10/09/2026
آر آئی این نیوز
حق سچ کی آواز
ایبٹ آباد: طلبہ گروپوں میں تصادم کے بعد ایوب میڈیکل کالج غیر معینہ مدت کے لیے بند، ہاسٹلز خالی کرنے کا حکم
ایبٹ آباد (بیورو رپورٹ) — ایبٹ آباد کے مؤقر تعلیمی ادارے ایوب میڈیکل کالج میں طلبہ کے مختلف گروپس کے درمیان شدید تصادم اور لڑائی کے بعد امن و امان کی بگڑتی ہوئی صورتحال کے پیش نظر انتظامیہ نے کالج کو فوری طور پر بند کرنے کا اعلان کر دیا ہے۔
ذرائع کے مطابق تصادم کے فورا بعد پولیس کی بھاری نفری نے موقع پر پہنچ کر صورتحال پر قابو پایا اور رات گئے کالج کا کنٹرول مکمل طور پر اپنے ہاتھوں میں لے لیا ہے۔ امن و امان کی فضا بحال رکھنے اور مزید کشیدگی کو روکنے کے لیے کالج انتظامیہ کی جانب سے ہاسٹلز کو فوری طور پر خالی کرنے کے احکامات جاری کر دیے گئے ہیں، جن پر عمل درآمد شروع کر دیا گیا ہے۔
پولیس حکام کا کہنا ہے کہ تصادم میں ملوث اور کالج کا امن خراب کرنے والے شرپسند عناصر کی شناخت کا عمل جاری ہے اور ان کی گرفتاری کے لیے چھاپے مارے جا رہے ہیں۔ کالج کی بندش کا باضابطہ نوٹیفکیشن بھی جاری کر دیا گیا ہے جبکہ حالات مکمل طور پر تسلی بخش ہونے تک ادارے میں داخلے پر پابندی ہوگی۔
