07/09/2024
چھترارو فریاد
تحریر: عنایت جلیل قاضی
کرِٹ چھوئے سال اچہ، لوٹ تت حقوت توریکو، ہاتے شوغہ شامل بیکو بچین چھتراروت بو غیلک ہوئے۔ مہ برارو ژیژاؤ ڈاکٹر فرحت جلیل اوچے حامد جلیل دی ہے سفرا شامل اوشونی۔ راولیو بخین نسی، وا باخین نسی وا باخین نسی دروسو پونہ پھریتم کہ سے سرا پھنڈاڑ۔ تابئیو وجہیں دتی لگینی کھمتو چوکیتائے۔ خفتنار اچی، لش بیتی میر کھانیہ توری لوڑیتم کہ پونہ ای دوکان ہوری شیر، خوشان ہوتم کہ محنتو جزبہ اسپہ موژی دی پیدا بیرو بیرائے۔ گاڑیو روپھئے لوڑیتم کہ جو تروئے جوانیکو نشی گپ دونیان۔ اوا ریم کہ اے مہ بلبل اوغو لوٹ بوتھال مت تراویکی ژان قق بیتی شیر ریکوحیران بتی ایغو موختو لوڑیکہ پرانی۔ اچی ہاتے ایوالی ماتین ریکی " ماما مونگہ پہ چترالئے نہ پوئیگو" بس ای میلیٹو ہاتے خوشانی، پھینوغونہ ٹھوخ اف نیشیتائے۔ بہرحال دروسار گنی چھترارہ پت، چھترار پوشیتم مگم چھتراری نو پوشیتم۔ نہ ہتے شیلی، نہ ہاتے سورو کپھوڑ، نہ ہاتے خدوخال۔ چھترارہ گور توری، ژوغورہ براررو دورا بس بیتی، چھوچی راغیشٹی، تورکھووت رہی اریتم۔
کھونگور دیرو بوہتہ توریکو ای عجیب اشناری بھت اسپہ روئتو پرائے۔ بو کمزور فقط چگینہ۔ زپ چوڑ چوڑ، کبال رودوس۔ غوزار لکھی تھرئران، اوا استادوت ریم کہ اے استاد گاڑیو روپھاو اوچھے۔ ہایہ سخت تکلیفہ اسور، پھوک اوغ، ہورو ٹھورئسی، یو خومی، تو نسہ باغاتم، سلام کوریکو ناچیتئو باڑا، و سلام ریتائے۔ اوا ریم کہ، اے محترم، دہ کہ ہایہ اوغار پھک ٹھورے۔ نو پیمن تہ اوغو، پسہ چھتراری مہ پیئے اسومی، مہ سوم کیہ ائیھ گانیسان لاش کوئی کہ بِسان تان رہو گانے۔ اوا ریم کہ اے صائب نولہ، اوغار ٹھورے۔ نو، نست مت لودیت توکورار، کیہ اشناری، اوریم کہ اے حضرت مہ نام عنایت پشاورہ اسوم۔ او، تو ہاتے ریڈیوا براستیئیک، ٹرگسانی عنایت تھے نو؟ دی لہ حضرت اوا ہاسے۔ اوا پسہ ریڈئو والان سار دی بو خفہ۔ ریکو مہ دلچسپی خور دی ذیات بیتی ریم کہ، اے صائب تان لوو دیت لہ توکا؟ وا ریڈیو والان سار کو خفہ۔ ریکو ہاتے حضرت۔کہ ہاسے تان وضع قطعا بو لوٹ اشناری سارئیاو اوشوئے وا ای بو لوٹ تاریخو اوچے تہزیبو خاوند نویاو اوشوئے، قائی شار استونی، چوڑ چوڑ چلایان ساوزئے، مہ موختو غیری اشروان یو لاکی ریتائے کہ اے مہ ژاو، مہ نام چھترار، اوا چھتراریان تان ہوستین ہایہ حالتوت توری اسوم۔ اوا ریم کہ اے صائب کیہ قسمہ، چھتراری تہ کیانی ارینی؟ ریکو چھترار شار استونی ریکی، تہ پونار نیزیمن مگم تہ سوم مشقولگی دی بو ضروری، مہ درخواست ہایہ کہ مہ ہامی لوان یا ریڈیوا دوس یا کورا نیویشس۔ اوا ریم کہ بلکل کھاڑان کوم۔ تھے چھترار تان گیلائیان ہموش شروغ اریر۔
لوٹ میتارو وختہ، مہ آوان ہرونی لوٹ اوشوئے کہ ای نس شوقان سرایا، وا ای نس ویرشگوما توراو اوشوئے۔ ہانیسن اسکوٹی 14850 مربع کلو میٹر بہچی دی، ہایہ صوبو تقریبان 17 فیصد۔ صوبو سفانسار ژنگ زوم، ترچمیر مہ، سفانسار ژنگ جینالی، شندور مہ، 20 ہزار چکئیار ذیاد دوردنہ ژغہ قاقلشٹ مہ، 24000 میگاواٹ بشلی سازیکو بش سین مہ پازو آف بیران ، کوسیکوت شیلی شیلی ژاغہ مسوم، دنیو بو قدیم کھو اوچے کالاش تہذیب مہ، کھاکو بروز کوریکو بش شا یوز مہ، صوبو 27 واران موژار 14 وار مہ سوم، تعلیمو لحاظہ صوبا جوو درجہ مہ سوم، الغرض اوا ہر ای نعمتاری مالامال، مگم مہ ہاتے عزت نو بوین کھیو کہ اوا حقدار، مہ تین مہ حق نو تارورن۔ ہامی لُوانتین دونی دونی، مہ ھایہ حالت بیتی شیر۔
اوا ریم کہ تہ خیالہ ہامیتان وجوہات کیاغ؟
چھترار سورو موڑو دِتی سخت کیڑیتائے۔ خڑیکھی خڑیکھی، بو مودہ اچہ، سورو ائھ کوری ریتائے کہ، مہ ہموش بیکو ذمہ دار مہ تان اژیلی۔ پسہ کیاوت دی مہ اہمیتو ہوش نو اریتامی۔ مہ محل وقوعو اہمیتو تان ہوش نو ما کومی۔ تروئے ملکان سوم مہ سرحد توری شینی۔ قدیم زمانری چھترار جعرافیائی لحاظہ اہم بیکن دتی چینار، ترکستنار، اڑغانستان، کاشغرار، روسار اوچے برطانیار روئے ہامو سورا قبضہ کوریکو کوشش ارینی پھتی کامیاب ہونی وا پھتی بان ژوتی اچی بغانی۔ بشرو صدیا پت، مہ تاریخو تان نیوشیکو کوشش نو ارینی وا ای لوٹ داستان مسخ ہوئے۔ بشرو صدیو موژار پُھک پروشٹی، تاریخو بڑاسیکو کوشش کورونو ہوئے مگم ہارونیہ پت تاریخو بو ورق یا بوغین بتی اوشونی یا تونج بتی اوشونی، تھے ، دہنہ غیرئے تاریخی لو دیونو ہونی۔ ہے پھتوکی تاریخا، چینو بادشو، 747 عیسویئہ، جنرل کوہین سیو قیادتہ فوج ویشیئے چھترارو بادشاہ پوٹیمو شکست دتی، چینو وفادارسوچیو تختہ نیشیکو لو نکی۔ 1538 کاشغرو بادشاہ سلطان سعید خان، تان ژاو شہزادہ رشید خانو قیادتہ بول ویشئے چھترارو سورا قبضو کیہ ذکر تان نکی۔ 1640 ای خور کاشغری بدشاہ عبداللہو چھترارو سورا قبضو لو نکی۔ اچہ خور تاریخدان نسانی وا ہاتیت تاریخ نیویشیکو کوشش ارینی مگم صرفی تان قومیتہ پت۔ وا کاکی ثبوتان سوم جوستہ نیویشکو کوشش ارینی، مہ اژیلی، مانیکوت تیار نو۔ اسکور دی لو ہایہ کہ مہ تاریخو اوچے جعرافیائی اہمیتو ہامونیہ پت، مہ چھترارو اژیلی، دنیو پروشٹہ صحی معنا، لاکھیکو نو بیتی اسونی وا ہایہ مہ کیڑئران۔
چھترار، شار استونی ریتائے کہ، میتاری دور جم اوشوئے یا شوم، مگم ای اشناری اوشوئے، ہاسے چھترارو ننگ اوچے نا موسو ساتک اوشوئے۔ بادشاہ اوچے رعایہ، تان ننگ اوچے ناموسوت وال اوشونی۔ ہانیسین راولئیار موڑی اسپہ تین ژور بیزیمک راک بیرانی۔ چھترار سخت کیڑیتائے، ریگیشو پھورہ،اشرو غار غار اف چوٹیکہ پرانی۔ خڑیکھاو ریتائے کی ہایہ اشناری اسپہ ننگ اوچے ناموسو تباہ اریر۔ چھترار سخت جزباتہ گیتی مہ گیروانہ چوکی مہ زاڑئے ریتاے، تو ریڈیوا ہایہ بارا کو لو نو دوسن؟۔ اوا ریم کہ اے مہ جائے پیدائش، مہ شان و شوکت، اوا ریڈیوا ہایہ بارا لو دکو، چھترارو ای چت رائے وینی ابصار، ریڈیوا کوری ٹیلی فون کوری مہ سورہ پابندی چکیتائے۔ اوا کیچہ کوم۔ چھترار ریتائے کہ، اسلامہ ژورو سورین مال ژیبک مطلق حرام، مگم وا دی اسپہ تان موژی رشتا، ہیہ شوم رواجو کوراو اوشتم مگم ہانیسین بیریار روئے گونیان وا ژورو سورین مال ژبیکو، ہیت اسپہ ہے ژورو، کرینی گانیرو، بیع قطی جوشی، ہیتانتین بیزیمرو رے، شوم سلوک کورک بیرانی۔ مہ کیہ اژیلی کہ چھترار نشی اسونی، ہاتیتان زندگی کوچیلہ بتی شک بیرانی، روپھک نیشیکوت، ہاتیتانتین طعنہ دیاک بیرانی -ہاموش روین، کو تان پازہ بردئرو بیریتم رے، چھیترار سخت کیڑیتائے۔ ہایہ لووا اوا دی چھترارو سوم چوکی بو کیڑیتم۔ کوریکو کہ ہایہ موژی "روئے چھترارتو کو شادی کونیان" رے ای لوٹ بحث اردوو ای پیجہ فیس بکہ جاری شیر۔ ہاتیرا نیوشیروالفاظ ہایہ نیویشیکو بش نو۔
چھترار، تان لوو پروشٹی التی ریتائے کہ قندان اوچے کان لوشان اسپہ تان اژیلی تباہ ارینی۔ کان لوش مہ گہنہ اوشونی مگم مہ تان کان چوچ اژیلی ہیتان چھوروشو درے، مہ بو بد صورت ارینی۔ سف شاپیرو سوم ژوتی خسمو سوم کیڑک۔ مہ قندان لیز رے چھوتیو نرخہ پڑِک بیزیمیتانی۔ مہ اژیلی کاروباری نو بیکین دتی بیریار روئے گتی ہیتان کرینیان۔ اسپہ کیاغ، خالی باشیکو اوچے پھونکو بچین پیدا بیتی اسوسیہ؟
چھترار ریتائے کہ ،وخت بدیل بیتی شیر اسپہ وختو مطابقہ تان سورو بدل دئیلک بوئے، ورنہ دنیو سوم مقابلا اچی بہچوسی۔ مہ اژیلی جو قسمو ذہنی لہازیہ مبتلا اسونی۔ قواتنگ وا چارہ دست لال مینیا مبتلا وا غریب لال فوبیا مبتلا۔ حالنکہ کھاڑ ذہنی لہازی شینی وہیت اچی بہچیکو سبب ساوز بونی۔ چھترار درخواست اریر کہ مہ کھاڑ طبقو اژیلئیاتین راوے کہ ہامی کھاڑ لہازیان سار نسیکو بچین محنتو گولیان ویہاسیہ ژوتی، صبرو اوغو تے سورو پی، وختو رفتاروچے موقعو مناسبتہ، درونگ انوس دانی۔ چھترار، کاروبارو لوان دتی بو شدغاو اوشوئے۔ کاروبارہ دی چھتراری شکان سار اچی نایونیان۔ چھترار ریتائے کہ مہ کُشمو اوچے اویرو اژیلیان کہ پھار نیزیتامی، باقی کاروبارا سف پامندہ۔ راولئے بخ نسیکار اچی بو مواقع ہانی مگم اسپہ ہیغار کندوری فائدہ گنیتم ہایہ بو اہم سوال۔ ہیسوم چوکیروکاروباری کوروم سئل دوئی شیر وا چھترار سئل دوین ژاغہ، مگم سیق اوچے لوٹ نمیژا چھتراری تان ہوٹیلان بند کوری دورین پوریکو، سئل دویو، راہ رہی پوریتانی۔ ہایہ لو حقیقت کہ ہاتیت اچی بی شکانتین پِسہ چھترارتو مو بوغور راردو بونی۔ ہامو مطلب، دہلینزا توریرو رزقو پیڑنگی دک شیر وا کورا کہ کفران نعمت ہوئے اللہ ہاتیرا تان نعمتان اچی گانیر۔
مہ ژاو تو ریڈیوا کھوار پروگرام کوروسن کیہ نا؟ دی لہ مہ جائے پیدائش، مہ فخر، مہ ہردی مہ محبت، اوا ریڈیوا اسوم مگم کیہ ذمہ دار پوسٹہ نکی۔ پسہ ریڈیو والا دی مہ وارو، اوچے ساز ہوازوت کیہ نو اریتامی۔ خور واران ہنگان چھوغی کوراو بشونو ریکارڈ اریتامی۔ پسہ پورنیکہ خور واران اوزار اسپہ کھوارہ شامل ہونی۔ باشےیک لش لش بیتی سٹوڈیوا توریتانی۔ ہاتے کوس رادوو غون کھوار تورکھوا اژیتائے، موڑکھوا بوردی، پشورو میوزک اسٹوڈیوا توری امانت پیژیمیتائے۔ رباب اوچے بجہ گیتی ستھارو بوکھو پیڑیتانی، ڈفو ژاغو جیرکین گنیتائے وا اسپہ موسیقی ای ہش ژوڑائے غیریتائے کہ نہ تو ووری شیر نہ خال۔ کیاغ دی ریکو بشونو۔
بو سخت شیلی مشقولگی جاری اوشوئے، ہارونیہ پھار ڈرائور استاد ہارین دِکہ پرائے۔ چھترار مہ تان گوڑو موڑتو دِتی، مہ ہامی لو تہ اُجاد رے، کیڑکیڑاو موڑی چھترارو وشکی رہی اریر وا اوا ائھ چھترارو وشکی رہی اریتم۔ پسہ اُجاد خائے، کہ یو چھترارا، کہ چھترار پوشیتامی، ہورو خیلان ماژی اوغ ہو ٹھورئے، ہورو دردو دستانو ای مکالا ضرور کار کورور۔ائھ والانتین اوا ہورو لوان دوم۔ باتم، خدایار۔
