07/09/2026
کاٹلنگ: خان جی تھیلیسیمیا سنٹر کا کاٹلنگ میڈیکل اینڈ سرجیکل ہسپتال میں باقاعدہ افتتاح
کاٹلنگ میڈیکل اینڈ سرجیکل ہسپتال میں خان جی تھیلیسیمیا سنٹر کا باقاعدہ افتتاح کر دیا گیا۔ افتتاحی تقریب میں ایم پی اے و ڈیڈک چیئرمین زرشاد خان، غزالی سکول کے ایم ڈی تاج ملوک، تحصیل خطیب مفتی فضل اللہ، حاجی خانفراز خان ۔پرنسپل ہائی سکول کاٹلنگ۔خیر خیگڑی تنظیم ۔عزم مومن ارگناٸزیشن سمیت تھیلیسیمیا سے متاثرہ بچوں، ان کے والدین اور دیگر معززین نے شرکت کی۔اس موقع پر مہمانانِ خصوصی نے کہا کہ تھیلیسیمیا ایک سنگین اور موروثی بیماری ہے، جس کے شکار بچوں کو باقاعدگی سے خون کی ضرورت ہوتی ہے۔ ایسے بچوں اور ان کے والدین کے لیے ان کے اپنے علاقے میں تھیلیسیمیا سنٹر کا قیام ایک اہم اور قابلِ تحسین اقدام ہے۔مقررین نے کہا کہ تھیلیسیمیا کے مریض بچوں کو بروقت اور معیاری طبی سہولیات، محفوظ خون اور مناسب علاج کی فراہمی انتہائی ضروری ہے۔ خان جی تھیلیسیمیا سنٹر کا قیام کاٹلنگ اور ملحقہ علاقوں کے مریض بچوں کے لیے ایک بڑی سہولت ثابت ہوگا اور انہیں علاج کے لیے دور دراز علاقوں کا سفر نہیں کرنا پڑے گا۔انہوں نے کہا کہ تھیلیسیمیا کے خلاف آگاہی پھیلانے کے ساتھ ساتھ شادی سے قبل تھیلیسیمیا اسکریننگ کو بھی فروغ دینا چاہیے تاکہ مستقبل میں اس بیماری کے پھیلاؤ کو کم کیا جا سکے۔تقریب کے اختتام پر تھیلیسیمیا سے متاثرہ بچوں اور ان کے والدین نے سنٹر کے قیام پر خوشی کا اظہار کرتے ہوئے منتظمین اور تعاون کرنے والے تمام افراد کا شکریہ ادا کیا۔
