کانفرنس کے چیف آرگنائزر اور روحِ رواں تھے۔ دیگر نمایاں شخصیات میں پروفیسر ڈاکٹر جہانزیب (وائس چانسلر جامعہ بنوں)،وائس چانسلر ڈاکٹر انس احمد (رفاہ یونیورسٹی)،وائس چانسلر ڈاکٹر صادق (یو ای ٹی)،وائس چانسلر ڈاکٹر طاہر خلیلی (کرک یونیورسٹی)،وائس چانسلر ڈاکٹر اکرم اللہ (ہزارہ یونیورسٹی)، ڈاکٹر نجیب اللہ (ممبر پلاننگ کمیشن)، سینئر ڈین پروفیسر ڈاکٹر خیر اللہ، ڈاکٹر ناصر گل، ڈاکٹر احسان ربی، ڈاکٹر صدیق داوڑ، ڈاکٹر وہاب صادق (سیکرٹری کانفرنس)، ڈاکٹر منصور اور ڈاکٹر رفیق خان شامل تھے اس بین الاقوامی کانفرنس میں نہ صرف پاکستان کے مختلف جامعات کے پروفیسرز اور ریسرچ اسکالرز نے شرکت کی، بلکہ دنیا کے مختلف ممالک سے محققین اور مندوبین نے آن لائن شرکت کی۔ ملٹی میڈیا یونیورسٹی ملائشیا کے وائس چانسلر نے اپنے آن لائن خطاب میں جنوبی خیبرپختونخوا کے تعلیمی اداروں کو سراہتے ہوئے کہا کہ یہاں ٹیلنٹ کی کمی نہیں بلکہ سہولیات اور عالمی روابط کی ضرورت ہے۔مقررین نے اپنے خطاب میں کہا کہ جنوبی ریجن کے تعلیمی ادارے دہائیوں سے دہشتگردی، بدامنی اور معاشی پسماندگی کا شکار رہے ہیں، مگر اس کے باوجود یہاں کے نوجوانوں میں علمی جذبہ اور تحقیق کا شوق موجود ہے۔ ہماری کوشش ہے کہ یہاں کے جامعات کو عالمی سطح پر متعارف کرایا جائے تاکہ طلباء کو جدید تحقیق اور تعلیمی ترقی کے مواقع حاصل ہوں۔ڈاکٹر جہانزیب نے کہا کہ جامعہ بنوں اور دیگر جامعات کی شمولیت سے یہ کانفرنس ایک تاریخی حیثیت اختیار کرگئی ہے، جو مستقبل میں ریسرچ کے نئے دروازے کھولے گی۔کانفرنس میں جنوبی اضلاع کے وفود، فیکلٹی ممبران، ریسرچ اسکالرز، طلباء و طالبات کی بھرپور شرکت دیکھنے میں آئی۔ مختلف تحقیقی مقالہ جات پیش کیے گئے، جن میں تعلیم، سماجیات، ٹیکنالوجی، صحت اور معیشت جیسے اہم موضوعات شامل تھے۔اس بین الاقوامی کانفرنس نے یہ ثابت کیا کہ خیبرپختونخوا خصوصاً جنوبی اضلاع میں تعلیم کا مستقبل تابناک ہے، اگر انہیں مناسب رہنمائی، وسائل اور عالمی اداروں سے اشتراک حاصل ہو۔ منتظمین نے اعلان کیا کہ یہ سلسلہ اب سالانہ بنیادوں پر جاری رہے گا تاکہ خطے کی جامعات کو دنیا کے نقشے پر نمایاں مقام دیا جا سکے۔
۔۔۔۔۔۔۔۔۔۔۔
بین الاقوامی تعلیمی و تحقیقی کانفرنس کے دوسرے روز کے سیشن کے مہمان خصوصی سیکرٹری ہائر ایجوکیشن ڈپارٹمنٹ خیبرپختونخوا ڈاکٹر اسرار خان تھے، جنہوں نے کانفرنس سے خصوصی خطاب کرتے ہوئے خیبرپختونخوا میں اعلیٰ تعلیم، تحقیق اور جامعات کی بین الاقوامی سطح پر شمولیت کے حوالے سے حکومت کے وژن اور اقدامات پر روشنی ڈالی۔انہوں نے کہا کہ جنوبی خیبرپختونخوا کے جامعات نے مشکل حالات کے باوجود جس طرح علمی میدان میں خود کو منوایا ہے، وہ قابلِ تحسین ہے۔ ڈاکٹر اسرار خان نے کہا کہ ہائر ایجوکیشن ڈپارٹمنٹ کا مقصد صوبے بھر میں تحقیق، انوویشن اور علمی ترقی کو فروغ دینا ہے، اور اس طرح کی کانفرنسز تحقیقاتی تعاون اور جامعات کے عالمی اداروں سے روابط کو مضبوط کرنے کا بہترین ذریعہ ہیں انہوں نے کانفرنس کے انعقاد کو ایک تاریخی کامیابی قرار دیتے ہوئے کہا کہ ایسے علمی اجتماعات نہ صرف طلبہ اور فیکلٹی کے لیے علمی مواقع فراہم کرتے ہیں بلکہ دنیا بھر میں خیبرپختونخوا کی مثبت تعلیمی تصویر بھی اجاگر کرتے ہیں۔ڈاکٹر اسرار خان نے یقین دہانی کرائی کہ محکمہ اعلیٰ تعلیم جنوبی اضلاع کی جامعات کی بھرپور سرپرستی جاری رکھے گا، تاکہ یہاں کے باصلاحیت نوجوانوں کو معیاری تعلیم اور تحقیق کے مواقع میسر آئیں۔آخر میں انہوں نے کانفرنس کے منتظمین، وائس چانسلرز، اساتذہ اور ریسرچرز کو مبارکباد پیش کرتے ہوئے کہا کہ اس تعلیمی سرگرمی نے خیبرپختونخوا کی علمی سمت کا تعین کر دیا ہے، اور یہ تسلسل آگے بھی جاری رہنا چاہیے۔
۔۔۔۔۔۔۔۔۔۔۔۔
جامعہ لکی مروت اور کلام بی بی انٹرنیشنل ویمن انسٹیٹیوٹ کے وائس چانسلر اور انٹرنیشنل کانفرنس کے چیف آرگنائزر پروفیسر ڈاکٹر اورنگزیب خان نے کہا ہے کہ یہ دور مصنوعی ذہانت (AI) اور ڈیٹا سائنس کا دور ہے، اور دنیا کے بدلتے ہوئے تقاضوں کا مؤثر مقابلہ صرف اعلی تحقیق اور جدید تعلیمی حکمتِ عملی سے ممکن ہے۔انہوں نے دو روزہ بین الاقوامی کانفرنس کے دوران میڈیا سے گفتگو کرتے ہوئے کہا کہ جنوبی خیبرپختونخوا کے جامعات کی مشترکہ میزبانی میں یہ بین الاقوامی تعلیمی کانفرنس ایک تاریخی سنگِ میل ہے جو اس خطے کی اعلیٰ تعلیم کے روشن مستقبل کی نوید ہے۔ڈاکٹر اورنگزیب خان نے کہا کہ اس کانفرنس میں دنیا بھر کے ریسرچرز، ماہرینِ تعلیم، اسکالرز اور یونیورسٹی قائدین کی شرکت نے ثابت کر دیا کہ جنوبی اضلاع میں علمی و تحقیقی استعداد موجود ہے، بس ضرورت اس کو نکھارنے اور عالمی معیار سے ہم آہنگ کرنے کی ہے۔انہوں نے اس بات پر زور دیا کہ طلباء و طالبات کو چاہیے کہ وہ مصنوعی ذہانت، ڈیجیٹل ٹیکنالوجی اور ڈیٹا سائنس جیسے میدانوں میں آگے آئیں، کیونکہ مستقبل انہی شعبوں کا ہے۔ انہوں نے مزید کہا کہ خیبرپختونخوا کے پسماندہ علاقوں میں بھی عالمی معیار کی تحقیق کو فروغ دینے کے لیے محکمہ ہائر ایجوکیشن کے تعاون سے مزید اقدامات اٹھائے جائیں گے۔ان کا کہنا تھا کہ ایسی کانفرنسز نہ صرف جامعات کے مابین روابط کو مضبوط کرتی ہیں بلکہ طلبہ کو عالمی سطح پر تحقیق کے مواقع فراہم کرنے کا ذریعہ بھی بنتی ہیں۔ کانفرنس کے انعقاد پر تمام شریک جامعات اور منتظمین کو سراہتے ہوئے انہوں نے اسے جنوبی ریجن کے طلبہ کے لیے ایک انقلابی قدم قرار دیا۔

24/12/2025

بنوں میں پولیس کی دہشت گردوں کے خلاف مؤثر کارروائیاں
ضلع بنوں میں پولیس نے فتنہ الخوارج اور دیگر دہشت گرد عناصر کے خلاف بھرپور اور نتیجہ خیز آپریشنز کیے ہیں۔ رواں سال 134 دہشت گرد حملوں میں 27 پولیس اہلکار شہید اور 79 زخمی ہوئے، تاہم جوابی کارروائیوں میں 53 دہشت گرد ہلاک اور 163 زخمی ہوئے۔
پولیس نے 168 انٹیلی جنس بیسڈ آپریشنز کیے، جن میں 105 دہشت گرد گرفتار اور 65 ہلاک ہوئے۔ میریان، ڈومیل، برگنتو اور دیگر علاقوں میں مشترکہ آپریشنز کے دوران 22 دہشت گرد ہلاک اور 4 گرفتار ہوئے۔ 18 جولائی 2025 کو اینٹی ڈرون سسٹم کی تنصیب کے بعد 300 سے زائد ڈرون حملے ناکام بنائے گئے۔
پولیس تنصیبات کے تحفظ کے لیے HESCO بیریئرز، بنکرز، بلٹ پروف گیٹس اور CCTV نصب کیے گئے جبکہ سیف سٹی منصوبے پر بھی کام شروع ہو گیا ہے۔ جدید آلات اور تربیت یافتہ اہلکاروں کے ساتھ بنوں پولیس عوام کے جان و مال کے تحفظ اور ضلع میں امن و امان قائم رکھنے کے عزم کا اعادہ کرتی ہے۔