24/06/2026
*ملتان: مسافر بس میں تیزاب کی بوتلیں پھٹنے سے خوف و ہراس، تین مسافر متاثر، ریسکیو 1122 کی بروقت کارروائی سے بڑا حادثہ ٹل گیا*
ملتان کے علاقے چائنہ چوک، مظفرگڑھ روڈ پر ملتان سے مظفرگڑھ جانے والی نیو خان نان اے سی مسافر بس میں موجود تیزاب کی بوتلیں اچانک پھٹنے سے بس دھوئیں سے بھر گئی، جس کے باعث مسافروں میں شدید خوف و ہراس پھیل گیا۔
اطلاع ملتے ہی ریسکیو 1122 کی فائر ریسکیو اور ایمبولینس ٹیمیں فوری طور پر موقع پر پہنچ گئیں اور پیشہ ورانہ مہارت کا مظاہرہ کرتے ہوئے ڈرائی کیمیکل پاؤڈر (ڈی سی پی) کے ذریعے دھوئیں پر قابو پا لیا۔ چند ہی منٹوں میں صورتحال کو مکمل طور پر کنٹرول کر لیا گیا۔
ریسکیو حکام کے مطابق واقعے میں تین مسافر متاثر ہوئے، جن میں دو خواتین دھوئیں کے باعث سانس لینے میں دشواری کا شکار ہوئیں جبکہ ایک مرد معمولی خراشوں سے متاثر ہوا۔ تمام متاثرین کو موقع پر ہی ابتدائی طبی امداد فراہم کی گئی، جس کے بعد بس کو محفوظ قرار دے کر دوبارہ اپنی منزل کی جانب روانہ کر دیا گیا۔
ریسکیو ذرائع کے مطابق خوش قسمتی سے واقعے میں آگ نہیں بھڑکی اور نہ ہی کوئی بڑا جانی یا مالی نقصان ہوا، تاہم معمولی سی غفلت ایک بڑے سانحے کا سبب بن سکتی تھی۔
ریسکیو 1122 نے شہریوں سے اپیل کی ہے کہ مسافر بسوں، ویگنوں اور دیگر پبلک ٹرانسپورٹ میں تیزاب، پٹرول، ڈیزل، گیس سلنڈر، آتش گیر، زہریلے یا دیگر خطرناک کیمیکلز ہرگز ساتھ لے کر سفر نہ کریں۔ ایسے مواد کو صرف محفوظ پیکنگ اور متعلقہ قوانین کے مطابق مجاز کارگو سروس کے ذریعے منتقل کیا جائے تاکہ انسانی جانوں کو خطرات سے محفوظ رکھا جا سکے۔
