25/08/2026
ہری پور کی کمسن آیت نور کے ساتھ پیش آنے والے دلخراش سانحے پر دلی رنج و افسوس اور شدید مذمت کا اظہار کرتا ہوں۔ اس افسوسناک واقعے کے حوالے سے پولیس کی جانب سے اب تک کی جانے والی بھرپور کوششوں کا میں نے اسمبلی فلور پر بھی ذکر کیا ہے۔
تاہم اب جبکہ یہ ایک انتہائی المناک سانحہ بن چکا ہے، ریاست اور تمام متعلقہ اداروں کی ذمہ داری مزید بڑھ گئی ہے۔ ان شاء اللہ، اس واقعے میں ملوث سفاک ملزمان کو قانون کے کٹہرے میں لا کر کیفرِ کردار تک پہنچانے میں کسی قسم کی غفلت یا کوتاہی برداشت نہیں کی جائے گی۔
ملزمان کو ایسی عبرتناک سزا دلائی جائے کہ آئندہ کوئی درندہ ہماری بیٹیوں، ماؤں اور بہنوں کی عزت و جان کو نقصان پہنچانے کا سوچتے ہوئے بھی لرز اٹھے۔
خیبرپختونخوا اسمبلی مستقبل میں ایسے دلخراش واقعات کی روک تھام اور خواتین و بچوں کے تحفظ کو یقینی بنانے کے لیے موجودہ وقت کے تقاضوں کے مطابق مؤثر قانون سازی بھی کرے گی۔ ایسے سانحات کے تدارک اور معاشرے کو محفوظ بنانے کے لیے ہم سب اپنے حصے کا کردار ادا کریں گے۔
اللہ تعالیٰ آیت نور کے غمزدہ والدین اور اہلِ ہری پور کو صبرِ جمیل عطا فرمائے اور مرحومہ کو جوارِ رحمت میں اعلیٰ مقام نصیب فرمائے۔ آمین۔
