01/10/2025
Office of the Press Secretary to Mr Speaker KP Assembly
پشاور: () اسپیکر خیبرپختونخوا اسمبلی بابر سلیم سواتی کے استعفیٰ سے متعلق سوشل میڈیا پر پھیلائی جانے والی خبریں جھوٹ کا پلندہ اور افواہ سازی کی بدترین مثال ہیں۔ ان میں ذرا برابر بھی حقیقت نہیں۔
ترجمان اسپیکر نے دوٹوک الفاظ میں کہا کہ یہ پروپیگنڈا کرنے والے دراصل وہی کمزور اور مایوس عناصر ہیں جو پارٹی کے اندر بیٹھ کر قیادت کو نقصان پہنچانے کی ناکام کوشش کر رہے ہیں۔ ایسے لوگ نہ تو قیادت کے فیصلوں پر اثرانداز ہو سکتے ہیں اور نہ ہی اسپیکر کے عزم و وفا کو متزلزل کر سکتے ہیں۔
ترجمان نے کہا کہ اسپیکر بابر سلیم سواتی اپنی قیادت اور چیئرمین عمران خان کے ساتھ چٹان کی طرح ڈٹے ہوئے ہیں۔
انہوں نے مزید کہا کہ اسپیکر بابر سلیم سواتی نے واضح کیا ہے کہ اگر کبھی استعفیٰ دینے کا فیصلہ ہوا بھی تو وہ کسی سازشی ٹولے یا مخالفین کے دباؤ پر نہیں بلکہ صرف اور صرف عمران خان کے حکم اور ہدایت پر ہوگا۔ پارٹی ڈسپلن، قیادت پر اعتماد اور عمران خان کی ہدایت ہی اسپیکر کے فیصلوں کی بنیاد ہیں۔
